ಹೊಸದಿಲ್ಲಿ: ಏರ್ ಇಂಡಿಯಾ ವಿಮಾನ ಎಐ-171 ಅಪಘಾತಕ್ಕೆ ಸಂಬಂಧಿಸಿದ ಮಹತ್ವದ ಬೆಳವಣಿಗೆ ನಡೆದಿದೆ. ವಿಮಾನ ಅಪಘಾತದ ಸ್ಥಳದಿಂದ ಎರಡನೇ ಬ್ಲ್ಯಾಕ್ ಬಾಕ್ಸ್, ಅಂದರೆ ಕಾಕ್ಪಿಟ್ ವಾಯ್ಸ್ ರೆಕಾರ್ಡರ್ (ಸಿವಿಆರ್) ಪತ್ತೆಯಾಗಿದೆ ಎಂದು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರ ಪ್ರಧಾನ ಕಾರ್ಯದರ್ಶಿ ಪಿ.ಕೆ. ಮಿಶ್ರಾ ಅಧಿಕೃತ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಈ ಬ್ಲ್ಯಾಕ್ ಬಾಕ್ಸ್ನ ಪತ್ತೆಯಿಂದಾಗಿ ತನಿಖೆ ಹೆಚ್ಚಿನ ದಿಕ್ಕಿನಲ್ಲಿ ಸಾಗುವ ನಿರೀಕ್ಷೆಯಿದೆ. ಇದರಿಂದ ಅಪಘಾತಕ್ಕೆ ಕಾರಣವಾದ ನಿಖರ ಕಾರಣಗಳು ಹಾಗೂ ತಾಂತ್ರಿಕ ವೈಫಲ್ಯಗಳು ಅಥವಾ ಮಾನವ ದೋಷಗಳ ಬಗ್ಗೆ ಸ್ಪಷ್ಟತೆ ಸಿಗಬಹುದು.
ಕಾಕ್ಪಿಟ್ ವಾಯ್ಸ್ ರೆಕಾರ್ಡರ್ ಎಂಬುದು ವಿಮಾನದಲ್ಲಿ ಪೈಲಟ್ಗಳ ನಡುವಿನ ಸಂಭಾಷಣೆಗಳು, ವಿಮಾನದ ರೇಡಿಯೋ ಸಂಪರ್ಕ, ಎಚ್ಚರಿಕೆ ಸೌಲಭ್ಯಗಳು, ಅಲ್ಲದೆ ಆಗುವ ತಾಂತ್ರಿಕ ಶಬ್ದಗಳನ್ನೂ ರೆಕಾರ್ಡ್ ಮಾಡುತ್ತದೆ. ಅಪಘಾತಕ್ಕು ಮೊದಲು ಅಥವಾ ಆಗುವ ವೇಳೆ ಪೈಲಟ್ಗಳ ಪ್ರತಿಕ್ರಿಯೆ ಮತ್ತು ನಿರ್ಧಾರಗಳನ್ನು ಈ ಸಾಧನದಿಂದ ತಿಳಿದುಕೊಳ್ಳಲು ಸಾಧ್ಯವಾಗುತ್ತದೆ.
ಇದೀಗ ಎರಡನೇ ಬ್ಲ್ಯಾಕ್ ಬಾಕ್ಸ್ ಸಿಕ್ಕಿರುವುದರಿಂದ ಅಪಘಾತದ ಪೂರ್ವ ಮತ್ತು ನಂತರದ ದೃಶ್ಯಪಟಗಳ ಅನುಕ್ರಮ ಚೆನ್ನಾಗಿ ಬಿಡಿಸಲು ಸಾಧ್ಯವಾಗಲಿದ್ದು, ತನಿಖಾಧಿಕಾರಿಗಳಿಗೆ ಸಂಪೂರ್ಣ ಚಿತ್ರಣ ಸಿಗಲಿದೆ. ಇದು ಅಂತಾರಾಷ್ಟ್ರೀಯ ಮಾನದಂಡಗಳಿಗೆ ಅನುಗುಣವಾಗಿರುವ ಮಹತ್ವದ ಹಂತವಾಗಿದೆ.
