ಬೆಳಗಾವಿ: ನಗರದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಸೋಮವಾರ ರೋಡ್ ಶೋ ಮೂಲಕ ಸಂಚಲನ ಮೂಡಿಸಿದರು.
10.5 ಕಿ.ಮೀ ಉದ್ದದ ರೋಡ್ ಶೋನಲ್ಲಿ ರಸ್ತೆಯ ಇಕ್ಕೆಲಗಳಲ್ಲೂ ಜನ ಕಿಕ್ಕಿರಿದು ಸೇರಿದರು. ಯುವಕ, ಯುವತಿಯರು ರಸ್ತೆಯುದ್ದಕ್ಕೂ ಮೋದಿ ಅವರ ಕಾರಿನ ಮೇಲೆ ಪುಷ್ಪವೃಷ್ಟಿ ಮಾಡಿದರು. ಕಾರಿನ ಬಾಗಿಲು ತೆರೆದು ನಿಂತ ಪ್ರಧಾನಿ ಜನರತ್ತ ಕೈ ಬೀಸುತ್ತಲೇ ಸಾಗಿದರು. ಈ ದೃಶ್ಯವನ್ನು ಬಹುಪಾಲು ಜನ ವಿಡಿಯೊ ಚಿತ್ರೀಕರಿಸಿಕೊಂಡರು.
ಇತ್ತ ಮಾಲಿನಿ ಸಿಟಿಯಲ್ಲಿ ಹಾಕಿದ ವಿಶಾಲವಾದ ವೇದಿಕೆಯಲ್ಲಿ ಎಲ್.ಇ.ಡಿ ಪರದೆ ಮೇಲೆ ಮೋದಿ ಅವರ ರೋಡ್ ಶೋ ನೇರಪ್ರಸಾರ ಮಾಡಲಾಯಿತು.
ಬೃಹತ್ ಪರದೆ ಮೇಲೆ ಮೋದಿ ಕಾಣಿಸಿಕೊಳ್ಳುತ್ತಿದ್ದಂತೆಯೇ ಜನಸ್ತೋಮದಿಂದ ಹೋಯ್… ಎಂಬ ಉದ್ಘಾರ ಕೇಳಿಬಂತು. ಯುವಜನರು ಕುರ್ಚಿಗಳ ಮೇಲೆ ಎದ್ದುನಿಂತು ಹರ್ಷ ವ್ಯಕ್ತಪಡಿಸಿದರು.
ಸಿಳ್ಳೆ ಚಪ್ಪಾಳೆಗಳು ಮುಗಿಲು ಮುಟ್ಟಿದವು. ಮೋದಿ ಮೋದಿ ಎಂಬ ಕೂಗು ನಿರಂತರ ಕೇಳಿಬಂತು.
