ಬೆಂಗಳೂರು : ಮಂಗಳೂರು ಜಿಲ್ಲೆಯಲ್ಲಿ ಹತ್ಯೆಯಾದ ಹಿಂದೂ ಕಾರ್ಯಕರ್ತ ಸುಹಾಸ್ ಶೆಟ್ಟಿ ವಿರುದ್ಧ 2020 ರಲ್ಲೇ ರೌಡಿಶೀಟರ್ ತೆರೆಯಲಾಗಿದ್ದು, ಅದನ್ನು ತೆರೆಯಿಸಿದವರೇ ಬಿಜೆಪಿ ಸರ್ಕಾರ ಮತ್ತು ಗೃಹ ಸಚಿವರಾಗಿದ್ದ ಬಸವರಾಜ ಬೊಮ್ಮಾಯಿ ಎಂಬುದಾಗಿ ಸಚಿವ ದಿನೇಶ್ ಗುಂಡೂರಾವ್ ಆಕ್ಷೇಪಿಸಿದ್ದಾರೆ. ಈ ಕುರಿತು ಅವರು ಮಾಡಿರುವ ಹೇಳಿಕೆ ರಾಜಕೀಯ ವಲಯದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ.
“ಇಂದು ಸುಹಾಸ್ ಶೆಟ್ಟಿಯನ್ನು ಮಹಾತ್ಮನಂತೆ ಚಿತ್ರಿಸುತ್ತಿರುವ ಬಿಜೆಪಿಯವರು, ಆತನ ವಿರುದ್ಧ ರೌಡಿಶೀಟರ್ ಓಪನ್ ಮಾಡಿದ್ದು ಯಾಕೆ?” ಎಂಬ ಪ್ರಶ್ನೆ ಎತ್ತಿದ ಗುಂಡೂರಾವ್, “ಈ ದ್ವಂದ್ವ ನೀತಿ ಮತ್ತು ರಾಜಕೀಯ ನಾಟಕವಲ್ಲದೆ ಮತ್ತೇನು?” ಎಂದು ವಾಗ್ದಾಳಿ ನಡೆಸಿದರು.
ಪೊಲೀಸ್ ದಾಖಲೆ ಪ್ರಕಾರ, 2020 ರಲ್ಲಿ ಮಂಗಳೂರಿನಲ್ಲಿ ಬಿಜೆಪಿ ಸರ್ಕಾರ ಅಧಿಕಾರದಲ್ಲಿದ್ದ ವೇಳೆ ಸುಹಾಸ್ ಶೆಟ್ಟಿಯ ವಿರುದ್ಧ ಅಧಿಕೃತವಾಗಿ ರೌಡಿಶೀಟರ್ ತೆರೆಯಲಾಗಿತ್ತು. ಈ ವೇಳೆ ಗೃಹ ಸಚಿವರಾಗಿದ್ದವರು ಬಸವರಾಜ ಬೊಮ್ಮಾಯಿ. ಈ ಸತ್ಯದ ಆಧಾರವಾಗಿ, ಸಚಿವ ದಿನೇಶ್ ಗುಂಡೂರಾವ್ ಬಿಜೆಪಿ ನಾಯಕರು ಇಂದು ಸುಹಾಸ್ ಶೆಟ್ಟಿಯನ್ನು ಶಹೀದ್ ಅಥವಾ ಧರ್ಮಸಂರಕ್ಷಣೆಯ ಹುತಾತ್ಮನಂತೆ ಬಿಂಬಿಸುತ್ತಿರುವುದು ಏಕೆ ಎಂದು ಪ್ರಶ್ನಿಸಿದ್ದಾರೆ.
ಸುಹಾಸ್ ಹತ್ಯೆ ನಂತರ ಕೂಗುಮಾರಿಗಳಂತೆ ಅರಚುತ್ತಿರುವ ಬಿಜೆಪಿ ನಾಯಕರ ಯಾರ ಮಕ್ಕಳಾದರೂ ಧರ್ಮದ ಅಮಲಿನಲ್ಲಿ ಬೀದಿ ಕಾಳಗ ಮಾಡುತ್ತಿದ್ದಾರೆಯೆ.? ಅಥವಾ ಧರ್ಮಕ್ಕಾಗಿ ಬಡಿದಾಡುತ್ತಿದ್ದಾರೆಯೆ.? ಬಿಜೆಪಿ ನಾಯಕರ ಧರ್ಮಾಂಧತೆಗೆ ಬೀದಿ ಹೆಣವಾಗುತ್ತಿರುವುದು ಬಡವರ ಮಕ್ಕಳು. ಇದು ಸತ್ಯವಲ್ಲವೆ.? ಬಿಜೆಪಿಯವರ ಕೆಟ್ಟ ರಾಜಕೀಯಕ್ಕೆ ಕರಾವಳಿಯಲ್ಲಿ ಎಷ್ಟೋ ಜನರ ಬಲಿಯಾಗಿದೆ. ಎಷ್ಟೋ ಮನೆಗಳ ದೀಪ ಆರಿ ಹೋಗಿದೆ. ಇಷ್ಟಾದರೂ ಇವರ ರಕ್ತದಾಹ ನಿಂತಿಲ್ಲ. ಕರಾವಳಿಯಲ್ಲಿ ಇನ್ನಷ್ಟು ಹೆಣ ಬೀಳಬೇಕು ಎನ್ನುವ ಉದ್ದೇಶದಿಂದ ದುಷ್ಟ ರಾಜಕಾರಣ ಮಾಡುತ್ತಿದ್ದಾರೆ ಎಂದು ಹೇಳಿದ್ದಾರೆ.
“ಕ್ರಿಮಿನಲ್ಗಳನ್ನು ರಚಿಸಿ, ಅವರ ಮೇಲೆ ರೌಡಿಶೀಟ್ ತೆರೆಯುವುದು. ಬಳಿಕ ಅವರನ್ನು ರಾಜಕೀಯವಾಗಿ ಬಳಸಿಕೊಳ್ಳುವುದು ಬಿಜೆಪಿ ಚಳವಳಿಯ ತಂತ್ರವಾಗಿದೆ. ಹೆಣ ಬಿದ್ದ ಕೂಡಲೇ ಅವರನ್ನು ಮಹಾತ್ಮರೆಂದು ಬಿಂಬಿಸಿ ಸಾರ್ವಜನಿಕ ಭಾವನೆಗಳನ್ನು ಮುಡುಪಾಗಿಸಿಕೊಳ್ಳುತ್ತಾರೆ” ಎಂಬುದು ಸಚಿವರ ತೀಕ್ಷ್ಣ ಟೀಕೆ.
ಮತ್ತು ಇನ್ನು ಮುಂದಾಗಿ, ದಕ್ಷಿಣ ಕನ್ನಡದ ಜನತೆಯ ಜವಾಬ್ದಾರಿಯುತವಾಗಿ ವರ್ತಿಸುವಂತೆ ಕೇಳಿಕೊಂಡ ಸಚಿವರು, “ಇನ್ನಾದರೂ ಕರಾವಳಿಯ ಜನರು ಬಿಜೆಪಿಯ ಹುನ್ನಾರವನ್ನು ಅರಿಯಬೇಕು. ಇಲ್ಲದಿದ್ದರೆ ಈ ಕೆಟ್ಟ ರಾಜಕಾರಣದಿಂದ ಜಿಲ್ಲೆ ಶಾಂತಿಯುತ ವಾತಾವರಣವನ್ನೇ ಕಳೆದುಕೊಳ್ಳಲಿದೆ” ಎಂಬ ಎಚ್ಚರಿಕೆಯನ್ನು ನೀಡಿದ್ದಾರೆ.
