ಚಾಮರಾಜನಗರ(Chamarajanagara): ಜಿಲ್ಲೆಯ ಯಳಂದೂರು ತಾಲ್ಲೂಕಿನ ಬಿಳಿಗಿರಿರಂಗನ ಬೆಟ್ಟದಲ್ಲಿರುವ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯ ಆವರಣಕ್ಕೆ ಬುಧವಾರ ಮುಂಜಾನೆ ಸಲಗವೊಂದು ಪ್ರವೇಶಿಸಿದೆ.
ಶಾಲೆಯ ಹಿಂಭಾಗದ ಸೋಲಾರ್ ತಂತಿಯನ್ನು ಕಿತ್ತು ಒಳಗೆ ಪ್ರವೇಶಿ ಸಿರುವ ಆನೆ ಶಾಲೆಯ ಆವರಣದಲ್ಲಿ ಸುತ್ತಾಡಿದೆ. ಆನೆ ಒಳಗೆ ಪ್ರವೇಶಿಸಿರುವುದನ್ನು ಕಂಡ ವಿದ್ಯಾರ್ಥಿಗಳು ಮತ್ತು ಶಾಲಾ ಸಿಬ್ಬಂದಿ ಅರಣ್ಯ ಇಲಾಖೆಗೆ ಕರೆ ಮಾಡಿ ಮಾಹಿತಿ ನೀಡಿದ್ದಾರೆ,
ಅರಣ್ಯಾಧಿಕಾರಿ ವರುಣ್ ನೇತೃತ್ವದಲ್ಲಿ ಸಿಬ್ಬಂದಿಗಳು ಸ್ಥಳಕ್ಕೆ ಶೀಘ್ರವೇ ಭೇಟಿ ನೀಡಿ ಆನೆಯನ್ನು ವಸತಿ ಶಾಲೆಯ ಹೊರಭಾಗಕ್ಕೆ ಹಿಮ್ಮೆಟ್ಟಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಪ್ರತಿದಿನ ಆನೆ ವಸತಿ ಶಾಲೆಯ ಆವರಣದ ಗೇಟ್ ಬಳಿ ತಿರುಗಾಡುವುದು ಕಂಡುಬರುತ್ತಿತ್ತು. ಕೆಲವು ದಿನಗಳ ಹಿಂದೆ ಗೇಟ್ ಮುರಿದಿತ್ತು. ಆದರೆ ಬುಧವಾರ ನಸುಕಿನಲ್ಲಿ ಶಾಲಾ ಆವರಣದಲ್ಲಿ ಕಂಡುಬಂದಿರುವುದು ವಿದ್ಯಾರ್ಥಿಗಳ ಪೋಷಕರಿಗೆ ಆತಂಕವನ್ನು ಉಂಟುಮಾಡಿದೆ.
