ತಿರುವನಂತಪುರಂ: ಕೇರಳದ ಕೊಲ್ಲಂ ಜಿಲ್ಲೆಯ ಕುನ್ನಿಕೋಡ್ ಪ್ರದೇಶದ 7 ವರ್ಷದ ಬಾಲಕಿ ನಿಯಾ ಫೈಸಲ್, ಬೀದಿ ನಾಯಿ ಕಚ್ಚಿದ ಪರಿಣಾಮ ರೇಬೀಸ್ ಸೋಂಕಿಗೆ ಒಳಗಾಗಿ, ಲಸಿಕೆ ಪಡೆದರೂ ಚಿಕಿತ್ಸೆಗೆ ಸ್ಪಂದಿಸದೇ ಮೃತಪಟ್ಟಿರುವ ದಾರುಣ ಘಟನೆ ಬೆಳಕಿಗೆ ಬಂದಿದೆ. ಕಳೆದ ಒಂದು ತಿಂಗಳ ಅವಧಿಯಲ್ಲಿ ರೇಬೀಸ್ನಿಂದ ಮೃತಪಟ್ಟಿರುವ ಮೂರನೇ ಬಾಲಕಿ ಇವರಾಗಿದ್ದಾರೆ.
ಏಪ್ರಿಲ್ 8ರಂದು, ನಿಯಾ ತನ್ನ ಮನೆಯ ಅಂಗಳದಲ್ಲಿ ಆಟವಾಡುತ್ತಿದ್ದಾಗ, ಒಂದು ಬೀದಿ ನಾಯಿ ಅಂಗಳದಲ್ಲಿದ್ದ ಬಾತುಕೋಳಿಗೆ ದಾಳಿ ಮಾಡಲು ಮುಂದಾದದ್ದು ಕಂಡಳು. ಬಾತುಕೋಳಿಯನ್ನು ರಕ್ಷಿಸಲು ಮುಂದೆ ಹೋಗಿದಾಗ, ನಾಯಿ ನಿಯಾ ಕೈಗೆ ಕಚ್ಚಿತು. ಕೂಡಲೇ ತಂದೆ-ತಾಯಿ ಬಾಲಕಿಯನ್ನು ವಿಲಕ್ಕುಡಿ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ಕರೆದುಕೊಂಡು ಹೋಗಿ ಮೊದಲ ರೇಬೀಸ್ ಲಸಿಕೆ ಹಾಕಿಸಲಾಯಿತು.
ಎಪ್ರಿಲ್ 11 ಮತ್ತು 15 ರಂದು ಕ್ರಮವಾಗಿ ಎರಡನೇ ಮತ್ತು ಮೂರನೇ ಡೋಸ್ಗಳು ನೀಡಲ್ಪಟ್ಟವು. ಅಂತಿಮ ಡೋಸ್ ಮೇ 6ರಂದು ನೀಡಬೇಕಾಗಿತ್ತು. ಆದರೆ ಎರಡನೇ ಡೋಸ್ ಪಡೆದ ಕೆಲವೇ ದಿನಗಳಲ್ಲಿ ನಿಯಾ ಜ್ವರದಿಂದ ಬಳಲತೊಡಗಿದಳು ಹಾಗೂ ನಾಯಿ ಕಚ್ಚಿದ ಸ್ಥಳದಲ್ಲಿ ತೀವ್ರ ನೋವು ಉಂಟಾಯಿತು. ಅವರನ್ನು ಪ್ರಥಮವಾಗಿ ಪುನಲೂರು ತಾಲ್ಲೂಕು ಆಸ್ಪತ್ರೆಗೆ, ನಂತರ ಹೆಚ್ಚಿನ ಚಿಕಿತ್ಸೆಗಾಗಿ ಎಸ್ಎಟಿ ಆಸ್ಪತ್ರೆ, ತಿರುವನಂತಪುರಂಗೆ ಸ್ಥಳಾಂತರಿಸಲಾಯಿತು. ಆದರೆ ಆಕೆ ವೆಂಟಿಲೇಟರ್ ಮೇಲಿದ್ದಾಗಲೇ ಮರಣ ಹೊಂದಿದಳು.
ನಿಯಾ ಫೈಸಲ್ಗೆ ಕಚ್ಚಿದ ಬೀದಿ ನಾಯಿ ಮರುದಿನವೇ ಹತ್ತಿರದ ಹೊಲದಲ್ಲಿ ಶವವಾಗಿ ಪತ್ತೆಯಾಯಿತು. ಇದರಿಂದ ನಾಯಿ ರೇಬೀಸ್ ಸೋಂಕಿತವಾಗಿದ್ದ ಸಾಧ್ಯತೆಯನ್ನು ಇನ್ನಷ್ಟು ಬಲಪಡಿಸುತ್ತಿದೆ. ಆದರೂ ಆ ನಾಯಿಗೆ ರೇಬೀಸ್ ಇತ್ತೆಂದು ಪರೀಕ್ಷೆ ಮಾಡಲಾಗಲಿಲ್ಲ.
ಕಳೆದ ಒಂದು ತಿಂಗಳಲ್ಲಿಯೇ ಕೇರಳದಲ್ಲಿ ಮೂರು ಮಕ್ಕಳು ರೇಬೀಸ್ನಿಂದ ಮೃತಪಟ್ಟಿದ್ದಾರೆ ಎಂಬುದು ಚಿಂತನೀಯ ಸಂಗತಿ. ಇದು ರಾಜ್ಯದ ಆರೋಗ್ಯ ವ್ಯವಸ್ಥೆ, ಬೀದಿ ನಾಯಿಗಳ ನಿಯಂತ್ರಣ ಮತ್ತು ಸಾರ್ವಜನಿಕ ಅರಿವಿನ ಕೊರತೆಯ ಸಂಕೇತವಾಗಿದೆ.
