ಬಾರಯ್ಯ ಶ್ರೀನಿವಾಸ ಭಕ್ತರ ಬಳಿಗೆ

ರಚನೆ : ಶ್ರೀ ವಿಜಯ ದಾಸರು

ಬಾರಯ್ಯ ಶ್ರೀನಿವಾಸ ಭಕ್ತರ ಬಳಿಗೆ ll ಪ ll

ತೋರಯ್ಯ ನಿನ್ನ ದಯ ತೋಯಜಾಂಬಕನೆ ll ಅ ಪ ll

ದುರುಳರ ತರಿವಂಥ ವರಚಕ್ರಧಾರಿ l

ಪರಮಾತ್ಮ ಪರಬೊಮ್ಮ ಪರರಿಗುಪಕಾರಿ ll 1 ll

ಅರಣ್ಯದಿ ಮೊರೆಯಿಟ್ಟ ಕರಿರಾಜಗೊಲಿದಿ l

ತರಳಪ್ರಹ್ಲಾದನ್ನ ವೈರಿಯ ಮುರಿದಿ ll 2 ll

ವರಶೇಷಗಿರಿಯಲ್ಲಿ ನಿರುತ ನೀನಿರುವಿ l

ಹರಿದಾಸರು ಕರೆದರೆ ಎಲ್ಲಿದ್ದರೂ ಬರುವಿ ll 3 ll

ಅನಂತನಾಮನೆ ನಿನ್ನ ಅನಂತಸದ್ಗುಣವ l

ನೆನವರಿಗೊಲಿವಂಥ ಪವಮಾನನೀಶಾ ll 4 ll

ಅಜಭವಾಧಿಪ ನೀನು ವಿಜಯಸಾರಥಿಯೆ l

ತ್ರಿಜಗವಂದಿತ ಈಶ ವಿಜಯವಿಟ್ಠಲನೆ ll 5 ll