ಬೆಂಗಳೂರು: ದುಬೈನಿಂದ ಚಿನ್ನ ಕಳ್ಳಸಾಗಣೆ ಪ್ರಕರಣದಲ್ಲಿ ಜೈಲಿನಲ್ಲಿರುವ ಚಿತ್ರನಟಿ ರನ್ಯಾ ರಾವ್ ಅವರಿಗೆ ಸಂಕಷ್ಟ ತಪ್ಪಿದ್ದಲ್ಲ. ಇದೀಗ ಆದಾಯ ತೆರಿಗೆ ಇಲಾಖೆ ಅವರು ಚಿನ್ನ ಕಳ್ಳ ಸಾಗಣೆಯಿಂದ ಬಂದ ಆದಾಯ ಕುರಿತು ವಿಚಾರಣೆ ನಡೆಸಲು ನಿರ್ಧರಿಸಿದ್ದು, ಈ ಕುರಿತು ಆರ್ಥಿಕ ಅಪರಾಧಗಳ ವಿಶೇಷ ನ್ಯಾಯಾಲಯದಿಂದ ಅನುಮತಿ ಪಡೆದಿದೆ.
ಕೋರ್ಟ್ ಆದೇಶದ ಪ್ರಕಾರ, ಜೂನ್ 11 ರಿಂದ 13ರ ವರೆಗೆ, ಪ್ರತಿದಿನ ಬೆಳಗ್ಗೆ 10 ರಿಂದ ಸಂಜೆ 5 ಗಂಟೆಯವರೆಗೆ, ರನ್ಯಾ ರಾವ್ ಅವರನ್ನು ಜೈಲಿನಲ್ಲಿಯೇ ಐಟಿ ಅಧಿಕಾರಿಗಳು ವಿಚಾರಣೆ ಮಾಡಲಿದ್ದಾರೆ. ಈ ಕುರಿತು ರನ್ಯಾ ಪರ ವಕೀಲರು ನೀಡಿದ ತಡೆಯಾಜ್ಞೆ ಅರ್ಜಿಯನ್ನು ನ್ಯಾಯಾಲಯ ವಜಾಗೊಳಿಸಿದೆ.
ಮಾರ್ಚ್ 3, 2025ರಂದು ನಟಿ ರನ್ಯಾ ರಾವ್ ಅವರನ್ನು ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಬಂಧಿಸಲಾಗಿತ್ತು. ಅವಧಿಯಲ್ಲಿ ಅವರಿಂದ ಸುಮಾರು 14.2 ಕೆಜಿ ತೂಕದ ಚಿನ್ನ (ಅಂದಾಜು ಮೌಲ್ಯ ₹12.56 ಕೋಟಿ) ವಶಪಡಿಸಿಕೊಳ್ಳಲಾಯಿತು. ಕೇವಲ ಅಷ್ಟೇ ಅಲ್ಲ, ನಂತರದ ತನಿಖೆಯಲ್ಲಿ ರನ್ಯಾ ನಿವಾಸದಿಂದ ₹2.06 ಕೋಟಿ ಮೌಲ್ಯದ ಚಿನ್ನಾಭರಣ ಮತ್ತು ₹2.67 ಕೋಟಿ ನಗದುವನ್ನು ಅಧಿಕಾರಿಗಳು ಜಪ್ತಿ ಮಾಡಿದ್ದಾರೆ.
ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಾನೂನುಬದ್ಧ ನಗದು ಬಳಕೆಯ ಕುರಿತು ಐಟಿ ಇಲಾಖೆ ತನಿಖೆ ಆರಂಭಿಸಿದೆ. ಈ ಹಿನ್ನೆಲೆಯಲ್ಲಿ, ಐಟಿ ಇಲಾಖೆಯ ಸಹಾಯಕ ನಿರ್ದೇಶಕರು ಕಳೆದ ವಾರ ವಿಶೇಷ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿ, ರನ್ಯಾ ಅವರ ಹೇಳಿಕೆ ಪಡೆಯಲು ಜೈಲಿನಲ್ಲೇ ಅನುಮತಿ ಕೋರಿ ಅರ್ಜಿ ಸಲ್ಲಿಸಿದ್ದರು.
ರನ್ಯಾ ಪರ ವಕೀಲ ಬಿ.ಎಸ್. ಗಿರೀಶ್ ಅವರು, “ಕಸ್ಟಮ್ಸ್ ಕಾಯಿದೆ ಹಾಗೂ ಆದಾಯ ತೆರಿಗೆ ಕಾಯಿದೆ ಬೇರೆಬೇರೆ ವಿಷಯಗಳಿಗೆ ಸಂಬಂಧಪಟ್ಟಿವೆ. ಒಮ್ಮೆ ಅವರು ಕಸ್ಟಡಿಯಲ್ಲಿ ಇರುವಾಗ, ಅವರ ಮೇಲೆ ಪುನಃ ತನಿಖೆ ನಡೆಸುವುದು ಸಂವಿಧಾನದ ಆರ್ಥಿಕ ಹಕ್ಕುಗಳು ಮತ್ತು ಅಲ್ಲದೆ ಸಂವಿಧಾನದ 22 ನೇ ಕಾಯಿದೆಗೂ ವಿರುದ್ಧವಾಗಿದೆ” ಎಂದು ವಾದಿಸಿದರು. ಆದರೆ, ನ್ಯಾಯಾಲಯ ಈ ವಾದವನ್ನು ಪೂರ್ತಿಯಾಗಿ ತಳ್ಳಿಹಾಕಿ, ಐಟಿ ಇಲಾಖೆಯ ವಿಶೇಷ ಪಬ್ಲಿಕ್ ಪ್ರಾಸಿಕ್ಯೂಟರ್ರ ಮನವಿಗೆ ಅನುಮತಿ ನೀಡಿದೆ.
ಐಟಿ ಇಲಾಖೆಯ ವಾದ ಪ್ರಕಾರ, ದುಬೈನಿಂದ ಚಿನ್ನ ಕಳ್ಳ ಸಾಗಣೆ ಮಾಡಿದ ನಂತರ, ಅದನ್ನು ಬಳಸಿಕೊಂಡು ಭಾರಿ ಪ್ರಮಾಣದ ಹಣದ ಚಲಾವಣೆ ಮಾಡಲಾಗಿದೆ. ಹೀಗಾಗಿ ಈ ಹಣದ ಮೂಲದ ಬಗ್ಗೆ ಸ್ಪಷ್ಟತೆ ಪಡೆಯಲು ರನ್ಯಾ ವಿಚಾರಣೆ ಅಗತ್ಯವಾಗಿದೆ ಎಂದು ನ್ಯಾಯಾಲಯಕ್ಕೆ ವಾದಿಸಲಾಗಿದೆ.
