ಬೆಂಗಳೂರು: ನೈಸ್ ರಸ್ತೆಯಲ್ಲಿ ಶನಿವಾರ ರಾತ್ರಿ ರಕ್ತಸಿಕ್ತವಾಗಿ ಸತ್ತ ಸ್ಥಿತಿಯಲ್ಲಿ ಪತ್ತೆಯಾಗಿದ್ದ ಲಾಯರ್ ಜಗದೀಶ್ ಅವರ ಸಾವಿಗೆ ಸಂಬಂಧಿಸಿದಂತೆ ಪ್ರಕರಣದಲ್ಲಿ ಮಹತ್ವದ ಟ್ವಿಸ್ಟ್ ಪಡೆದಿದೆ. ಪ್ರಾರಂಭದಲ್ಲಿ ಕೊಲೆ ಎಂದು ಎಣಿಸಲಾಗಿದ್ದ ಈ ಘಟನೆ ಇದೀಗ ಅಪಘಾತ ಎನ್ನುವ ದಿಕ್ಕಿನಲ್ಲಿ ಮುಂದುವರಿಯುತ್ತಿದೆ. ಪೊಲೀಸರು ನಡೆಸಿದ ಪ್ರಾಥಮಿಕ ತನಿಖೆಯಲ್ಲಿ ರಸ್ತೆ ಮೇಲಿನ ವಾಗ್ವಾದ ಮತ್ತು ಅಕಸ್ಮಿಕ ಘಟನೆ ಸಾವಿಗೆ ಕಾರಣವಾಗಿರಬಹುದು ಎಂಬ ಮಾಹಿತಿ ಲಭ್ಯವಾಗಿದೆ.
ಶನಿವಾರ ರಾತ್ರಿ ಜಗದೀಶ್ ನೈಸ್ ರಸ್ತೆಯಲ್ಲಿ ತಮ್ಮ ಕಾರಿನಲ್ಲಿ ಪ್ರಯಾಣಿಸುತ್ತಿದ್ದರು. ಈ ವೇಳೆ ಅವರ ಕಾರಿಗೆ ಲಾರಿ ಸ್ಪರ್ಶವಾಗಿದ್ದು, ಲಾರಿ ಸ್ವಲ್ಪ ಮುಂದೆ ಹೋಗಿ ನಿಂತಿತ್ತು. ಇದರಿಂದ ಕೋಪಗೊಂಡ ಜಗದೀಶ್ ಲಾರಿ ಚಾಲಕನ ಬಳಿಗೆ ಹೋಗಿ ವಾಗ್ವಾದಕ್ಕೆ ಇಳಿದಿದ್ದರು. ವಾಗ್ವಾದದ ನಡುವೆ ಅವರು ಮಧ್ಯ ರಸ್ತೆಗೆ ಸಾಗಿದ್ದು, ಈ ವೇಳೆಯಲ್ಲಿ ಹಿಂದಿನಿಂದ ವೇಗವಾಗಿ ಬಂದ ಲಾರಿಯ ಹಿಂಬದಿಯ ಭಾಗ ಅವರಿಗೆ ತಾಗಿದ್ದು, ತೀವ್ರ ರಕ್ತಸ್ರಾವದಿಂದ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.
ಆರಂಭದಲ್ಲಿ ಜಗದೀಶ್ ಅವರ ಕುಟುಂಬದವರು ಕೊಲೆ ಸಾಧ್ಯತೆಯ ಬಗ್ಗೆ ಶಂಕೆ ವ್ಯಕ್ತಪಡಿಸಿ ದೂರು ಸಲ್ಲಿಸಿದ್ದರು. ಆದರೆ, ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದ ಪೊಲೀಸರು ಅಪಘಾತ ಎಂಬ ನಿರ್ಧಾರಕ್ಕೆ ಬಂದಿದ್ದಾರೆ. ಲಾರಿ ಚಾಲಕನಿಗೆ ಹಿಂದಿನಿಂದ ಏನೋ ತಾಗಿದಂತೆ ಅನುಭವವಾದರೂ, ಯಾರೂ ಹಿಂಬದಿಯಲ್ಲಿ ಇಲ್ಲದ ಕಾರಣ ಆತ ಮುಂದೆ ಹೋಗಿದ್ದಾನೆ. ಸದ್ಯ ಲಾರಿ ಚಾಲಕನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಲಾಗುತ್ತಿದೆ.
ಜಗದೀಶ್ ಅವರ ಮರಣೋತ್ತರ ಪರೀಕ್ಷೆಯ ವರದಿ ಇನ್ನೂ ಲಭ್ಯವಾಗಿಲ್ಲ. ಈ ವರದಿ ಬಂದ ಬಳಿಕ ಸ್ಪಷ್ಟತೆ ಸಿಗಲಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಪ್ರಕರಣದ ತನಿಖೆ ಇನ್ನೂ ಮುಂದುವರಿದಿದ್ದು, ಅಂತಿಮ ವರದಿ ಹೊರಬರಬೇಕಿದೆ.
ಈ ಪ್ರಕರಣ ಮತ್ತೊಮ್ಮೆ ರಸ್ತೆ ಭದ್ರತೆ ಮತ್ತು ರೋಡ್ ರೇಜ್ ಕುರಿತು ಚಿಂತನೆ ಮೂಡಿಸಿದ್ದು, ಎಲ್ಲಾ ವಾಹನ ಚಾಲಕರು ಶಾಂತಿಯುತವಾಗಿ ವ್ಯವಹರಿಸುವ ಅಗತ್ಯವಿದೆ ಎಂಬ ಸಂದೇಶವನ್ನು ಹರಡುತ್ತಿದೆ.
