ಮೈಸೂರು: ಅನೇಕ ವರ್ಷಗಳ ನಿರೀಕ್ಷೆಯ ನಂತರ ಕೊನೆಗೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ತಂಡವು ತಮ್ಮ ಚೊಚ್ಚಲ ಐಪಿಎಲ್ ಟ್ರೋಫಿ ಗೆದ್ದಿದ್ದು, ಈ ಐತಿಹಾಸಿಕ ಗೆಲುವು ಮೈಸೂರು ನಗರದಲ್ಲೂ ಸಂಭ್ರಮದ ಮಳೆಯಾಗಿ ಹರಡಿದೆ. ಈ ಸಂಭ್ರಮದ ಭಾಗವಾಗಿ, ಮೈಸೂರಿನ ಇಂದಿರಾ ಕ್ಯಾಂಟೀನ್ನಲ್ಲಿ ಇಂದು ಉಚಿತವಾಗಿ ಹೋಳಿಗೆ ಊಟ ವಿತರಣೆ ಮಾಡಲಾಗುತ್ತಿದೆ.
2008ರಿಂದಲೇ ಐಪಿಎಲ್ನಲ್ಲಿ ಭಾಗವಹಿಸುತ್ತಿದ್ದರೂ, 17 ವರ್ಷಗಳ ಕಾಲ ಕಪ್ ಜಯಿಸದೆ ನಿರಾಶೆ ಅನುಭವಿಸುತ್ತಿದ್ದ ಆರ್ಸಿಬಿ, ಇದೀಗ 2025ರ ಐಪಿಎಲ್ ಆವೃತ್ತಿಯಲ್ಲಿ ಚೊಚ್ಚಲ ಕಿರೀಟವನ್ನು ಎತ್ತಿ ಹಿಡಿದಿದೆ. ಈ ಮೂಲಕ ಕೋಟಿ ಕೋಟಿ ಅಭಿಮಾನಿಗಳ ಕನಸು ಸಾಕಾರವಾಗಿದೆ. ಐಪಿಎಲ್ ಫೈನಲ್ನಲ್ಲಿ ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಪಂಜಾಬ್ ವಿರುದ್ಧ 6 ರನ್ಗಳ ರೋಚಕ ಜಯ ಸಾಧಿಸುವ ಮೂಲಕ ಈ ಸಾಧನೆ ಸಾಧ್ಯವಾಯಿತು.
ಆರ್ಸಿಬಿಯ ಈ ಗೆಲುವು ಕೇವಲ ಕ್ರಿಕೆಟ್ ಅಭಿಮಾನಿಗಳಷ್ಟೇ ಅಲ್ಲ, ಸಾಮಾನ್ಯ ಜನತೆಗೂ ಹೆಮ್ಮೆ ಮೂಡಿಸಿದ್ದು, ಅವರ ಆತ್ಮೀಯತೆಯ ಸೂಚನೆಯಾಗಿ ಇಂದು ಮೈಸೂರಿನ ಇಂದಿರಾ ಕ್ಯಾಂಟೀನ್ನಲ್ಲಿ ಉಚಿತ ಹೋಳಿಗೆ ಊಟ ನೀಡಲಾಗುತ್ತಿದೆ. ಕ್ಯಾಂಟೀನ್ ನಿರ್ವಹಣಾಧಿಕಾರಿಗಳು ಈ ನಿರ್ಧಾರವನ್ನು ತೆಗೆದುಕೊಂಡಿದ್ದು, “ಆರ್ಸಿಬಿ ಗೆಲುವು ನಮ್ಮ ಗೆಲುವು. ಈ ಸಂಭ್ರಮವನ್ನು ಸಾರ್ವಜನಿಕರೊಂದಿಗೆ ಹಂಚಿಕೊಳ್ಳುವುದು ನಮ್ಮ ಸಂತೋಷ” ಎಂದು ತಿಳಿಸಿದ್ದಾರೆ.
