ಬೀಟ್ರೂಟ್ ಸೇವನೆಯು ರಕ್ತಹೀನತೆಯನ್ನು ತಡೆಯುವುದು, ಹೃದಯದ ಆರೋಗ್ಯ ಕಾಪಾಡುವುದು, ಜೀರ್ಣಕ್ರಿಯೆ ಸುಧಾರಿಸುವುದು ಮುಂತಾದ ಅನೇಕ ಲಾಭಗಳನ್ನು ನೀಡುತ್ತದೆ. ಉದ್ದಿನ ಬೇಳೆಯಿಂದ ತಯಾರಿಸುವ ವಡೆಗಳು ಪ್ರೋಟೀನ್ ಮತ್ತು ಶಕ್ತಿಯನ್ನು ಒದಗಿಸುತ್ತವೆ. ಬೀಟ್ರೂಟ್ ವಡೆಗಳು ಆರೋಗ್ಯಕರವಾಗಿರುವುದರ ಜೊತೆಗೆ ತಿನ್ನಲು ಅತ್ಯಂತ ರುಚಿಕರ, ಚಹಾ ಸಮಯದಲ್ಲಿ ಸವಿಯಲು ಇದು ಒಳ್ಳೆಯ ಆಯ್ಕೆ. ಹಾಗಿದ್ರೆ ಹೇಗೆ ಮಾಡುವುದು ಎಂಬುದನ್ನು ತಿಳಿದುಕೊಳ್ಳೋಣ..
ಬೇಕಾಗುವ ಪದಾರ್ಥಗಳು : ಉದ್ದಿನ ಬೇಳೆ – 2 ಕಪ್, ತುರಿದ ಬೀಟ್ರೂಟ್ – 1, ಉಪ್ಪು – ರುಚಿಗೆ ತಕ್ಕಷ್ಟು, ಸಣ್ಣಗೆ ಹೆಚ್ಚಿದ ಹಸಿರು ಮೆಣಸು – 2, ಹೆಚ್ಚಿದ ಕೊತ್ತಂಬರಿ ಸೊಪ್ಪು – 2 ಚಮಚ, ಇಡ್ಲಿ ಸೋಡಾ – ಸ್ವಲ್ಪ, ಎಣ್ಣೆ – ಅಗತ್ಯಕ್ಕೆ ಕರಿಯೋಕ್ಕೆ..
ಮಾಡುವ ವಿಧಾನ :
ಮೊದಲು ಉದ್ದಿನ ಬೇಳೆಯನ್ನು 3-4 ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಡಿ. ನಂತರ ಅದನ್ನು ನೀರು ಹಾಕದೆ ಮಿಕ್ಸಿಯಲ್ಲಿ ಹಾಕಿ ಮೃದುವಾದ ಹಿಟ್ಟಿನಂತೆ ಮಾಡಿಕೊಳ್ಳಿ.
ಒಂದು ದೊಡ್ಡ ಪಾತ್ರೆಯಲ್ಲಿ ಈ ಉದ್ದಿನ ಬೇಳೆಯ ಹಿಟ್ಟಿಗೆ ನುಣ್ಣಗೆ ತುರಿದ ಬೀಟ್ರೂಟ್ ಸೇರಿಸಿ. ನಂತರ ಉಪ್ಪು, ಸಣ್ಣಗೆ ಹೆಚ್ಚಿದ ಹಸಿ ಮೆಣಸು ಹಾಗೂ ಕೊತ್ತಂಬರಿ ಸೊಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ.
ವಡೆಗಳನ್ನು ಹೆಚ್ಚು ಗರಿಗರಿಯಾಗಿಸಬೇಕಾದರೆ ಸ್ವಲ್ಪ ಇಡ್ಲಿ ಸೋಡಾ ಹಾಕಬಹುದು. ಒಂದು ಕಾದ ಬಾಣಲೆಯಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಿ.
ಎಣ್ಣೆ ಕಾದ ಬಳಿಕ ಹಿಟ್ಟಿನಿಂದ ಸಣ್ಣ ಸಣ್ಣ ಉಂಡೆಗಳಂತೆ ಮಾಡಿ, ಕೈಯಲ್ಲಿ ಒತ್ತಿ ವಡೆಗಳ ಆಕಾರ ನೀಡಿ. ಬಿಸಿ ಎಣ್ಣೆಯಲ್ಲಿ ಇವುಗಳನ್ನು ಹಾಕಿ, ಕಂದು ಬಣ್ಣ ಬರುವವರೆಗೆ ಎರಡೂ ಬದಿಗಳಿಂದ ಕರಿಯಿರಿ.
ಬಳಿಕ ಎಣ್ಣೆಯಿಂದ ವಡೆ ತೆಗೆದು ಪ್ಲೇಟ್ಗೆ ಹಾಕಿ ತೆಂಗಿನ ಕಾಯಿ ಚಟ್ನಿ ಅಥವಾ ಸಾಂಬಾರ್ ಜೊತೆಗೆ ಸವಿಯಲು ಚೆಂದ.
