ಮಂಡ್ಯ: ಮಂಡ್ಯದಲ್ಲಿ ಇಂದು ಬೆಳಿಗ್ಗೆ ನಡೆದ ದಾರುಣ ಘಟನೆ ಒಂದು ಮಗು ಜೀವ ಕಳೆದುಕೊಳ್ಳುವಂತಹ ದುಃಖದ ಸಂಗತಿಯನ್ನು ಜನತೆ ಮುಂದೆ ತಂದಿದೆ. ಮದ್ದೂರು ತಾಲೂಕಿನ ಗೊರವನಹಳ್ಳಿ ಗ್ರಾಮದ ಮೂರುವರೆ ವರ್ಷದ ಹೃತೀಕ್ಷಾ ಎಂಬ ಮಗು, ಟ್ರಾಫಿಕ್ ಪೊಲೀಸರ ಎಡವಟ್ಟಿಗೆ ಬಲಿಯಾದ ಘಟನೆ ಮಂಡ್ಯದ ನಂದ್ ಸರ್ಕಲ್ ಬಳಿ ನಡೆದಿದೆ.
ಮಗುವಿಗೆ ನಾಯಿ ಕಚ್ಚಿದ ಹಿನ್ನೆಲೆಯಲ್ಲಿ ತೀವ್ರವಾಗಿ ಗಾಯಗೊಂಡಿದ್ದ ಮಗುವನ್ನು ತಕ್ಷಣ ಆಸ್ಪತ್ರೆಗೆ ಕರೆದೊಯ್ಯುತ್ತಿದ್ದ ವಾಣಿ-ಅಶೋಕ್ ದಂಪತಿಯ ಬೈಕ್ಗೆ, ಹೆಲ್ಮೆಟ್ ತಪಾಸಣೆ ನಡೆಸುತ್ತಿದ್ದ ಸಂಚಾರಿ ಪೊಲೀಸರು ರಸ್ತೆಯಲ್ಲಿ ಅಡ್ಡಗಟ್ಟಿದ ಕ್ಷಣದಲ್ಲಿ, ಆಯತಪ್ಪಿ ಬೈಕ್ ನಿಂದ ಬಿದ್ದು ಹೃತೀಕ್ಷಾಳ ತಲೆಗೆ ತೀವ್ರ ಪೆಟ್ಟು ಬಿದ್ದ ಪರಿಣಾಮ ಮಗು ಸ್ಥಳದಲ್ಲೇ ಮೃತಪಟ್ಟಿದೆ.
ಘಟನೆ ನಡೆದಿರುವ ಸ್ಥಳ ಮಂಡ್ಯ ಜಿಲ್ಲೆಯ ನಂದ್ ಸರ್ಕಲ್. ಘಟನೆಯ ಪ್ರಕಾರ, ಬೈಕ್ ನಲ್ಲಿ ಇದ್ದ ಕುಟುಂಬ ಆಸ್ಪತ್ರೆಗೆ ತುರ್ತುವಾಗಿ ಮಗುವನ್ನು ಕರೆದೊಯ್ಯುತ್ತಿದ್ದಾಗ, ಪೊಲೀಸರು ಹೆಲ್ಮೆಟ್ ಇಲ್ಲದಿದ್ದ ಕಾರಣಕ್ಕೆ ಬೈಕ್ನ್ನು ತಡೆದು ನಿಲ್ಲಿಸುತ್ತಾರೆ. ಈ ವೇಳೆಯಲ್ಲೇ ಬೈಕ್ ಸವಾರ ಅಶೋಕ್ ತೀವ್ರವಾಗಿ ಬ್ರೇಕ್ ಹಾಕುತ್ತಿದ್ದಂತೆ, ಬೈಕ್ ಆಯತಪ್ಪಿ ಕೆಳಕ್ಕೆ ಬೀಳುತ್ತದೆ. ಬೈಕ್ನಲ್ಲಿ ಇದ್ದ ಪತ್ನಿ ವಾಣಿ ಮತ್ತು ಮಗು ಕೂಡ ಬಿದ್ದುಹೋಗುತ್ತಾರೆ.
ಬಿದ್ದ ಈ ವೇಳೆ ಮಗುವಿನ ತಲೆ ಬಿದ್ದ ಸ್ಥಳದಲ್ಲಿ ಜೋರಾಗಿ ಬಡಿದ ಪರಿಣಾಮ ರಕ್ತಸ್ರಾವದಿಂದ ಮಗು ಸ್ಥಳದಲ್ಲೇ ಮೃತಪಟ್ಟಿದೆ. ಸಾರ್ವಜನಿಕರು ಈ ದೃಶ್ಯವನ್ನು ಕಣ್ಣಾರೆ ನೋಡಿ ತೀವ್ರ ಆಘಾತಕ್ಕೆ ಒಳಗಾಗಿದ್ದಾರೆ.
ಘಟನೆಯ ಬಳಿಕ ಸ್ಥಳೀಯ ಜನತೆ ಕೋಪಗೊಂಡು ಟ್ರಾಫಿಕ್ ಪೊಲೀಸರ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. “ಹೆಲ್ಮೆಟ್ ತಪಾಸಣೆಯ ವೇಳೆ ಸ್ವಲ್ಪ ಮನುಷ್ಯತ್ವ ಇರಬೇಕಲ್ಲ!” ಎಂಬ ಕೂಗು ಕೇಳಿ ಬಂದಿದೆ. ಕೆಲವರು ನೇರವಾಗಿ ಪೊಲೀಸರೊಂದಿಗೆ ವಾಗ್ವಾದಕ್ಕೂ ಮುಂದಾಗಿದ್ದಾರೆ.
ಘಟನೆ ನಂತರ, ಮಂಡ್ಯ ಜಿಲ್ಲೆ ಸಂಚಾರಿ ಪೊಲೀಸ್ ಇಲಾಖೆ ಸ್ಪಂದಿಸಿದ್ದು, ಘಟನೆಯ ಬಗ್ಗೆ ತನಿಖೆ ಆರಂಭಿಸಿದೆ. ಸ್ಥಳೀಯ ಸಂಚಾರಿ ಪೊಲೀಸರು ತಾವು ಕೈಗೊಂಡ ಕ್ರಮ ನಿಯಮಾನುಸಾರವಾಗಿತ್ತೆಂದು ಹೇಳಿದ್ದರೂ, ಹಿರಿಯ ಅಧಿಕಾರಿಗಳು ಈ ಬಗ್ಗೆ ಪರಿಶೀಲನೆ ನಡೆಸಿ, ತಪ್ಪಿತಸ್ಥರ ವಿರುದ್ಧ ಕ್ರಮ ತೆಗೆದುಕೊಳ್ಳುವುದಾಗಿ ಭರವಸೆ ನೀಡಿದ್ದಾರೆ.
