ನಿದ್ರಿಸುವಾಗ ಗೊರಕೆ ಹೊಡೆಯುವುದು ಬಹುತೇಕರ ಸಮಸ್ಯೆ. ವಿದೇಶದಲ್ಲಿ ಪತಿಯ ಗೊರಕೆ ಸದ್ದು ತಡೆಯಲಾರದೆ ಅನೇಕ ಮಹಿಳೆಯರು ವಿಚ್ಚೇದನ ನೀಡಿದ್ದಾರೆ ಎನ್ನುವ ವಿಷಯ ನಿಮಗೆ ಗೊತ್ತಿರಬಹುದು. ಗೊರಕೆ ಎನ್ನುವುದು ಅಷ್ಟು ಗಂಭೀರವಾದ ಸಮಸ್ಯೆ.
ಸಾಮಾನ್ಯವಾಗಿ ಮೂಗು ಕಟ್ಟಿದಾಗ, ಬಹಳ ಸುಸ್ತಾದಾಗ ಗೊರಕೆ ಹೊಡೆಯುತ್ತಾರೆ. ಆದರೆ, ಬಹಳಷ್ಟು ಮಂದಿಗೆ ಈ ಯಾವುದೇ ಸಮಸ್ಯೆ ಇಲ್ಲದಿದ್ದರೂ ಗೊರಕೆ ಹೊಡೆಯುತ್ತಾರೆ. ಗೊರಕೆ ನಿಲ್ಲಿಸಲು ಅನೇಕ ಮನೆ ಮದ್ದುಗಳೂ ಸಹ ಇವೆ. ಕೆಲವರು ಮಲಗುವ ಮುನ್ನ ಮೂಗಿಗೆ ಸ್ವಲ್ಪ ಕೊಬ್ಬರಿ ಎಣ್ಣೆಯನ್ನು ಹಾಕಿಕೊಂಡು ಮಲಗಿದರೆ ಗೊರಕೆ ನಿಲ್ಲುತ್ತದೆ ಎಂದು ಹೇಳುತ್ತಾರೆ. ಇನ್ನೂ ಕೆಲವರು ಎದೆ ಮೇಲೆ ಮಾಡಿ ಮಲಗುವುದಕ್ಕಿಂತ ಪಕ್ಕಕ್ಕೆ ಹೊರಳಿ ಮಲಗಿದರೆ ಗೊರಕೆ ಸದ್ದು ಬರುವುದಿಲ್ಲ ಎಂದು ಹೇಳುತ್ತಾರೆ.
ಇಷ್ಟೆಲ್ಲಾ ಮಾಡಿದರೂ ಗೊರಕೆ ಸದ್ದು ನಿಲ್ಲಿಸುವುದು ಅಸಾಧ್ಯ ಎನಿಸಿದರೆ ನೀವು ಯೋಗವು ಒಂದು ಪರಿಣಾಮಕಾರಿ ವಿಧಾನ. ಯೋಗದ ಮೂಲಕ ಗೊರಕೆ ಸದ್ದು ತಪ್ಪಿಸಬಹುದೇ ಎನ್ನುವ ನಿಮ್ಮ ಸಂದೇಹವನ್ನು ಪಕ್ಕಕ್ಕಿಡಿ. ಹೌದು ಯೋಗವು ಗೊರಕೆ ತಪ್ಪಿಸುವ ಒಂದು ಪರಿಣಾಮಕಾರಿ ಮಾರ್ಗ.
ಯೋಗ ಪಂಡಿತರ ಪ್ರಕಾರ ಉಸಿರಾಟಕ್ಕೆ ಸಂಬಂಧಿಸಿದ ಯೋಗಗಳನ್ನು ಮಾಡಿದರೆ ಅಂದರೆ ಪ್ರಾಣಾಯಾಮದಂತಹ ಯೋಗಗಳು ಗೊರಕೆಯನ್ನು ತಪ್ಪಿಸಲು ಸಹಾಯ ಮಾಡುತ್ತವೆ ಎಂದು ಹೇಳಲಾಗಿದೆ.
ಪ್ರಾಣಾಯಾಮ
ಪ್ರಾಣಾಯಾಮದಿಂದ ಗೊರಕೆಯ ಸಮಸ್ಯೆ ಅಷ್ಟೇ ಅಲ್ಲ ಉಸಿರಾಟದ ತೊಂದರೆಗೂ ಮುಕ್ತಿ ಸಿಗುತ್ತದೆ. ಹಾಗಾದರೆ ಪ್ರಾಣಾಯಾಮ ಮಾಡುವುದು ಹೇಗೆ ಎಂದು ತಿಳಿಯೋಣ.
ಸಮತಟ್ಟಾದ ನೆಲದ ಮೇಲೆ ಒಂದು ಜಮಖಾನ ಅಥವಾ ಯೋಗಾ ಮ್ಯಾಟ್ಅನ್ನು ಹಾಸಿ. ಪದ್ಮಾಸನದಲ್ಲಿ ಕುಳಿತುಕೊಳ್ಳಿ. ಈ ರೀತಿ ಯೋಗ ಮಾಡುವ ಮುನ್ನ ನಿಮ್ಮ ಸುತ್ತಲಿನ ಪ್ರದೇಶವು ಪ್ರಶಾಂತವಾಗಿ ಹಾಗೂ ಸ್ವಚ್ಛವಾಗಿ ಇದೆ ಹಾಗೂ ನಿಶ್ಯಬ್ದವಾಗಿದೆ ಎಂಬುದನ್ನು ಖಾತ್ರಿಪಡಿಸಿಕೊಳ್ಳಿ. ಏಕೆಂದರೆ ಯೋಗ ಮಾಡುವ ಸ್ಥಳವು ಅಚ್ಚುಕಟ್ಟಾಗಿ, ಸ್ವಚ್ಛವಾಗಿ ಇದ್ದರೆ ಉತ್ತಮ ಫಲಿತಾಂಶ ಸಿಗುತ್ತದೆ. ಜೊತೆಗೆ ಮಾನಸಿಕ ನೆಮ್ಮದಿಯೂ ಸಿಗುತ್ತದೆ.
ಈಗ ನಾಸಿಕ ಮುದ್ರೆಯನ್ನು ಕೈನಲ್ಲಿ ಹಿಡಿಯಿರಿ. ನಾಸಿಕ ಮುದ್ರೆ ಹಿಡಿಯುವುದು ಅಷ್ಟು ಕಷ್ಟದ ವಿಷಯವಲ್ಲ. ಮದಲು ನಿಮ್ಮ ಹೆಬ್ಬೆರಳು, ತೋರ್ಬೆರಳು ಹಾಗೂ ಕಿರು ಬೆರಳನ್ನು ಹೊರ ತೆಗೆದು ಮಧ್ಯದ ಬೆರಳು ಹಾಗೂ ಉಂಗುರದ ಬೆರಳನ್ನು ಮಡಚಿ.
ಈಗ ಹೆಬ್ಬೆರಳಿನಲ್ಲಿ ಮೂಗಿನ ಒಂದು ಹೊಳ್ಳೆಯನ್ನು ಮುಚ್ಚಿ ಮತ್ತೊಂದು ಹೊಳ್ಳೆಯಿಂದ ಉಸಿರನ್ನು ಜೋರಾಗಿ ಎಳೆದುಕೊಳ್ಳಿ. ಅದೇ ರೀತಿ ತೋರು ಬೆರಳಿನಲ್ಲಿ ಇನ್ನೊಂದು ಹೊಳ್ಳೆಯನ್ನು ಮುಚ್ಚಿಕೊಂಡು ಉಸಿರನ್ನು ಜೋರಾಗಿ ಎಳೆದುಕೊಂಡು ಮತ್ತೊಂದು ಹೊಳ್ಳೆಯಲ್ಲಿ ಬಿಡಿ. ಹೀಗೆ ಹತ್ತರಿಂದ ಇಪ್ಪತ್ತು ಬಾರಿ ಉಚ್ವಾಸ, ನಿಶ್ವಾಸವನ್ನು ಮಾಡುತ್ತಲೇ ಇರಿ. ಹೀಗೆ ಮಾಡುವುದರಿಂದ ಸ್ವಲ್ಪ ಹೊತ್ತು ನಿಮ್ಮ ಕಣ್ಣು ಕತ್ತಲೆಯಾದಂತೆ ಆಗಬಹುದು. ಕೆಲವರಿಗೆ ತಲೆ ಸುತ್ತಿದಂತೆ ಅನುಭವವಾಗಬಹುದು.
ಉಸಿರಾಟಕ್ಕೆ ಸಂಬಂಧಿಸಿದ ಯಾವುದೇ ಯೋಗವನ್ನು ಆರಂಭಿಸಿದ ಮೊದಲ ಕೆಲವು ದಿನಗಳಲ್ಲಿ ಈ ರೀತಿ ಅನುಭವವಾಗುತ್ತಲೇ ಇರುತ್ತದೆ. ಆದರೆ, ಆತಂಕ ಪಡುವ ಅಗತ್ಯತೆ ಇಲ್ಲ. ನೀವು ನಿರಾತಂಕವಾಗಿ ಪ್ರಾಣಾಯಾಮವನ್ನು ಮಾಡುತ್ತಲಿರಬಹುದು.
ಬ್ರಮರಿ
ಬ್ರಮರಿ ಎಂದರೆ ಸಂಸ್ಕೃತದಲ್ಲಿ ದುಂಬಿ ಎಂದು ಅರ್ಥ. ಈ ಯೋಗ ಮಾಡುವಾಗ ದುಂಬಿಯಂತೆ ಹೂಂಕಾರವನ್ನು ಹೊಮ್ಮಿಸುವುದು ಬಹು ಮುಖ್ಯ. ನಿಮಗೆ ಧ್ವನಿಯಲ್ಲಿ ಏನಾದರೂ ಸಮಸ್ಯೆ ಇದ್ದರೂ ಕೂಡ ಬ್ರಮರಿ ಮಾಡುವುದರಿಂದ ಸರಿಹೋಗುತ್ತದೆ ಎಂದು ಹೇಳಲಾಗುತ್ತದೆ. ಬ್ರಮರಿಯಿಂದ ನಿಮ್ಮ ಮಾನಸಿಕ ಆರೋಗ್ಯವೂ ಕೂಡ ಸರಿಯಾಗುತ್ತದೆ. ನೀವು ಒತ್ತಡವನ್ನು ಅನುಭವಿಸುತ್ತಿದ್ದರೆ ಅದರಿಂದ ಹೊರಬರಲು ಬ್ರಮರಿ ಕೂಡ ಒಂದು ಪರಿಣಾಮಕಾರಿ ವಿಧಾನವಾಗಿದೆ.
ಬ್ರಮರಿ ಯೋಗ ಮಡುವುದು ಹೇಗೆ?
ಬ್ರಮರಿ ಯೋಗವನ್ನು ಮಾಡುವು ಬಲು ಸುಲಭ. ಸಮತಟ್ಟಾದ ನೆಲದ ಮೇಲೆ ಒಂದು ಜಮಖಾನ ಅಥವಾ ಯೋಗಾ ಮ್ಯಾಟ್ಅನ್ನು ಹಾಸಿ. ಪದ್ಮಾಸನದಲ್ಲಿ ಕುಳಿತುಕೊಳ್ಳಿ. ನಿಮ್ಮ ಎರಡೂ ಕೈನ ಹೆಬ್ಬೆರಳುಗಳಿಂದ ಕಿವಿಯನ್ನು ಮುಚ್ಚಿಕೊಳ್ಳಿ.
ತೋರು ಬೆರಳಿನಿಂದ ನಿಮ್ಮ ಮೂಗಿನ ಎರಡೂ ಹೊಳ್ಳೆಗಳನ್ನು ಮುಚ್ಚಿಕೊಳ್ಳಿ. ನಿಮ್ಮ ಮಧ್ಯದ ಬೆರಳನ್ನು ಮೂಗಿನ ಕೆಳಗೆ ಇಟ್ಟುಕೊಳ್ಳಿ. ಉಂಗುರದ ಬೆರಳನ್ನು ನಿಮ್ಮ ಬಾಯಿಗೆ ಹಾಗೂ ಕಿರು ಬೆರಳನ್ನು ನಿಮ್ಮ ಗದ್ದದ ಕೆಳಗೆ ಬರುವಂತೆ ಇಟ್ಟುಕೊಳ್ಳಿ. ಈಗ ನಿಮ್ಮ ಮೂಗಿನಿಂದ ಹೂಂ.. ಎಂದು ಜೋರಾಗಿ ಕೂಗಬೇಕು. ಇದೇ ರೀತಿ ಕನಿಷ್ಠ ಹತ್ತು ನಿಮಿಷಗಳ ಕಾಲ ಮಾಡಿ. ಬ್ರಮರಿ ಮಾಡುವುದರಿಂದ ಕೆಲವು ನಿಮಿಷಗಳ ಕಾಲ ನಿಮ್ಮ ತಲೆಯಲ್ಲಿ ಜುಮ್ಮೆನ್ನುವ ಅನುಭವ ಆಗಬಹುದು. ಆದರೆ ಇದು ಸ್ವಲ್ಪ ಹೊತ್ತು ಮಾತ್ರ ಹಾಗೆ ಇರುತ್ತದೆ. ನಂತರ ಸರಿ ಹೋಗುತ್ತದೆ.
ಯಾವಾಗ ಈ ಆಸನಗಳನ್ನು ಮಾಡಬೇಕು
ಸಮಾನ್ಯವಾಗಿ ಪ್ರಾಣಾಯಾಮ ಮತ್ತು ಬ್ರಮರಿ ಯೋಗವನ್ನು ಬೆಳಗ್ಗೆ ಎದ್ದ ಕೂಡಲೆ ಮಾಡುವ ಅಭ್ಯಾಸವನ್ನು ಯೋಗ ಪಟುಗಳು ಹೊಂದಿರುತ್ತಾರೆ. ಆದರೆ ಗೊರಕೆ ಸಮಸ್ಯೆ ಇರುವವರು ಈ ಎರಡೂ ಆಸನಗಳನ್ನು ಮಲಗುವ ಮುನ್ನ ಮಾಡಿದರೆ ಉತ್ತಮ ಎಂದು ಯೋಗ ಪಂಡಿತರು ಹೇಳುತ್ತಾರೆ. ಸುಖವಾದ ನಿದ್ರೆಯಿಂದ ನಿಮ್ಮ ಮರುದಿನದ ಆರಂಭವು ಚೆನ್ನಾಗಿರುತ್ತದೆ ಎಂದು ಪರಿಗಣಿಸಲಾಗುತ್ತದೆ. ಹಾಗಾಗಿ ಗೊರಕೆ ರಹಿತ ನಿದ್ರೆಗೆ ಈ ಎರಡೂ ಆಸನಗಳನ್ನು ಪ್ರತಿದಿನ ಮಾಡುವ ಮೂಲಕ ನೀವು ನೆಮ್ಮದಿಯಾಗಿ ದಿನ ಕಳೆಯಬಹುದು.
