ಬೆಂಗಳೂರು: ಪ್ರಧಾನಿ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ನೀತಿ ಆಯೋಗದ 10ನೇ ಆಡಳಿತ ಮಂಡಳಿ ಸಭೆಯಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಾಜರಾಗದಿರುವುದು ಭಾರೀ ರಾಜಕೀಯ ವಿವಾದಕ್ಕೆ ಕಾರಣವಾಗಿದೆ. ಬಿಜೆಪಿ, ಈ ಬಗ್ಗೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿ, “ಅಭಿವೃದ್ಧಿಗಿಂತ ರಾಜಕೀಯ ಭೋಗಗಳಿಗೆ ಕಾಂಗ್ರೆಸ್ ಆದ್ಯತೆ ನೀಡುತ್ತಿದೆ” ಎಂದು ಕಿಡಿಕಾರಿದೆ.
ವಿರೋಧ ಪಕ್ಷದ ನಾಯಕ ಆರ್. ಅಶೋಕ್ ಅವರು, ಸಿಎಂ ಸಿದ್ದರಾಮಯ್ಯ ಹಾಗೂ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ವಿರುದ್ಧ ವಾಗ್ದಾಳಿ ನಡೆಸಿ, “ರಾಜಕೀಯ ಪ್ರವಾಸಗಳು ಮತ್ತು ಪಾರ್ಟಿ ಚಟುವಟಿಕೆಗಳಿಗೆ ಕಾಲ ಇದೆ, ಆದರೆ ರಾಷ್ಟ್ರೀಯ ಮಟ್ಟದ ಆಡಳಿತ ಚರ್ಚೆಗೆ ಕಾಲವಿಲ್ಲ” ಎಂಬ ವ್ಯಂಗ್ಯವೊಂದನ್ನು ಸಾಮಾಜಿಕ ಜಾಲತಾಣದ ಮೂಲಕ ಹಂಚಿಕೊಂಡಿದ್ದಾರೆ.
ಅಶೋಕ್ ಅವರ ವ್ಯಂಗ್ಯ ಸೂಚನೆಗಳು:
- ಹೊಸಪೇಟೆಯ ಸಾಧನಾ ಸಮಾವೇಶದಲ್ಲಿ ಪಾಲ್ಗೊಳ್ಳಲು ಕಾಲವಿದೆ
- ಐಪಿಎಲ್ ಪಂದ್ಯ ವೀಕ್ಷಿಸಲು ಚಿನ್ನಸ್ವಾಮಿ ಕ್ರೀಡಾಂಗಣಕ್ಕೆ ತೆರಳಲು ಕಾಲವಿದೆ
- ವಿದ್ಯುತ್ ಸಮಸ್ಯೆ ಕುರಿತಂತೆ ದೆಹಲಿಗೆ ಧಾವಿಸಲು ಸಮಯವಿದೆ
- ಹುಟ್ಟುಹಬ್ಬ ಆಚರಣೆಗೆ ಕಬಿನಿ ಸಫಾರಿ ಪ್ರವಾಸಕ್ಕೂ ಅವಕಾಶ ಇದೆ
- ಡಿಎಂಕೆ ಜತೆ ರಾಜಕೀಯ ಸಭೆಗಾಗಿ ಚೆನ್ನೈಗೆ ಭೇಟಿ ನೀಡಲು ಸಮಯವಿದೆ
- ಎಐಸಿಸಿ ಸಭೆಗಾಗಿ ಜೈಪುರ ಪ್ರಯಾಣಸಲು ಸಮಯವಿದೆ
ಆದರೆ, ರಾಜ್ಯ ಮತ್ತು ರಾಷ್ಟ್ರದ ಅಭಿವೃದ್ಧಿಯ ಕುರಿತ ಮಹತ್ವದ ಚರ್ಚೆಗಳು ನಡೆಯುವ ನೀತಿ ಆಯೋಗದ ಸಭೆಗೆ ಹಾಜರಾಗುವ ಪ್ರಾಮುಖ್ಯತೆಯಿಲ್ಲವೇ ಎಂಬ ಪ್ರಶ್ನೆಗಳನ್ನು ಎತ್ತಿದ್ದಾರೆ.
ಕಾಂಗ್ರೆಸ್ ಸರ್ಕಾರ ಜನಸೇವೆಗಿಂತ ರಾಜಕೀಯ ಪ್ರದರ್ಶನ ಮತ್ತು ವೈಯಕ್ತಿಕ ಚಟುವಟಿಕೆಗೆ ಹೆಚ್ಚಿನ ಆದ್ಯತೆ ನೀಡುತ್ತಿದೆ. ಈ ನಿರ್ಲಕ್ಷ್ಯ ರಾಜ್ಯದ ಅಭಿವೃದ್ಧಿ ಹಿತಾಸಕ್ತಿಗೆ ಧಕ್ಕೆ ತರುತ್ತದೆ ಎಂಬ ಭಯ ಬಿಜೆಪಿಯದು.
ಪ್ರತಿ ವರ್ಷ ನಡೆದ ಈ ಸಭೆಯಲ್ಲಿ ರಾಷ್ಟ್ರದ ಅಭಿವೃದ್ಧಿ ತಂತ್ರ, ಬಜೆಟ್ ಯೋಜನೆಗಳು, ಸಾಮಾಜಿಕ ಅಭಿವೃದ್ಧಿ, ತಾಂತ್ರಿಕ ಬದಲಾವಣೆ ಮತ್ತು ರಾಜ್ಯಗಳ ಸಹಕಾರದ ಬಗ್ಗೆ ಚರ್ಚೆಗಳು ನಡೆಯುತ್ತವೆ.
