ನ್ಯೂಯಾರ್ಕ್ : ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ತುರ್ತು ರಹಸ್ಯ ಸಭೆಯಲ್ಲಿ ಪಾಕಿಸ್ತಾನಕ್ಕೆ ಮತ್ತೊಮ್ಮೆ ತೀವ್ರ ಮುಖಭಂಗವಾಗಿದೆ. ಭಾರತ ವಿರುದ್ಧ ಮತ್ತೆ ಕಣ್ಣಾರೆ ಸುಳ್ಳು ಆರೋಪಗಳನ್ನು ಎತ್ತಿ, ವಿಶ್ವಸಂಸ್ಥೆಯ ಮೆಟ್ಟಿಲು ಹತ್ತಿದ ಪಾಕಿಸ್ತಾನ, ಯಾವುದೇ ನಿರ್ಣಯ ಅಥವಾ ಪ್ರಕಟಣೆ ಇಲ್ಲದ ಸಭೆಯೊಂದಿಗೆ ಕೈಯಲ್ಲೇನೂ ಸಿಕ್ಕದೇ ಹಿಂತಿರುಗಿದೆ.
ಪಾಕಿಸ್ತಾನದ ಮನವಿಯ ಮೇರೆಗೆ ಈ ತುರ್ತು ಸಭೆ ಕರೆಯಲಾಗಿತ್ತು. ಕಾರಣ, ಇತ್ತೀಚೆಗೆ ಭಾರತ ಮತ್ತು ಪಾಕಿಸ್ತಾನ ನಡುವಿನ ಗಡಿಭಾಗದಲ್ಲಿ ಉದ್ವಿಗ್ನತೆಯ ಬೆಳವಣಿಗೆ. ಇದನ್ನು ಬಹಿರಂಗವಾಗಿ ಚರ್ಚಿಸಲು ಪಾಕ್ ಯತ್ನಿಸಿದರೂ, ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಸದಸ್ಯ ರಾಷ್ಟ್ರಗಳು ಯಾವುದೇ ನಿರ್ಧಾರವನ್ನೂ ತೆಗೆದುಕೊಳ್ಳದೆ ಸಭೆಯನ್ನು ಮುಕ್ತಾಯ ಮಾಡಿವೆ.
ಪಾಕ್ನ ಐತಿಹಾಸಿಕ ಮುಖಭಂಗಗಳ ಪಟ್ಟಿ ಮತ್ತಷ್ಟು ಉದ್ದಗೊಳಿಸಿದ ಘಟನೆಯಿದು. 2019ರ ಆಗಸ್ಟ್ನಲ್ಲಿ ಭಾರತವು ಜಮ್ಮು ಮತ್ತು ಕಾಶ್ಮೀರಕ್ಕೆ ನೀಡಲಾಗಿದ್ದ ವಿಶೇಷ ಸ್ಥಾನಮಾನ 370) ರದ್ದುಗೊಳಿಸಿದ ಬಳಿಕವೂ ಪಾಕಿಸ್ತಾನ ಚೀನಾ ಮೂಲಕ ಭದ್ರತಾ ಮಂಡಳಿಯಲ್ಲಿ ಈ ವಿಷಯ ಎತ್ತಿತ್ತು. ಆದರೆ ಅಂದಿನ ಸಭೆಯೂ ಫಲವತ್ತಾಗಿರಲಿಲ್ಲ. ಬಹುಪಾಲು ರಾಷ್ಟ್ರಗಳು “ಕಾಶ್ಮೀರ ವಿಷಯವು ದ್ವಿಪಕ್ಷೀಯ ಸಮಸ್ಯೆ” ಎಂಬ ನಿಲುವು ಹಿಡಿದು, ಅಂತಾರಾಷ್ಟ್ರೀಯೀಕರಣಕ್ಕೆ ಬೆಂಬಲ ನೀಡಿರಲಿಲ್ಲ.
ಈ ಬಾರಿ ಕೂಡ ಚೀನಾ ಪಾಕಿಸ್ತಾನಕ್ಕೆ ಬೆಂಬಲ ನೀಡಿದರೂ, ಬೇರೆಯ ರಾಷ್ಟ್ರಗಳಿಂದ ಯಾವುದೇ ಸ್ಪಷ್ಟ ಪ್ರತಿಕ್ರಿಯೆ ಲಭ್ಯವಾಗಲಿಲ್ಲ. ಸಭೆಯ ಬಳಿಕ ವಿಶ್ವಸಂಸ್ಥೆಯ ವತಿಯಿಂದ ಯಾವುದೇ ಪ್ರಕಟಣೆ ಹೊರಡಿಸಲ್ಪಟ್ಟಿಲ್ಲ. ಇದರಿಂದ ಪಾಕಿಸ್ತಾನ ಮತ್ತೊಮ್ಮೆ ಭಾರೀ ಹಿನ್ನಡೆಯಾಯಿತು.
ಸಭೆಯಲ್ಲಿ ಭಾಗವಹಿಸಿದ್ದ ರಾಷ್ಟ್ರಗಳು: ಶಾಶ್ವತ ಸದಸ್ಯ ರಾಷ್ಟ್ರಗಳಾದ ಚೀನಾ, ರಷ್ಯಾ, ಫ್ರಾನ್ಸ್, ಯುಕೆ ಮತ್ತು ಅಮೆರಿಕ ಜೊತೆಗೆ, ಎರಡು ವರ್ಷಗಳ ಅವಧಿಗೆ ಆಯ್ಕೆಯಾದ 10 ದೇಶಗಳು ಭಾಗವಹಿಸಿದ್ದವು. ಈ ದೇಶಗಳೆಂದರೆ ಅಲ್ಜೀರಿಯಾ, ಡೆನ್ಮಾರ್ಕ್, ಗ್ರೀಸ್, ಗಯಾನಾ, ಪಾಕಿಸ್ತಾನ, ಪನಾಮಾ, ಕೊರಿಯಾ ಗಣರಾಜ್ಯ, ಸಿಯೆರಾ ಲಿಯೋನ್, ಸ್ಲೋವೇನಿಯಾ, ಮತ್ತು ಸೋಮಾಲಿಯಾ.
ಪಾಕಿಸ್ತಾನ ಸದಾ ಅಂತಾರಾಷ್ಟ್ರೀಯ ವೇದಿಕೆಯಲ್ಲಿ ಭಾರತವನ್ನು ಕೆಡವಲು ಯತ್ನಿಸುತ್ತಿದೆ. ಆದರೆ ಎಲ್ಲಿಂದಲಾದರೂ ಬೆಂಬಲ ಸಿಗದ ಸ್ಥಿತಿಯಲ್ಲಿ ತನ್ನ ರಾಜಕೀಯ ಕಸರತ್ತು ನಿರರ್ಥಕವಾಗುತ್ತಿದೆ. ಇದರಿಂದಾಗಿ, ಪಾಕಿಸ್ತಾನದ ವಿಶ್ವದತ್ತ ಇರುವ ನಂಬಿಕೆ ಮತ್ತಷ್ಟು ಕುಸಿಯುವ ಸಾಧ್ಯತೆ ಇದೆ.
