ಗರಿಗರಿ ಸಬ್ಬಕ್ಕಿ ಹಪ್ಪಳ: ಒಂದು ತಿಂದರೆ, ಇನ್ನೊಂದು ತಿನ್ನುವಿರಿ ಪಕ್ಕಾ!

ನಮಗೆಲ್ಲಾ ಗೊತ್ತೇ ಇರುವ ಹಾಗೆ, ಮಕ್ಕಳಿಂದ ಹಿಡಿದು ವಯಸ್ಸಾದವರವರೆಗೂ, ಹಪ್ಪಳ ಅಂದರೆ ಇಷ್ಟವಾಗುತ್ತದೆ. ಅದು ಮಧ್ಯಾಹ್ನದ ಊಟವಾಗಲಿ ಅಥವಾ ರಾತ್ರಿಯ ಊಟವಾಗಲಿ, ಅನ್ನ, ತಿಳಿಸಾರು ಅಥವಾ ಸಾಂಬಾರು, ಉಪ್ಪಿನಕಾಯಿ, ಇದರ ಜೊತೆಗೆ ತಟ್ಟೆಯ ಪಕ್ಕದಲ್ಲಿ ಒಂದು ಹಪ್ಪಲವಿದ್ದರೆ, ಆಹಾ ಊಟದ ಮಜಾನೇ ಬೇರೆ!

ಅದರಲ್ಲೂ ಎಣ್ಣೆಯಲ್ಲಿ ಕರಿದ ಹಪ್ಪಳವನ್ನು ಹೆಚ್ಚಿನವರಿಗೆ ಅಚ್ಚುಮೆಚ್ಚು! ಮಕ್ಕಳಿಗಂತೂ ಒಂದು ಕೊಟ್ಟರೆ ಸಾಕಾಗಲ್ಲ, ತನಗೆ ಎರಡು ಹಪ್ಪಳ ಬೇಕು ಅಂತ ಹಟ ಮಾಡಲು ಶುರು ಮಾಡುತ್ತಾರೆ! ಇನ್ನು ಆರೋಗ್ಯದ ಕಡೆಗೆ ಸ್ವಲ್ಪ ಗಮನಿಸುವವರು ಎಣ್ಣೆಯಲ್ಲಿ ಕರಿಯುವ ಬದಲು ಹಪ್ಪಳವನ್ನು ಸುಟ್ಟು ತಿನ್ನುವರು. ಇವೆರಡೂ ತುಂಬಾ ರುಚಿಕರವಾಗಿಯೇ ಇರುವುದು.ಇನ್ನು ಹಪ್ಪಳವನ್ನು ವಿವಿಧ ರೀತಿಯ ಸಾಮಾಗ್ರಿಗಳನ್ನು ಬಳಸಿ ತಯಾರಿಸಲಾಗುತ್ತದೆ.

ಉದಾಹರಣೆಗೆ ಉದ್ದಿನಬೇಳೆ, ಅಕ್ಕಿ ಹಿಟ್ಟು ಇತ್ಯಾದಿಗಳಿಂದ ತಯಾರಿಸಿರುವ ಹಪ್ಪಳಕ್ಕೆ ಮಾರು ಕಟ್ಟೆಯಲ್ಲಿ ಎಲ್ಲಿಲ್ಲ ಬೇಡಿಕೆ! ಅದು ಏನೇ ಇರಲಿ, ಆದರೆ ಇಂದಿನ ನಮ್ಮ ರೆಸಿಪಿ ಲೇಖನದಲ್ಲಿ ಸಬ್ಬಕ್ಕಿ ಅಥವಾ ಸಾಬುದಾನ ಹಾಗೂ ಕಲ್ಲು ಉಪ್ಪಿನೊಂದಿಗೆ ತಯಾರಿಸ ಬಹುದಾದ ಸಬ್ಬಕ್ಕಿ ಹಪ್ಪಳದ ಬಗ್ಗೆ ನೋಡೋಣ..

ತುಂಬಾನೇ ಸರಳವಾಗಿ ಮಾಡಬಹುದಾದ ಈ ಹಪ್ಪಳಕ್ಕೆ ಹೆಚ್ಚಿನ ಸಾಮಾಗ್ರಿಗಳ ಅವಶ್ಯಕತೆ ಇರುವುದಿಲ್ಲ, ಕೇವಲ ಸೂರ್ಯನ ಬಿಸಿಲು ಸರಿಯಾಗಿ ಸಿಕ್ಕರೆ ಸಾಕು ಹಪ್ಪಳ ಗರಿಗರಿಯಾದ ಹಪ್ಪಳ ರೆಡಿಯಾಗುತ್ತದೆ!

(ಬಡಿಸುವ ಪ್ರಮಾಣ: 2)

ಪ್ರಮುಖ ಸಾಮಗ್ರಿ

• 1 ಕಪ್ ಸಾಬುದಾನ

ಮುಖ್ಯ ಅಡುಗೆಗೆ

• 4 ಕಪ್ ನೀರು

• 1 ಚಮಚ ಮೆಣಸಿನ ಬೀಜ/ಚಿಲ್ಲಿ ಫ್ಲೇಕ್ಸ್

• 1 ಚಮಚ ಕರಿಮೆಣಸು

• ಅಗತ್ಯ ತಕ್ಕಷ್ಟು ಉಪ್ಪು

Step 1:

ಮೊದಲಿಗೆ ಒಂದು ಪಾತ್ರೆಯಲ್ಲಿ ಒಂದು ಕಪ್ ಆಗುವಷ್ಟು ಸಬ್ಬಕ್ಕಿ ಅಥವಾ ಸಾಬುದಾನವನ್ನು 4-5 ಗಂಟೆಗಳ ಕಾಲ ನೆನೆಸಿಡಿ.

ಸಬ್ಬಕ್ಕಿ ಹಪ್ಪಳ ಮಾಡುವ ವಿಧಾನ

Step 2:

ಇನ್ನು ಈ ನೆನೆಸಿಟ್ಟ ಸಬ್ಬಕ್ಕಿಯನ್ನು ತಳ ಆಳವಿರುವ ಬಾಣಲೆಗೆ ಹಾಕಿಕೊಂಡು, ಇದಕ್ಕೆ 4 ಕಪ್ ನೀರು ಸೇರಿಸಿ ಮತ್ತು ಕುದಿಯಲು ಬಿಡಿ. ಆಮೇಲೆ ಇದಕ್ಕೆ ಮೊದಲೇ ತೆಗೆದಿಟ್ಟುಕೊಂಡ ಮೆಣಸಿನ ಕಾಯಿ ಪೇಸ್ಟ್, ಕರಿಮೆಣಸಿನ ಪುಡಿ ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು ಇವೆಲ್ಲಾವನ್ನು ಹಾಕಿ ಚೆನ್ನಾಗಿ ಚೆನ್ನಾಗಿ ಮಿಶ್ರಣ ಮಾಡಿಕೊಳ್ಳಿ.

Step 3:

ಸಾಬುದಾನ ಮೃದುವಾಗುವವರೆಗೆ, ಈ ಮಿಶ್ರಣವನ್ನು ಸುಮಾರು ಹತ್ತು ನಿಮಿಷಗಳವರೆಗೆ ಬೇಯಲು ಬಿಡಿ. ಮಧ್ಯದಲ್ಲಿ ಸ್ವಲ್ಪ ಕೈಯಾಡಿಸುತ್ತಾ ಇರಿ..ಕ್ರಮೇಣ ಈ ಮಿಶ್ರಣ ದಪ್ಪ ಆಗುತ್ತಾ ಬಂದ ಹಾಗೆ, ಗ್ಯಾಸ್ ಸ್ಟೌವ್ ಆಫ್ ಮಾಡಿ, ನಂತರ ಈ ಮಿಶ್ರಣವನ್ನು 10-15 ನಿಮಿಷಗಳ ಕಾಲ ತಣ್ಣಗಾಗಲು ಬಿಡಿ.

Step 4:

ಇನ್ನು ಒಂದು ದೊಡ್ಡದಾದ ಬಟ್ಟಲಿನಲ್ಲಿ ಪಾರ್ಚ್ಮೆಂಟ್ ಪೇಪರ್ ಅನ್ನು ಇರಿಸಿ, ಇದರ ಮೇಲೆ ಸಾಬುದಾನ ಹಪ್ಪಳದ ಮಿಶ್ರಣವನ್ನು, ಒಂದು ಚಮಚದ ಸಹಾಯದಿಂದ, ಸಣ್ಣ ಸಣ್ಣ ಹಪ್ಪಳದ ಆಕಾರದಲ್ಲಿ ಹಾಕುತ್ತಾ ಬನ್ನಿ

Step 5:

ಇನ್ನು ಈ ಹಪ್ಪಳವನ್ನು 2-3 ದಿನಗಳವರೆಗೆ ಬಿಸಿಲಿನಲ್ಲಿ ಒಣಗಿಸಿ, ಇದರಿಂದ ಹಪ್ಪಳವು ದೀರ್ಘ ಕಾಲದವರೆಗೆ ಗರಿಗರಿಯಾಗಿ, ಸಖತ್ ರುಚಿಯಾಗಿಯೂ ಕೂಡ ಇರುತ್ತದೆ

Step 6:

ಬಿಸಿಲಿನಲ್ಲಿ ಚೆನ್ನಾಗಿ ಒಣಗಿದ ಬಳಿಕ, ಎಣ್ಣೆಯಲ್ಲಿ ಕರಿಯಿರಿ, ಸಕತ್ ಟೇಸ್ಟ್ ಆಗಿರುತ್ತದೆ