ಹೊಸದಿಲ್ಲಿ: ಅಂತಾರಾಷ್ಟ್ರೀಯ ಹಾಗೂ ದೇಶಿ ಕ್ರಿಕೆಟ್ ಗಳಲ್ಲಿ ಒಬ್ಬ ಬೌಲರ್ ಹ್ಯಾಟ್ರಿಕ್ ವಿಕೆಟ್ ಪಡೆಯುವುದು ಬಲು ಅಪರೂಪ. ಆದರೆ, ಒಂದೇ ಓವರ್ನಲ್ಲಿ ಡಬಲ್ ಹ್ಯಾಟ್ರಿಕ್ (6ವಿಕೆಟ್) ಸಾಮಾನ್ಯದ ವಿಷಯವಲ್ಲ. ಅಂತಹ ಒಂದು ಅಪರೂಪದ ಸಾಧನೆಯನ್ನು ಇಂಗ್ಲೆಂಡ್ 12ರ ವಯಸ್ಸಿನ ಪೋರ ಆಲಿವರ್ ವೈಟ್ಹೌಸ್ ಮಾಡಿದ್ದಾನೆ.
ಇಂಗ್ಲೆಂಡ್ ನಲ್ಲಿ ಕುಕ್ಹಿಲ್ ತಂಡದ ವಿರುದ್ದ 12ರ ವಯೋಮಿತಿ ಕ್ರಿಕೆಟ್ ಪಂದ್ಯವೊಂದರಲ್ಲಿ ಬ್ರೂಮ್ಸ್ ಗ್ರೊವ್ ಕ್ರಿಕೆಟ್ ಕ್ಲಬ್ ಪರ ಆಡಿದ್ದ ಆಲಿವರ್ ವೈಟ್ ಹೌಸ್ ತಮ್ಮ ಬೌಲಿಂಗ್ ನಲ್ಲಿ ಈ ಸಾಧನೆ ಮಾಡಿದ್ದಾನೆ. ಈ ಬಾಲಕ ಒಂದೇ ಓವರ್ ನಲ್ಲಿ ಎರಡು ಬಾರಿ ಹ್ಯಾಟ್ರಿಕ್ ಮಾಡಿ ಒಟ್ಟು 6 ವಿಕೆಟ್ ಗಳನ್ನು ಕಬಳಿಸಿದ್ದಾನೆ. ಆ ಮೂಲಕ ತಾನು ಎಸೆದ ಎಲ್ಲಾ ಎಸೆತಗಳಲ್ಲಿ ವಿಕೆಟ್ ಪಡೆದಿದ್ದಾನೆ.
ಆಲಿವರ್ ವೈಟ್ ಹೌಸ್ ಆಶ್ಚರ್ಯಕರ ರೀತಿಯ ಬೌಲಿಂಗ್ ಸಂಘಟಿಸಿ ಒಂದೇ ಓವರ್ನಲ್ಲಿ 6 ವಿಕೆಟ್ ಪಡೆದು (ಡಬಲ್ ಹ್ಯಾಟ್ರಿಕ್) ಸಾಧನೆ ಮಾಡಿದ ನಂತರವೂ ತಮ್ಮ ಪರಿಣಾಮಕಾರಿ ಬೌಲಿಂಗ್ ಪ್ರದರ್ಶಿಸಿದರು. ತನ್ನ ಎರಡನೇ ಓವರ್ನಲ್ಲಿಯೂ ಎರಡು ವಿಕೆಟ್ ಕಿತ್ತರು. ಒಟ್ಟಾರೆ ತಾನು ಬೌಲ್ ಮಾಡಿದ ಎರಡು ಓವರ್ಗಳಲ್ಲಿ ಕೇವಲ ಒಂದೇ ಒಂದು ರನ್ ಕೊಟ್ಟು 8 ವಿಕೆಟ್ ಗಳನ್ನು ಕಬಳಿಸಿದ್ದಾನೆ.
12ರ ವಯಸ್ಸಿನ ಪುಟ್ಟ ಬಾಲಕ ತನ್ನ ಕೌಶಲ ಮತ್ತು ಸಾಮರ್ಥ್ಯದಿಂದ ಡಬಲ್ ಹ್ಯಾಟ್ರಿಕ್ ನಂತಹ ಅಸಾಧಾರಣ ಸಾಧನೆ ಮಾಡಿದ್ದು ಭವಿಷ್ಯದಲ್ಲಿ ಅತ್ಯುತ್ತಮ ಬೌಲರ್ ಆಗುವ ಭರವಸೆ ಮೂಡಿಸಿದ್ದಾನೆ. “ಆಲಿವರ್ ವೈಟ್ಹೌಸ್ ಮಾಡಿರುವ ಮಹತ್ವದ ಸಾಧನೆಯ ಬಗ್ಗೆ ನನಗೆ ನಂಬಲೂ ಸಾಧ್ಯವಾಗುತ್ತಿಲ್ಲ,” ಎಂದು ಬ್ರೂಮ್ಸ್ಗ್ರೊವ್ ಕ್ರಿಕೆಟ್ ಕ್ಲಬ್ನ ಮೊದಲ ನಾಯಕ ಜೇಡೆನ್ ಲೇವಿಟ್ ಶ್ಲಾಘಿಸಿದ್ದಾರೆ.
“ಒಂದೇ ಓವರ್ ನಲ್ಲಿ ಡಬಲ್ ಹ್ಯಾಟ್ರಿಕ್ ಸಾಧನೆ ಮಾಡಿರುವುದು ನಿಜಕ್ಕೂ ನಂಬಲಾಗದ ಸಂಗತಿ ಆಗಿದೆ ಆಲಿವರ್ ವೈಟ್ಹೌಸ್ ನಿಜಕ್ಕೂ ಆಶ್ಚರ್ಯಕರ ಬೌಲಿಂಗ್ ಪ್ರದರ್ಶನ ತೋರಿದ್ದಾನೆ. ಮುಂದಿನ ದಿನಗಳಲ್ಲಿ ಇನ್ನಷ್ಟು ಉತ್ತಮ ಸಾಧನೆ ಮಾಡಲಿದ್ದಾನೆ,” ಎಂದು ಅವರು ಭವಿಷ್ಯ ನುಡಿದಿದ್ದಾರೆ.
ಆಲಿವರ್ ವೈಟ್ ಹೌಸ್ ಗೆ ಕ್ರೀಡಾ ಸ್ಫೂರ್ತಿ ರಕ್ತಗತವಾಗಿಯೇ ಬಂದಿದ್ದು ಇವರ ಅಜ್ಜಿ ಎನ್ ಜೋನ್ಸ್ ಶ್ರೇಷ್ಠ ಟೆನಿಸ್ ಆಟಗಾರ್ತಿಯಾಗಿದ್ದರು. ಅವರು 1969ನೇ ಸಾಲಿನ ಪ್ರತಿಷ್ಠಿತ ವಿಂಬಲ್ಡನ್ ಟೆನಿಸ್ ಚಾಂಪಿಯನ್ ಷಿಪ್ ನಲ್ಲಿ ಪ್ರಶಸ್ತಿ ಮುಡಿಗೇರಿಸಿಕೊಂಡಿದ್ದರು.
