ಮೈಸೂರು: ಐಪಿಎಲ್ 2025 ಟೂರ್ನಿಯಲ್ಲಿ ಭರ್ಜರಿ ಆಟವಾಡಿ ಫೈನಲ್ ಪಂದ್ಯಕ್ಕೆ ತಲುಪಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ತಂಡದ ಗೆಲುವಿಗಾಗಿ ಮೈಸೂರಿನಲ್ಲಿ ಅಭಿಮಾನಿಗಳು ಭಕ್ತಿ ಹಾಗೂ ಭಾವನೆಗಳಿಂದ ಹೋಮ-ಹವನ ಹಾಗೂ ವಿಶೇಷ ಪೂಜೆಗಳನ್ನು ನೆರವೇರಿಸಿದ್ದಾರೆ.
ಮೈಸೂರಿನ ಪ್ರಸಿದ್ಧ ಅಮೃತೇಶ್ವರ ದೇವಸ್ಥಾನ, ದೇವರಾಜ ಮೊಹಲ್ಲಾದಲ್ಲಿ ನೂರಾರು ಆರ್ಸಿಬಿ ಅಭಿಮಾನಿಗಳು ತಂಡದ ಐತಿಹಾಸಿಕ ಜಯಕ್ಕಾಗಿ ದೇವರಿಗೆ ಪ್ರಾರ್ಥಿಸಿದರು. ಮಂಗಳವಾದ, ವೇದಘೋಷದೊಂದಿಗೆ ದೇವಾಲಯದ ಆವರಣದಲ್ಲಿ ಶ್ರೀ ಚಂಡಿಕಾ ಹೋಮ, ಲಕ್ಷ್ಮೀ ನಾರಾಯಣ ಹೋಮ ಮತ್ತು ಗಣಪತಿ ಹೋಮ ನಡೆಯಿತು. ಅಭಿಮಾನಿಗಳು ತಂಡದ ಪ್ರತಿ ಆಟಗಾರರ ಹೆಸರನ್ನು ಜಪಿಸಿ, ಅವರ ಉತ್ತಮ ಪ್ರದರ್ಶನಕ್ಕಾಗಿ ದೇವರ ಭಕ್ತಿಗೆ ಶರಣಾದರು.
ಈ ವರ್ಷ, ಐಪಿಎಲ್ ನಲ್ಲಿ ಆರ್ಸಿಬಿ ತನ್ನ ಸ್ಪರ್ಧಾತ್ಮಕತೆಗೆ ಹೊಸ ಅರ್ಥ ನೀಡಿದ್ದು, ಕಳೆದ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ ಅದ್ಭುತ ಗೆಲುವು ಸಾಧಿಸಿ ಫೈನಲ್ಗೆ ಲಗ್ಗೆಯಿಟ್ಟಿದೆ. ಇದೀಗ ಫೈನಲ್ ಪಂದ್ಯ ಜೂನ್ 3ರಂದು ಅಹಮ್ಮದಾಬಾದ್ ನಲ್ಲಿ ನಡೆಯಲಿದೆ. ಈ ಮಹತ್ವದ ಪಂದ್ಯದಲ್ಲಿ ಗೆಲುವು ಸಾಧಿಸಿ, ಆರ್ಸಿಬಿ ತನ್ನ ಮೊದಲ ಐಪಿಎಲ್ ಟ್ರೋಫಿ ಗೆಲ್ಲಲಿ ಎಂಬ ಆಶಯದಿಂದ ಅಭಿಮಾನಿಗಳು ದೇವರ ಕೃಪೆ ಕೋರಿದ್ದಾರೆ.
ಪೂಜೆಗೆ ಹಾಜರಿದ್ದ ಆರ್ಸಿಬಿ ಅಭಿಮಾನಿಗಳು, “ಆರ್ಸಿಬಿ ನಮ್ಮ ಹೆಮ್ಮೆ. ಹಲವು ವರ್ಷಗಳಿಂದ ನಾವು ಕಾತುರದಿಂದ ಟ್ರೋಫಿಗೆ ಕಾಯುತ್ತಿದ್ದೇವೆ. ಈ ಬಾರಿ ತಂಡ ಬದಲಾಗಿದ್ದು, ಆತ್ಮವಿಶ್ವಾಸ ತುಂಬಿದೆ. ದೇವರು ಆಶೀರ್ವದಿಸಿದರೆ ಈ ಬಾರಿ ಪಕ್ಕಾ ಜಯ ನಮ್ಮದೇ!” ಎಂದು ತಿಳಿಸಿದ್ದಾರೆ.
