ಬರ್ಲಿನ್, ಜೂನ್ 08: ಜಗತ್ತಿನಾದ್ಯಂತ ನಡೆಯುವ ವಿಚಿತ್ರ ಹಾಗೂ ಅಸಾಧಾರಣ ಆಹಾರ ಸವಾಲುಗಳಲ್ಲಿ ಹೊಸ ದಾಖಲೆಗಳನ್ನು ನಿರ್ಮಿಸುತ್ತಿರುವ ಜರ್ಮನಿಯ ಸಾಹಸಿ ಆಂಡ್ರೆ ಓರ್ಟೋಲ್ಫ್ (Andre Ortolf) ಮತ್ತೊಮ್ಮೆ ಸುದ್ದಿಯಾಗಿದ್ದಾರೆ. ಕೇವಲ ಒಂದು ನಿಮಿಷದಲ್ಲಿ 1,273 ಗ್ರಾಂ (1.273 ಕಿಲೋಗ್ರಾಂ) ಜೇನುತುಪ್ಪವನ್ನು ಸೇವಿಸುವ ಮೂಲಕ ಅವರು ಗಿನ್ನಿಸ್ ವಿಶ್ವದಾಖಲೆಯ ಹೊಸ ಪುಟ ಬರೆದಿದ್ದಾರೆ.
ಜರ್ಮನಿಯ ಆಗ್ಸ್ಬರ್ಗ್ ನಗರದಲ್ಲಿ ನಡೆದ ಅಧಿಕೃತ ಕಾರ್ಯಕ್ರಮದಲ್ಲಿ ಈ ಸಾಧನೆ ದಾಖಲಾಗಿದ್ದು, ಗಿನ್ನಿಸ್ ವರ್ಲ್ಡ್ ರೆಕಾರ್ಡ್ಸ್ ಸಂಸ್ಥೆ ಅವರನ್ನು ಜಗತ್ತಿನ ಅತ್ಯಂತ ವೇಗವಾಗಿ ಜೇನುತುಪ್ಪ ಸೇವಿಸಿದ ವ್ಯಕ್ತಿ ಎಂದು ಘೋಷಿಸಿದೆ.
ಸಾಮಾನ್ಯವಾಗಿ ಒಂದು ಚಮಚ ಜೇನುತುಪ್ಪವನ್ನೇ ನಿಧಾನವಾಗಿ ಸವಿಯುವ ಜನರ ನಡುವೆ, ಸುಮಾರು 1.2 ಕಿಲೋಗ್ರಾಂ ತೂಕದ ಜೇನುತುಪ್ಪವನ್ನು ಕೇವಲ 60 ಸೆಕೆಂಡುಗಳಲ್ಲಿ ಪೂರ್ಣಗೊಳಿಸಿರುವುದು ಅಚ್ಚರಿಯ ಸಾಧನೆಯಾಗಿ ಗಮನ ಸೆಳೆದಿದೆ. ಹೆಚ್ಚಿನ ಪ್ರಮಾಣದ ಸಕ್ಕರೆ ಮತ್ತು ಕ್ಯಾಲೊರಿಗಳನ್ನು ಹೊಂದಿರುವ ಈ ಪ್ರಮಾಣದ ಜೇನುತುಪ್ಪವನ್ನು ಅಷ್ಟೊಂದು ಕಡಿಮೆ ಸಮಯದಲ್ಲಿ ಸೇವಿಸುವುದು ಸಾಮಾನ್ಯ ವ್ಯಕ್ತಿಯ ಕಲ್ಪನೆಗೂ ಮೀರಿದ ಸಂಗತಿಯಾಗಿದೆ.
ಆಂಡ್ರೆ ಓರ್ಟೋಲ್ಫ್ ಈ ಸವಾಲನ್ನು ಸುಲಭವಾಗಿ ಪೂರ್ಣಗೊಳಿಸುತ್ತಿರುವ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ. ಲಕ್ಷಾಂತರ ಮಂದಿ ಈ ವಿಡಿಯೊವನ್ನು ವೀಕ್ಷಿಸಿದ್ದು, ಹಲವರು ಅವರನ್ನು “ಹ್ಯೂಮನ್ ಬೀ”, “ಹನಿ ಕಿಂಗ್” ಹಾಗೂ “ಬೀ ಮ್ಯಾನ್” ಎಂಬ ಹೆಸರಿನಿಂದ ಕರೆಯುತ್ತಾ ಪ್ರಶಂಸಿಸಿದ್ದಾರೆ.
ಸ್ಪೀಡ್ ಈಟಿಂಗ್ ಹಾಗೂ ಸ್ಪೀಡ್ ಡ್ರಿಂಕಿಂಗ್ ಕ್ಷೇತ್ರದಲ್ಲಿ ಆಂಡ್ರೆ ಓರ್ಟೋಲ್ಫ್ ಈಗಾಗಲೇ ಚಿರಪರಿಚಿತ ಹೆಸರು. ಜೇನುತುಪ್ಪ ಮಾತ್ರವಲ್ಲದೆ, ಅತಿ ವೇಗವಾಗಿ ಖಾರದ ಸಾಸ್ ಕುಡಿಯುವುದು, ಹೆಚ್ಚಿನ ಪ್ರಮಾಣದಲ್ಲಿ ಮೊಸರು ಸೇವಿಸುವುದು ಸೇರಿದಂತೆ ಹಲವು ವಿಶಿಷ್ಟ ಆಹಾರ ಸವಾಲುಗಳಲ್ಲಿ ಅವರು ವಿಶ್ವದಾಖಲೆ ನಿರ್ಮಿಸಿದ್ದಾರೆ.
ಪ್ರತಿ ಬಾರಿ ಹೊಸ ಹಾಗೂ ಕಠಿಣ ಗುರಿಗಳನ್ನು ತಾವೇ ನಿಗದಿಪಡಿಸಿಕೊಂಡು ಅವುಗಳನ್ನು ಯಶಸ್ವಿಯಾಗಿ ಸಾಧಿಸುವುದು ತಮ್ಮ ಅಭ್ಯಾಸ ಎಂದು ಆಂಡ್ರೆ ತಿಳಿಸಿದ್ದಾರೆ. ಜಾಗತಿಕ ಮಟ್ಟದ ದಾಖಲೆಗಳು ಆಕಸ್ಮಿಕವಾಗಿ ನಿರ್ಮಾಣವಾಗುವುದಿಲ್ಲ. ಅವುಗಳ ಹಿಂದೆ ತಿಂಗಳುಗಳ ಕಾಲದ ಕಠಿಣ ಪರಿಶ್ರಮ ಮತ್ತು ಶಿಸ್ತು ಇರುತ್ತದೆ ಎಂದು ಅವರು ಹೇಳಿದ್ದಾರೆ.
ಇಂತಹ ಸವಾಲುಗಳನ್ನು ಎದುರಿಸಲು ದೇಹ ಮತ್ತು ಮನಸ್ಸನ್ನು ಮೊದಲೇ ಸಿದ್ಧಪಡಿಸಬೇಕಾಗುತ್ತದೆ. ಹೊಟ್ಟೆಯ ಆಹಾರ ಸಂಗ್ರಹಣಾ ಸಾಮರ್ಥ್ಯವನ್ನು ಹೆಚ್ಚಿಸುವ ವಿಶೇಷ ವ್ಯಾಯಾಮಗಳು, ಸರಿಯಾದ ಉಸಿರಾಟದ ತಂತ್ರಗಳು ಹಾಗೂ ಅತ್ಯಂತ ವೇಗವಾಗಿ ಆಹಾರವನ್ನು ಅಗಿದು ನುಂಗುವ ವಿಧಾನಗಳನ್ನು ನಿರಂತರವಾಗಿ ಅಭ್ಯಾಸ ಮಾಡುತ್ತೇನೆ ಎಂದು ಆಂಡ್ರೆ ವಿವರಿಸಿದ್ದಾರೆ.
“ಯಾವುದೇ ಸಾಧನೆ ಮಾಡಲು ಕೇವಲ ಇಚ್ಛಾಶಕ್ತಿ ಇದ್ದರೆ ಸಾಕಾಗುವುದಿಲ್ಲ. ಅದಕ್ಕೆ ಶಿಸ್ತಿನ ತರಬೇತಿ ಮತ್ತು ನಿರಂತರ ಅಭ್ಯಾಸವೂ ಅಗತ್ಯ” ಎಂದು ಅವರು ಹೇಳಿದ್ದಾರೆ.
ಕೇವಲ 60 ಸೆಕೆಂಡುಗಳಲ್ಲಿ ಅಪಾರ ಪ್ರಮಾಣದ ಸಕ್ಕರೆಯಿರುವ ಜೇನುತುಪ್ಪವನ್ನು ಸೇವಿಸಿರುವ ಆಂಡ್ರೆ ಓರ್ಟೋಲ್ಫ್ ಅವರ ಈ ಅಪರೂಪದ ಸಾಧನೆ ಮತ್ತು ದೈಹಿಕ ಸಾಮರ್ಥ್ಯ ಇದೀಗ ವಿಶ್ವದಾದ್ಯಂತ ಅಚ್ಚರಿ ಮೂಡಿಸಿದೆ.
