ಬಾಲಿವುಡ್ ಸ್ಟಾರ್ ರಣವೀರ್ ಸಿಂಗ್ ಅಭಿನಯದ ‘ಧುರಂಧರ್ 2’ ಸಿನಿಮಾ ಜಗತ್ತಿನಾದ್ಯಂತ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ಗಲ್ಲಾಪೆಟ್ಟಿಗೆಯಲ್ಲಿ ಭಾರಿ ಸದ್ದು ಮಾಡುತ್ತಿರುವ ಬಾಲಿವುಡ್ ಸಿನಿಮಾ, ರಿಲೀಸ್ ದಿನವೇ ಎಲ್ಲಾ ಬಾಕ್ಸಾಫೀಸ್ ರೆಕಾರ್ಡ್ಗಳನ್ನು ಮುರಿದಿದೆ.
ಮಾರ್ಚ್ 19ರ ಗುರುವಾರದಂದು ಧುರಂಧರ್ 2 ವಿಶ್ವಾದ್ಯಂತ ಅಭೂತಪೂರ್ವ ತೆರೆ ಕಂಡಿತು. ಮೊದಲ ದಿನವೇ ಭಾರತದಲ್ಲಿ 102.55 ಕೋಟಿ ಕ್ಲಬ್ ಸೇರಿದೆ. ಪ್ರೀಮಿಯರ್ ಶೋನಿಂದ ಬಂದ 43 ಕೋಟಿ ರೂ. ಸೇರಿಸಿದರೆ, ಚಿತ್ರದ ಒಟ್ಟು ದೇಶೀಯ ಗಳಿಕೆ 145.55 ಕೋಟಿ ರೂ. ಆಗಿದೆ. ಜಾಗತಿಕವಾಗಿ, ಈ ಚಿತ್ರವು 236.63 ಕೋಟಿ ರೂ. (ಅಂದಾಜಿನ ಪ್ರಕಾರ) ಗಳಿಸಿದ್ದು, ಭಾರತೀಯ ಸಿನಿಮಾ ಇತಿಹಾಸದಲ್ಲಿ ಅತಿ ದೊಡ್ಡ ಓಪನರ್ಗಳಲ್ಲಿ ತನ್ನ ಸ್ಥಾನವನ್ನು ಭದ್ರಪಡಿಸಿಕೊಂಡಿದೆ.
ಈ ಸಿನಿಮಾ ಅಧಿಕೃತ ಬಿಡುಗಡೆಗೂ ಮೊದಲೇ ದಾಖಲೆಯ ಓಟವನ್ನು ಪ್ರಾರಂಭಿಸಿತು. ಮಾರ್ಚ್ 18 ರಂದು ಸಂಜೆ 5 ಗಂಟೆಯ ನಂತರ ನಡೆದ ಪ್ರೀಮಿಯರ್ ಶೋನಲ್ಲಿ ಧುರಂಧರ್ 2 ಭಾರತದಲ್ಲಿ 12,700 ಕ್ಕೂ ಹೆಚ್ಚು ಪ್ರದರ್ಶನಗಳಿಂದ 43 ಕೋಟಿ ರೂ. ಗಳಿಸಿತು. ಇದು ಪೂರ್ವವೀಕ್ಷಣೆ ದಿನದ ಅತಿ ಹೆಚ್ಚು ಗಳಿಕೆ ಕಂಡ ಚಿತ್ರವಾಗಿದ್ದು, 25 ಕೋಟಿ ರೂ. ಗಳಿಸಿದ್ದ ಪವನ್ ಕಲ್ಯಾಣ್ ಅವರ ‘ದೆ ಕಾಲ್ ಹಿಮ್ ಒಜಿ’ ಚಿತ್ರವನ್ನು ಹಿಂದಿಕ್ಕಿದೆ.
ಮೊದಲ ದಿನ ಹಿಂದಿ ಭಾಷೆಯಲ್ಲೇ ಸಿನಿಮಾ 99.10 ಕೋಟಿ ರೂ. ಗಳಿಸಿದೆ. ಹಿಂದಿಯಲ್ಲಿ ಇದುವರೆಗೂ ರಿಲೀಸ್ ಆದ ದಿನವೇ ಅತಿಹೆಚ್ಚು ಗಳಿಕೆ ಮಾಡಿದ ಮೊದಲ ಸಿನಿಮಾವಾಗಿ ಹೊರಹೊಮ್ಮಿದೆ. ಭಾರತದ ಮೊದಲ ದಿನದ ಒಟ್ಟು ಗಳಿಕೆ 102.55 ಕೋಟಿ ರೂ.ಗಳಾಗಿದ್ದು, ಪ್ರಾದೇಶಿಕ ಪ್ರದರ್ಶನಗಳಲ್ಲಿನ ವಿಳಂಬದ ಹೊರತಾಗಿಯೂ ಹಿಂದಿ ಆವೃತ್ತಿಯು ಹೆಚ್ಚಿನ ಕೊಡುಗೆ ನೀಡಿದೆ. ಪುಷ್ಪ 2 ಹಿಂದಿಯಲ್ಲಿ ಮೊದಲ ದಿನವೇ 70.30 ಕೋಟಿ ರೂ. ಗಳಿಸಿತ್ತು.
ಮೊದಲ ದಿನದಂದು (ಪ್ರೀಮಿಯರ್ ಶೋ ಸೇರಿದಂತೆ) ವಿಶ್ವದಾದ್ಯಂತ 236.63 ಕೋಟಿ ರೂ. ಗಳಿಸಿರುವ ಧುರಂಧರ್ 2 ಜಾಗತಿಕವಾಗಿ ಅತಿ ಹೆಚ್ಚು ಹಣ ಕ್ಲಬ್ ಸೇರಿದ ಸಿನಿಮಾಗಳಲ್ಲಿ 2 ಸ್ಥಾನದಲ್ಲಿದೆ. 275.2 ಕೋಟಿ ರೂ. ಗಳಿಸಿದ ಪುಷ್ಪ 2 ಮೊದಲ ಸ್ಥಾನದಲ್ಲಿದೆ. 223 ಕೋಟಿ ರೂ. ಗಳಿಸಿದ್ದ ಎಸ್.ಎಸ್.ರಾಜಮೌಳಿ ಅವರ ಆರ್ಆರ್ಆರ್ ಅನ್ನು ಧುರಂಧರ್ 2 ಹಿಂದಿಕ್ಕಿದೆ.
