ಬಹುತೇಕರು ಸುಂದರವಾದ ಹೊಳೆಯುವ ತ್ವಚೆ ಪಡೆಯುಲು ಅನೇಕ ರೀತಿಯ ಸೌಂದರ್ಯ ವರ್ಧಕಗಳನ್ನು ಬಳಸುತ್ತಿರುತ್ತಾರೆ. ವಿಶಿಷ್ಟವಾದ ಯೋಗ ಭಂಗಿಗಳಿಂದ ಬಾಹ್ಯವಾಗಿ ಮಾತ್ರವಲ್ಲದೇ ಆಂತರಿಕವಾಗಿಯೂ ತ್ವಚೆಯನ್ನು ಹೊಳೆಯುವ ಹಾಗು ಕಾಂತಿಯುತವಾಗಿಸಬಹುದು. ಮುಖ್ಯವಾಗಿ, ಪ್ರಾಥಮಿಕ ಒತ್ತಡ ಮತ್ತು ಅನಾರೋಗ್ಯಕರವಾದ ಜೀವನಶೈಲಿ ಅಭ್ಯಾಸದಿಂದ ತ್ವಚೆಯ ಮೇಲೆ ಅಕಾಲಿಕ ಸುಕ್ಕುಗಳು ಆರಂಭವಾಗುತ್ತವೆ. ಮೊಡವೆ ಮತ್ತೊಂದು ಸಾಮಾನ್ಯ ಸಮಸ್ಯೆಯಾಗಿದೆ.
ಈ ಕೆಳಗಿನ ಯೋಗಾಸನಗಳನ್ನು ಅಭ್ಯಾಸ ಮಾಡುವುದರಿಂದ ತಲೆ ಮತ್ತು ಮುಖದ ಪ್ರದೇಶಕ್ಕೆ ರಕ್ತ ಪರಿಚಲನೆ ಹೆಚ್ಚುವುದಲ್ಲದೇ, ನೈಸರ್ಗಿಕವಾಗಿ ಚರ್ಮದ ಟೋನ್ ಸುಧಾರಿಸಲು ಸಹಾಯ ಮಾಡುತ್ತದೆ. ತಲೆಕೆಳಗಾದ ಯೋಗ ಭಂಗಿಗಳು ನಮ್ಮ ನರಮಂಡಲವನ್ನು ಉತ್ತೇಜಿಸುತ್ತದೆ. ಆರೋಗ್ಯಕರವಾದ ಹೊಳಪು ಮತ್ತು ಮೃದುವಾದ ಚರ್ಮವು ಪ್ರತಿಯೊಬ್ಬ ಮಹಿಳೆಯ ಕನಸು. ಹಾಗಾದರೆ ಇಲ್ಲಿದೆ ವಿಶಿಷ್ಟವಾದ ಯೋಗ ಭಂಗಿಗಳು.
೧. ಸರ್ವಾಂಗಾಸನ
ಈ ಯೋಗಾಸನವನ್ನು ಶೋಲ್ಡರ್ ಸ್ಟ್ಯಾಂಡ್ ಅಥವಾ ಭುಜದ ಸ್ಯ್ಟಾಂಡ್ ಎಂದೂ ಸಹ ಕರೆಯುತ್ತಾರೆ. ಹೊಳೆಯುವ ಚರ್ಮಕ್ಕಾಗಿ ಅತ್ಯಂತ ಪರಿಣಾಮಕಾರಿಯಾದ ಯೋಗ ಇದಾಗಿದೆ. ಈ ಯೋಗಾಸನ ಮಾಡುವುದರಿಂದ ನಿಮ್ಮ ಮುಖದ ಕಡೆಗೆ ರಕ್ತ ಪರಿಚಲನೆಯನ್ನು ಉತ್ತೇಚಿಸುವ ಮೂಲಕ ಚರ್ಮದ ರಚನೆ ಮತ್ತು ಗುಣಮಟ್ಟವನ್ನು ಸುಧಾರಿಸುತ್ತದೆ. ಈ ಆಸನವನ್ನು ದಿನಕ್ಕೆ ೩ ರಿಂದ ೫ ಬಾರಿ ಮಾಡುವುರಿಂದ ನಿಮ್ಮ ಚರ್ಮದ ಮೇಲಿರುವ ಮೊಡವೆಗಳು ಮತ್ತು ಸುಕ್ಕುಗಳಿಂದ ಪಾರಾಗಬಹುದು. ಆರೋಗ್ಯಕರವಾದ ತ್ವಚೆ ಪಡೆಯಲು ಈ ಆಸನವು ನಿಮಗೆ ಸಹಾಯ ಮಾಡುತ್ತದೆ.
೨. ಉತ್ತಾನಾಸನ
ಉತ್ತಾನಾಸನದಲ್ಲಿ ದೇಹವು ಮುಂದಕ್ಕೆ ಬಾಗುವ ಭಂಗಿಯಿಂದ ಮುಖಕ್ಕೆ ರಕ್ತದ ಹರಿವನ್ನು ಉತ್ತೇಜಿಸುತ್ತದೆ ಮತ್ತು ಆಕರ್ಷಕವಾದ ಹೊಳೆಯುವ ಚರ್ಮವನ್ನು ಪಡೆಯಲು ಸಹಾಯ ಮಾಡುತ್ತದೆ. ಸುಂದರವಾದ ಚರ್ಮವನ್ನು ಪಡೆಯಲು ಕ್ರಿಯಾತ್ಮಕವಾದ ಭಂಗಿಗಳಲ್ಲಿ ಈ ಆಸನವು ಕೂಡ ಒಂದಾಗಿದೆ. ಈ ಅದ್ಭುತವಾದ ಆಸನ ಮಾಡುವುದರಿಂದ ಚರ್ಮದ ಕೋಶಗಳಿಗೆ ಆಮ್ಲಜನಕದ ಪೂರೈಕೆಯನ್ನು ಹೆಚ್ಚಿಸಿ, ಸ್ವತಂತ್ರ ರಾಡಿಕಲ್ಗಳಿಂದ ಉಂಟಾಗುವ ಹಾನಿಯ ವಿರುದ್ಧ ಹೋರಾಡುತ್ತದೆ. ಯೌವನದಿಂದ ಕಂಗೊಳಿಸಲು ಈ ಯೋಗಾಸನವು ಚರ್ಮಕ್ಕೆ ಬೇಕಾದ ಪೋಷಕಾಂಶಗಳನ್ನು ಪೂರೈಸುತ್ತದೆ.
೩. ತ್ರಿಕೋನಾಸನ
ತ್ರಿಕೋನ ಭಂಗಿಯು ಅತ್ಯಂತ ಪ್ರಸಿದ್ಧವಾದ ಯೋಗ ಭಂಗಿಯಾಗಿದೆ. ಇದು ಚರ್ಮದ ಹೊಳಪನ್ನು ಹೆಚ್ಚಿಸುವುದಲ್ಲದೇ, ಶ್ವಾಸಕೋಶ, ಎದೆ ಮತ್ತು ಹೃದಯಕ್ಕೂ ಕೂಡ ಅತ್ಯಂತ ಪ್ರಯೋಜನಕಾರಿ ಭಂಗಿಯಾಗಿದೆ. ಈ ಅದ್ಭುತವಾದ ಯೋಗ ಮಾಡುವುದರಿಂದ ಚರ್ಮಕ್ಕೆ ಹೆಚ್ಚಿನ ಆಮ್ಲಜನಕವನ್ನು ಪೂರೈಸುತ್ತದೆ ಮತ್ತು ಇದರಿಂದಾಗಿ ಚರ್ಮವು ನಯವಾಗಿ ಕಂಗೊಳಿಸಲು ಸಹಾಯ ಮಾಡುತ್ತದೆ.
೪. ಭುಜಂಗಾಸನ
ಭುಜಂಗಾಸನವು ಕೂಡ ಸುಂದರವಾದ ಮೈಕಟ್ಟು ಹಾಗು ಸೌಂದರ್ಯಯುತವಾದ ಚರ್ಮವನ್ನು ಪಡೆಯಲು ಸಹಾಯಕಾರಿಯಾಗಿದೆ. ಈ ಆಸನವು ಒತ್ತಡ, ಆಯಾಸವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಸಾಮಾನ್ಯವಾಗಿ ಒತ್ತಡದಿಂದಲೇ ಚರ್ಮವು ಸುಕ್ಕುಗಟ್ಟುವುದು, ಕಳೆಗುಂದುವಂತಹ ಪರಿಣಾಮಗಳಿಗೆ ಕಾರಣವಾಗುತ್ತದೆ. ಇದು ವಿಶ್ರಾಂತಿ ಭಂಗಿಯಾಗಿದ್ದರೂ, ಚರ್ಮದ ಕೋಶಗಳಿಗೆ ಹೆಚ್ಚುವರಿ ಆಮ್ಲಜನಕವನ್ನು ಪೂರೈಸುವ ಮೂಲಕ ಚರ್ಮದ ಪುನರ್ ಯೌವನಗೊಳಿಸಲು ಸಹಾಯ ಮಾಡುತ್ತದೆ. ಹಾಗೆಯೇ ದೇಹದಲ್ಲಿ ಸಂಗ್ರಹವಾಗಿರುವ ಕೊಬ್ಬನ್ನು ಕೂಡ ಕರಗಿಸುತ್ತದೆ.
೫. ಉಷ್ಟ್ರಾಸನ
ಈ ಉಷ್ಟ್ರಾಸನ ಆಸನವನ್ನು ಒಂಟೆಯ ಭಂಗಿ ಎಂದೂ ಕರೆಯುತ್ತಾರೆ. ಇದು ಮುಖ್ಯವಾಗಿ ದೇಹದ ಮೇಲ್ಭಾಗದಲ್ಲಿ ರಕ್ತ ಪರಿಚಲನೆ ಉಂಟಾಗುತ್ತದೆ ಮತ್ತು ಹೆಚ್ಚು ಆಮ್ಲಜನಕದಿಂದ ಉಸಿರಾಡಲು, ಶ್ವಾಸಕೋಶದ ಸಾಮರ್ಥ್ಯವನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ. ಮುಖ್ಯವಾಗಿ ಈ ಯೋಗ ಭಂಗಿಯು ಒತ್ತಡವನ್ನು ಕಡಿಮೆ ಮಾಡುತ್ತದೆ. ತ್ವಚೆಯ ಮೇಲಿರುವ ಮೊಡವೆಗಳನ್ನು ಶಮನ ಮಾಡುತ್ತದೆ. ದೇಹದಲ್ಲಿನ ಹಾರ್ಮೋನುಗಳನ್ನು ಸಮತೋಲನದಲ್ಲಿಡಲು ಸಹಾಯ ಮಾಡುತ್ತದೆ. ತ್ವಚೆಯು ಹೊಳಪನ್ನು ಹೊಂದಿ ಕಂಗೊಳಿಸಲು ಪ್ರಾರಂಭವಾಗುತ್ತದೆ.
೬. ಪವನಮುಕ್ತಾಸನ
ಈ ಪರಿಣಾಮಕಾರಿ ಪವನಮುಕ್ತಾಸನವು ಹಲವಾರು ಚರ್ಮ ಹಾಗು ಆರೋಗ್ಯಕ್ಕೂ ಅತ್ಯುತ್ತಮವಾದ ಭಂಗಿಯಾಗಿದೆ. ಈ ಭಂಗಿಯಿಂದ ದೇಹದಲ್ಲಿ ಜೀರ್ಣಕ್ರಿಯೆ ಸುಧಾರಿಸಬಹುದಾಗಿದೆ. ಮುಖ್ಯವಾಗಿ ಮಲಬದ್ಧತೆಯನ್ನು ನಿವಾರಿಸುತ್ತದೆ. ಮುಖದ ಮೇಲೆ ಇರುವ ಮೊಡವೆಗಳನ್ನು ತೊಲಗಿಸಿ, ಕಾಂತಿಯುತ ಚರ್ಮವನ್ನು ಪಡೆಯಲು ಸಹಾಯ ಮಾಡುತ್ತದೆ.
