ಮಡಿಕೇರಿ: ಮನೆಯೊಂದರ ಮೇಲೆ ದುಷ್ಕರ್ಮಿಗಳು ಗುಂಡಿನ ದಾಳಿ ನಡೆಸಿದ್ದು, ಘಟನೆ ಪೊನ್ನಂಪೇಟೆ ತಾಲೂಕಿನ ಬಲ್ಯ ಮುಂಡೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕೊಡಚೆ ಗ್ರಾಮದಲ್ಲಿ ನಡೆದಿದೆ.
ನಿವಾಸಿ ಮಾಚಿಮಾಡ ಡಿ.ಮಾಚಯ್ಯ ಎಂಬುವರ ಮನೆ ಮೇಲೆ ದುಷ್ಕರ್ಮಿಗಳು ಗುಂಡಿನ ದಾಳಿ ನಡೆಸಿದ್ದಾರೆ.
ಶುಕ್ರವಾರ ಮುಂಜಾನೆ 3.15 ಗಂಟೆಗೆ ಗುಂಡಿನ ದಾಳಿ ನಡೆಸಲಾಗಿದ್ದು, ಗಾಢ ನಿದ್ದೆಯಲ್ಲಿದ್ದ ಮನೆ ಮಂದಿ ಗುಂಡಿನ ಸದ್ದಿಗೆ ಬೆಚ್ಚಿ ಬಿದ್ದಿದ್ದಾರೆ. ಮನೆಯ ಬಲಬಾಗದ ಕಿಟಕಿಗೆ 2 ಗುಂಡುಗಳು ತಗುಲಿವೆ. ಗುಂಡಿನಿಂದ ಸಿಡಿಯಲ್ಪಟ್ಟ ಚಿಲ್ಲುಗಳು ಕಿಟಕಿಯ ಮರದ ಪಟ್ಟಿಗಳಿಗೆ ತಗುಲಿ, ಗಾಜುಗಳು ಒಡೆದಿದೆ. ಮಾತ್ರವಲ್ಲದೆ, ಬೆಡ್ರೂಮ್ ಗಳನ್ನ ಗೋಡೆಗಳಿಗೂ ಚಿಲ್ಲುಗಳು ತಗುಲಿವೆ. ದಾಳಿಯಲ್ಲಿ ಮನೆ ಮಂದಿ ಪ್ರಾಣಪಾಯದಿಂದ ಪಾರಾಗಿದ್ದಾರೆ.
ಒಂದು ವಾರದ ಹಿಂದೆ ಮನೆಯವರು ಇಲ್ಲದ ಸಮಯದಲ್ಲಿ ಆವರಣದಲ್ಲಿ ನಿಂತಿದ್ದ ಡಿ.ಮಾಚಯ್ಯ ಅವರ ಕಾರಿನ ಮೇಲೆ ಮೊಳೆ ಹೊಡೆದು, ಕಲ್ಲಿನಿಂದ ಜಜ್ಜಿ ಜಕಮ್ ಗೊಳಿಸಿ, ಸೀಟ್ ಮೇಲೆ ವಾಹನಗಳ ಆಯಿಲ್ ಸುರಿದು ನಷ್ಟ ಗೊಳಿಸಲಾಗಿತ್ತು.ಇದೀಗ ಮನೆಯ ಮೇಲೆ ಗುಂಡು ಹಾರಿಸಿ ಭಯದ ವಾತಾವರಣ ಸೃಷ್ಟಿಸಲಾಗಿದೆ.
ಮಾಹಿತಿ ಅರಿತ ಕುಟ್ಟ ವೃತ್ತ ನಿರೀಕ್ಷಕ ಮತ್ತು ಶ್ರೀಮಂಗಲ ಠಾಣಾಧಿಕಾರಿ ಹಾಗೂ ಸಿಬ್ಬಂದಿಗಳು ಭೇಟಿ ನೀಡಿ ಪರಿಶೀಲಿಸಿ ಮಹಾಜರು ನಡೆಸಿದ್ದಾರೆ.
ಈ ಘಟನೆ ಕುರಿತು ಶ್ರೀಮಂಗಳ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
