ಬಾಯಿ ತೆರೆದ ಬಗೆಯೇನೊ ದೇವದೇವ
ತೋಯಜದಳ ನೇತ್ರನೆ
ನೀಯೆನಗಿದು ಪೇಳ ನಿಜವಾಗಿ ಲಕ್ಷ್ಮೀನಾ
ರಾಯಣ ನರಸಿಂಹನೆ ll ಪ ll
ಅಸುರನ ಉದರವ ಹಸನಾಗಿ ಬಗೆವಾಗ
ಬಾಯ ತೆರೆದೆಯಾ
ಬಿಸಜ ಭವಾಂಡವು ಬಸುರೊಳಗಿದ್ದ ಉ-
ಬ್ಬಸಿಗೆ ಬಾಯ ತೆರೆದಿಯೊ ll 1 ll
ಮಡದೀಯ ರೂಪಕ್ಕೆ ಮರುಳಾಗಿ ಅದರಿಂದ
ಬಿಡದೆ ಬಾಯ ತೆರೆದಿಯಾ
ದೃಢದಿ ಪ್ರಹ್ಲಾದನ ಒಡೆಯ ರಕ್ಷಿಸೊ
ನುಡಿಗೆ ಬಾಯ ತೆರೆದಿಯೊ ll 2 ll
ಗುರು ಸತ್ಯಬೋಧರಾಯರ ನಿತ್ಯಭಜನೆಗೆ
ಬರಿದೆ ಬಾಯ ತೆರೆದಿಯೊ
ವರ ಕದರುಂಡಲಗಿ ಹನುಮಯ್ಯನೊಡೆಯನೆ
ಕರವ ಮುಗಿವೆ ಕರುಣಿಸೊ ll 3 ll
