ಕನ್ನಡ ಚಿತ್ರರಂಗದ ಸ್ಫುರದ್ರೂಪಿ ನಟ ‘ನೆನಪಿರಲಿ’ ಪ್ರೇಮ್ ಹೊಸ ಸಿನಿಮಾವೊಂದನ್ನು ಒಪ್ಪಿಕೊಂಡಿದ್ದಾರೆ. ಅದಕ್ಕೆ ನಿರ್ದೇಶಕ ಕೀರ್ತಿ ಆ್ಯಕ್ಷನ್ ಕಟ್ ಹೇಳುತ್ತಿದ್ದಾರೆ. ಕೀರ್ತಿ ಈ ಹಿಂದೆ ವಿನಯ್ ರಾಜ್ಕುಮಾರ್ ನಾಯಕರಾಗಿರುವ ‘ಅಂದೊಂದಿತ್ತು ಕಾಲ’ ಎಂಬ ಸಿನಿಮಾವನ್ನು ನಿರ್ದೇಶನ ಮಾಡಿದ್ದಾರೆ. ಅದು ಸದ್ಯದಲ್ಲೆ ಬಿಡುಗಡೆಯಾಗಲಿದೆ.
‘ನನ್ನ ಮೊದಲ ಸಿನಿಮಾಗೂ ಇದಕ್ಕೂ ಸಾಕಷ್ಟು ವ್ಯತ್ಯಾಸವಿದೆ. ಮೊದಲನೆಯದ್ದು ಫೀಲ್ ಗುಡ್ ಸಿನಿಮಾವಾಗಿದ್ದು, ಇದು ಅದರ ತದ್ವಿರುದ್ಧ ಸಿನಿಮಾ. ಜತೆಗೆ ಪ್ರೇಮ್ ಅವರು ಇದುವರೆಗೂ ಕಾಣಿಸಿಕೊಂಡಿರದ ರೀತಿಯ ಪಾತ್ರವಿದು. ಇಡೀ ಸಿನಿಮಾ ಉತ್ತರ ಕರ್ನಾಟಕದಲ್ಲಿ ನಡೆಯುತ್ತದೆ. ಆ್ಯಕ್ಷನ್ ಸಿಕ್ಕಾಪಟ್ಟೆ ಇರುತ್ತದೆ. ಒಟ್ಟಾರೆಯಾಗಿ ಇದೊಂದು ರಾ ಸಿನಿಮಾ ಎನ್ನಬಹುದು’ ಎಂದು ಹೇಳಿದ್ದಾರೆ ನಿರ್ದೇಶಕ ಕೀರ್ತಿ.
60-80ರ ದಶಕದ ಕಥೆ
‘ಈ ಸಿನಿಮಾದ ಕಥೆ 1960ರಲ್ಲಿ ಆರಂಭವಾಗಿ, 80ರಲ್ಲಿ ಮುಗಿಯುತ್ತದೆ. ಅದಕ್ಕೆ ತಕ್ಕಂತೆ ತಯಾರಿ ಮಾಡಿಕೊಳ್ಳುತ್ತಿದ್ದೇವೆ. ಅಲ್ಲಿನ ಲೋಕಲ್ ನೇಟಿವಿಟಿಗೆ ತಕ್ಕಂತೆ ಎಲ್ಲವನ್ನು ವ್ಯವಸ್ಥಿತವಾಗಿ ಸಿದ್ಧಪಡಿಸಿಕೊಂಡಿದ್ದೇವೆ. ಸಿನಿಮಾದಲ್ಲಿ ಬಳಸುವ ಭಾಷೆ ಕೂಡ ಉತ್ತರ ಕರ್ನಾಟಕದ್ದೇ ಆಗಿರುತ್ತದೆ’ ಎಂದು ಮಾಹಿತಿ ನೀಡಿದ್ದಾರೆ ನಿರ್ದೇಶಕರು.
ರಾ ಲುಕ್ ನಲ್ಲಿ ಪ್ರೇಮ್
ಪ್ರೇಮ್ ಎಂದಾಕ್ಷಣ ಸಿಕ್ಕಾಪಟ್ಟೆ ಸ್ಮಾರ್ಟ್ ಲುಕ್, ಸೂಟ್, ನೀಟ್ ಶೇವ್ ಲುಕ್ ಕಣ್ಮುಂದೆ ಬರುತ್ತದೆ. ಆದರೆ ಈ ಚಿತ್ರದಲ್ಲಿ ಪ್ರೇಮ್ ಅವರು ಬೇರೆ ರೀತಿಯಲ್ಲಿ ಕಾಣಿಸುತ್ತಾರೆ. ಒಬ್ಬ ಹಳ್ಳಿಯ ಕೋಪಿಷ್ಠ ಯುವಕ ಹೇಗೆ ಕಾಣುತ್ತಾನೋ ಹಾಗೆ ಪ್ರೇಮ್ ಇರುತ್ತಾರೆ. ಗಡ್ಡ, ಅವರ ಕಾಸ್ಟ್ಯೂಮ್ ಎಲ್ಲವೂ ಹೊಸದಾಗಿರುತ್ತವೆ. ರಗಡ್ ಆಗಿ ಕಾಣಿಸುತ್ತಾರೆ ಎಂಬುದು ನಿರ್ದೇಶಕರು ಹೇಳುವ ಮಾತು. ‘ನಾನು ಇದುವರೆಗೂ ನಿರ್ವಹಿಸದೇ ಇರುವಂತಹ ಪಾತ್ರ ನನಗೆ ಈ ಚಿತ್ರದಲ್ಲಿಸಿಕ್ಕಿದೆ. ಸ್ಕ್ರಿಪ್ಟ್ ಕೊನೆಯ ಹಂತದಲ್ಲಿದ್ದು, ಸದ್ಯದಲ್ಲೆ ಉಳಿದ ವಿವರಗಳನ್ನು ನಾನೇ ನೀಡುತ್ತೇನೆ. ಒಳ್ಳೆಯ ತಂಡ ಸಿಕ್ಕಿದೆ’ ಎನ್ನುತ್ತಾರೆ ‘ನೆನಪಿರಲಿ’ ಪ್ರೇಮ್.
‘ಉತ್ತರ ಕರ್ನಾಟಕದಲ್ಲಿ ನಡೆದ ಹಲವು ನೈಜ ಘಟನೆಗಳಿಗೆ ಸಿನಿಮ್ಯಾಟಿಕ್ ಟಚ್ ಕೊಟ್ಟಿದ್ದೇವೆ. ಶರಣ್ ಅಲ್ಮೇಲು ಎಂಬ ಬರಹಗಾರ ನೀಡಿದ ಕಥೆ ಇದು. ಅವರು ತುಂಬಾ ಚೆನ್ನಾಗಿ ಕಥೆ ಮಾಡಿಕೊಂಡಿದ್ದಾರೆ. ಬಹಳ ಚೆನ್ನಾಗಿ ಬರೆಯುತ್ತಾರೆ. ಸಂತೋಷ್ ಮುಂದಿನಮನೆ ಎಂಬುವರು ಸಂಭಾಷಣೆ ಬರೆಯುತ್ತಿದ್ದಾರೆ. ಜೂನ್ ಕೊನೆ ವಾರದಲ್ಲಿ ಚಿತ್ರೀಕರಣ ಆರಂಭಿಸಲು ಪ್ಲಾನ್ ಮಾಡಿಕೊಂಡಿದ್ದೇವೆ. ಮಧುಚಂದನ್ ನಿರ್ಮಾಣದ ಜವಾಬ್ದಾರಿ ಹೊತ್ತಿದ್ದಾರೆ’ ಎಂದು ಮಾಹಿತಿ ನೀಡಿದ್ದಾರೆ ಕೀರ್ತಿ.
1960ರ ದಶಕವನ್ನು ಮರುಸೃಷ್ಟಿ ಮಾಡಲು ಉತ್ತರ ಕರ್ನಾಟಕದ ಹಳ್ಳಿಯೊಂದರ ಬಳಿ ಬೃಹತ್ ಸೆಟ್ ಹಾಕಲು ಚಿತ್ರತಂಡ ಪ್ಲಾನ್ ಮಾಡಿಕೊಂಡಿದೆ. ಸದ್ಯಕ್ಕೆ ಪ್ರೇಮ್ ಅವರನ್ನಷ್ಟೇ ಆಯ್ಕೆ ಮಾಡಿಕೊಂಡಿದ್ದು, ಮುಂದಿನ ದಿನಗಳಲ್ಲಿಉಳಿದ ಕಲಾವಿದರು ಮತ್ತು ತಂತ್ರಜ್ಞರ ತಂಡವನ್ನು ಅನೌನ್ಸ್ ಮಾಡುವುದಾಗಿ ಚಿತ್ರತಂಡ ಹೇಳಿದೆ. ‘ಉತ್ತರ ಕರ್ನಾಟಕದ ಹಳ್ಳಿಯೊಂದರಲ್ಲಿ ನಡೆಯುವಂತಹ ರಗಡ್ ಕಥೆ ಈ ಸಿನಿಮಾದಲ್ಲಿದೆ. ನನ್ನ ಎರಡನೇ ಸಿನಿಮಾಗೆ ಇಂತಹದ್ದೊಂದು ಅದ್ಭುತವಾದ ಕಥೆ ಸಿಕ್ಕಿದ್ದು ನನಗೆ ಖುಷಿ. ಅದಕ್ಕೆ ಮುಖ್ಯ ಕಾರಣ ಶರಣ್ ಅಲ್ಮೇಲ್ ಎಂಬ ಯುವಕ’ ಎನ್ನುತ್ತಾರೆ ಕೀರ್ತಿ.
