ಇಷ್ಟು ದಿನ ನಾವೆಲ್ಲ ಅಂದುಕೊಂಡಿದ್ದು ಏನೆಂದರೆ, ಅರಿಶಿನ ಒಂದು ಸಾಧಾರಣ ಮಸಾಲೆ ಪದಾರ್ಥ. ಇದನ್ನು ಅಡುಗೆಗೆ ಹಾಕಿದರೆ ಅಡುಗೆಯ ಬಣ್ಣ ಬದಲಾಗುತ್ತದೆ ಜೊತೆಗೆ ರುಚಿಯು ಕೂಡ. ಅರಿಶಿನದಲ್ಲಿ ಹಲವಾರು ಔಷಧೀಯ ಲಕ್ಷಣಗಳು ಇವೆ. ಇದರಿಂದ ಜ್ವರ, ಕೆಮ್ಮು, ನೆಗಡಿ ಬಂದಾಗ ಪರಿಹಾರ ಸಿಗುತ್ತದೆ ಎಂದು ತಿಳಿದುಕೊಂಡಿದ್ದೇವೆ. ಆದರೆ ಈ ದಿನ ನಿಮಗೊಂದು ಹೊಸ ರಹಸ್ಯ ಹೇಳಲು ಹೊರಟಿದ್ದೇವೆ. ಅದೇನೆಂದರೆ ಅರಿಶಿನದಿಂದ ನಿಮ್ಮ ಬಾಯಿಯ ಕರೆಗಟ್ಟಿದ ಹಲ್ಲುಗಳು ಬೆಳ್ಳಗಾಗುತ್ತವೆ. ಹೇಗಂತೀರಾ?
ಬಾಯಿಯ ಆರೋಗ್ಯದಲ್ಲಿ ಅರಿಶಿನದ ಪಾತ್ರ
ಅರಿಶಿನದಲ್ಲಿ ನಿಮಗೆಲ್ಲ ಗೊತ್ತಿರುವ ಹಾಗೆ ಆಂಟಿ ಮೈಕ್ರೋಬಿಯಲ್ ಗುಣ ಲಕ್ಷಣಗಳು ಸಾಕಷ್ಟಿವೆ. ಹಲ್ಲುಗಳು ಮತ್ತು ವಸಡುಗಳನ್ನು ಸ್ವಚ್ಛ ಮಾಡಿ ಬಾಯಲ್ಲಿನ ಕಲ್ಮಶಗಳನ್ನು ದೂರ ಮಾಡುವಲ್ಲಿ ಅರಿಶಿನದ ಪಾತ್ರ ತುಂಬಾ ದೊಡ್ಡದು.
ಅರಿಶಿನವನ್ನು ಹಲ್ಲುಗಳ ಸ್ವಚ್ಛತೆಗೆ ಮತ್ತು ಹಲ್ಲುಗಳನ್ನು ಬಿಳಿಯಾಗಿಸಲು ಬಳಸಿದರೆ ಅದು ಕೆಲಸ ಮಾಡುತ್ತದೆಯೇ ಅಥವಾ ಇಲ್ಲವೇ ಎಂಬ ಅನುಮಾನ ಸಾಕಷ್ಟು ಜನರಲ್ಲಿ ಇರುತ್ತದೆ. ಆದರೆ ಇದು ಕಲೆಗಳನ್ನು ಹೋಗಲಾಡಿಸುತ್ತದೆ ಎಂದು ಸಾಬೀತಾಗಿದೆ. ಇದರಲ್ಲಿ ನೈಸರ್ಗಿಕವಾದ ಆಂಟಿ ಇನ್ಫಾಮೇಟರಿ ಲಕ್ಷಣಗಳು ಇರುವುದರಿಂದ ಬಾಯಿಯ ಆರೋಗ್ಯ ರಕ್ಷಣೆಯಾಗುತ್ತದೆ.
ಈ ತಂತ್ರ ಹೊಸದೇನಲ್ಲ!
ಹಳ್ಳಿ ಪ್ರದೇಶಗಳಲ್ಲಿ ಹಿಂದಿನಿಂದಲೂ ಜನರು ಹಲ್ಲುಜ್ಜಲು ಬೇವಿನ ಕಡ್ಡಿ ಬಳಸುತ್ತಿದ್ದರು. ಅದೇ ರೀತಿ ಹಸಿಯಾದ ಅರಿಶಿನ ಕೊಂಬನ್ನು ಹಲ್ಲುಗಳಿಂದ ಜಗಿಯುತ್ತಿದ್ದರು ಎಂದು ತಿಳಿದು ಬಂದಿದೆ. ಆದರೆ ಇದನ್ನು ಎಲ್ಲರೂ ಮಾಡಲು ಸಾಧ್ಯ ಆಗುತ್ತದೆ ಎಂದು ಹೇಳಲು ಬರುವುದಿಲ್ಲ.
ಏಕೆಂದರೆ ಇದು ಸಾಕಷ್ಟು ಸಮಯ ಹಿಡಿಯುತ್ತದೆ ಮತ್ತು ಈಗಿನ ಕಾಲದ ಬಹುತೇಕ ಮಂದಿ ಇಂತಹ ತಂತ್ರಗಳನ್ನು ಮಾಡುವುದಿಲ್ಲ. ಅಷ್ಟೇ ಅಲ್ಲದೆ ಅರಿಶಿನ ಕೊಂಬನ್ನು ಪ್ರತಿ ಹಲ್ಲಿನಿಂದ ಜಗಿಯಬೇಕಾಗುತ್ತದೆ.
ಶುಂಠಿಗೂ ಅರಿಶಿನಕ್ಕೂ ಇದೆ ಸಂಬಂಧ!
ನಿಮಗೆ ಶುಂಠಿ ಗೊತ್ತಿರಬೇಕು. ಅದೇ ಜಾತಿಗೆ ಸೇರಿದ ಇನ್ನೊಂದು ಗಿಡಮೂಲಿಕೆ ಎಂದರೆ ಅದು ಅರಿಶಿನ ಕೊಂಬು. ಹೀಗಾಗಿ ಇದರಲ್ಲಿಯೂ ಸಹ ಸಾಕಷ್ಟು ಔಷಧೀಯ ಗುಣಗಳು ಅಡಗಿವೆ. ಇದರಿಂದ ರುಚಿ ಮತ್ತು ಬಳಸಿದ ಅಡುಗೆಯ ಬಣ್ಣ ಬದಲಾಗುವುದು ಮಾತ್ರವಲ್ಲದೆ ಜನರ ಆರೋಗ್ಯಕ್ಕೆ ಕೂಡ ತುಂಬಾ ಒಳ್ಳೆಯದು.
ಹಲ್ಲುಗಳನ್ನು ಬಿಳಿಯಾಗಿಸಲು ಅರಿಶಿನ ಬಳಸುವ ಬಗೆ ಹೇಗೆ?
ನೈಸರ್ಗಿಕವಾಗಿ ಅರಿಶಿನ ಒಂದು ಔಷಧೀಯ ಗಿಡಮೂಲಿಕೆ ಆಗಿದೆ. ಬಾಯಿಯ ಆರೋಗ್ಯದ ಜೊತೆಗೆ ಹೃದಯದ ಕಾಯಿಲೆಗಳು, ಕ್ಯಾನ್ಸರ್ ಮತ್ತು ಇನ್ನಿತರ ಮಾರಕ ತೊಂದರೆಗಳನ್ನು ನಿಯಂತ್ರಣ ಮಾಡುವ ಶಕ್ತಿ ಅರಿಶಿನದಲ್ಲಿ ಕಂಡು ಬರುತ್ತದೆ. ಇದರ ಜೊತೆಗೆ ಮೆದುಳಿನ ಭಾಗದಲ್ಲಿ ದೇಹದ ವಿವಿಧ ಬಗೆಯ ಸೋಂಕುಗಳ ವಿರುದ್ಧ ಹೋರಾಡುವ ಹಾರ್ಮೋನುಗಳನ್ನು ಉತ್ಪತ್ತಿ ಮಾಡುತ್ತದೆ.
ಈಗ ವಿಚಾರ ಎಂದರೆ ಹಲ್ಲುಗಳನ್ನು ಬಿಳಿಯಾಗಿಸಲು ಅರಿಶಿನವನ್ನು ಹೇಗೆ ಬಳಸುವುದು ಎಂದು. ಇದಕ್ಕಾಗಿ ನಿಮಗೆ ಸ್ವಲ್ಪ ಅಪ್ಪಟ ತೆಂಗಿನ ಎಣ್ಣೆಯ ಅವಶ್ಯಕತೆ ಇದೆ.
ತೆಂಗಿನ ಎಣ್ಣೆ ಜೊತೆ ಸೇರಿಸಿ
ನೀವು ಅರಿಶಿನವನ್ನು ತೆಂಗಿನ ಎಣ್ಣೆಯ ಜೊತೆಗೆ ಮಿಶ್ರಣ ಮಾಡಿ ಅದನ್ನು ಹಲ್ಲುಗಳ ಮೇಲೆ ಹಚ್ಚಿರಿ. ಸ್ವಲ್ಪ ಹೊತ್ತು ಹಾಗೇ ಬಿಡಬೇಕು. ಇದು ಬಾಯಿಯ ದುರ್ವಾಸನೆಯನ್ನು ಹೋಗಲಾಡಿಸುವುದು ಮಾತ್ರವಲ್ಲದೆ, ಬಾಯಿ ಒಣಗುವಿಕೆ ಸಮಸ್ಯೆಯನ್ನು ಸಹ ದೂರ ಮಾಡುತ್ತದೆ.
ಸ್ವಲ್ಪ ಹೊತ್ತು ಕಳೆದ ಅಂತರದಲ್ಲಿ ಉಗುರು ಬೆಚ್ಚಗಿನ ನೀರಿನಲ್ಲಿ ಬಾಯಿ ಮುಕ್ಕಳಿಸಿ ಉಗಿಯಬೇಕು. ಇದೇ ರೀತಿ ಕೆಲವು ದಿನಗಳವರೆಗೆ ಮಾಡಿದರೆ ಉತ್ತಮವಾದ ಬಾಯಿಯ ಆರೋಗ್ಯ ನಿಮ್ಮದಾಗುವುದರ ಜೊತೆಗೆ ಹಲ್ಲುಗಳ ಮೇಲಿನ ಕಲೆಗಳು ಮಾಯವಾಗುತ್ತವೆ.
ಇನ್ನೊಂದು ಪ್ರಕಾರದಲ್ಲಿ
ಇದಕ್ಕಿಂತ ಮಿಗಿಲಾಗಿ ನೀವು ಬಹಳ ಸುಲಭವಾಗಿ ಮಾಡಬಹುದಾದ ಇನ್ನೊಂದು ಪ್ರಯತ್ನವೆಂದರೆ, ಅರಿಶಿನ ಪುಡಿಯನ್ನು ಬೇಕಿಂಗ್ ಸೋಡಾ ಮತ್ತು ತೆಂಗಿನ ಎಣ್ಣೆ ಜೊತೆಗೆ ಮಿಶ್ರಣ ಮಾಡಿ ಅದನ್ನು ಹಲ್ಲುಗಳ ಮೇಲೆ ಹಚ್ಚಿರಿ.
ಇದು ಆರಂಭದಲ್ಲಿ ಸ್ವಲ್ಪ ಕಿರಿಕಿರಿ ಎನಿಸಿದರೂ ಕೂಡ ನಿರಂತರವಾದ ಬಳಕೆಯಿಂದ ಹಲ್ಲುಗಳ ಮೇಲಿನ ಕಲೆಗಳು ಮಾಯವಾಗುತ್ತವೆ. ಸಂಪೂರ್ಣವಾಗಿ ನಿಮ್ಮ ಎಲ್ಲಾ ಹಲ್ಲುಗಳು ಬಿಳಿ ಬಣ್ಣಕ್ಕೆ ತಿರುಗುತ್ತವೆ. ನೀವು ಬೇಕೆಂದರೆ ಹಲ್ಲುಜ್ಜಲು ಇಲ್ಲಿ ಟೂತ್ ಬ್ರಷ್ ಬಳಸಬಹುದು.
ಹೆಚ್ಚಿನ ಬಳಕೆ ಒಳ್ಳೆಯದಲ್ಲ
ಇದು ಒಂದು ನೈಸರ್ಗಿಕ ವಿಧಾನ. ಆದ್ದರಿಂದ ಇಲ್ಲಿ ಯಾವುದೇ ಅಡ್ಡಪರಿಣಾಮಗಳು ಎದುರಾಗುವುದಿಲ್ಲ. ಆದರೂ ಕೂಡ ಯಥೇಚ್ಛವಾಗಿ ಅರಿಶಿನವನ್ನು ಬಳಕೆ ಮಾಡುವ ಮೊದಲು ಒಮ್ಮೆ ನಿಮ್ಮ ವೈದ್ಯರನ್ನು ಸಂಪರ್ಕಿಸಿ ಸೂಕ್ತ ಮಾಹಿತಿ ಪಡೆದುಕೊಳ್ಳಿ.
