ಬೆಳಗಾವಿ (Belagavi): ಫೇಸ್‌ಬುಕ್‌ ಖಾತೆಗೆ ಯುವತಿಯ ಫೋಟೋ ಹಾಕಿ 20 ಲಕ್ಷ ರೂ. ಹಣ ಕಬಳಿಸಿದ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ. ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ.
ನಿಪ್ಪಾಣಿ ತಾಲ್ಲೂಕಿನ ನಾಯಿಂಗ್ಲಜ್‌ ಗ್ರಾಮದ ನಿವಾಸಿ ಮಹಾಂತೇಶ ಮೂಡಸೆ ಬಂಧಿತ ಆರೋಪಿ. ಬೆಳಗಾವಿ ಮೂಲದ, ಸದ್ಯ ದುಬೈನಲ್ಲಿ ವಾಸವಾಗಿರುವ ಯುವತಿಯ ಕೆಲವು ಫೋಟೊಗಳನ್ನು ಫೇಸ್‌ಬುಕ್‌ನಿಂದಲೇ ಡೌನ್‌ಲೋಡ್‌ ಮಾಡಿಕೊಂಡ ಆರೋಪಿ ಯುವತಿಯ ಹೆಸರಿನಲ್ಲಿ ಫೇಸ್‌ ಬುಕ್‌ ಖಾತೆ ತೆರೆದು ಅದರಿಂದ ಯುವಕರಿಗೆ, ವಯಸ್ಕರಿಗೆ ‘ಫ್ರೆಂಡ್‌ ರಿಕ್ವೆಸ್ಟ್‌’ ಕಳುಹಿಸುತ್ತಿದ್ದ. ಮಾತ್ರವಲ್ಲ ಮೆಸೆಂಜರ್‌ನಲ್ಲಿ ಸಂಪರ್ಕ ಸಂಖ್ಯೆಗಳನ್ನೂ ಕೇಳಿ ಪಡೆಯುತ್ತಿದ್ದ.
ಮೊಬೈಲ್‌ ಸಂಖ್ಯೆ ಪಡೆದು ಪ್ರತಿ ರಾತ್ರಿ ಚಾಟ್‌ ಮಾಡುತ್ತಿದ್ದ. ಮೊಬೈಲ್‌ ಡಿ.ಪಿ.ಯಲ್ಲೂ ಇದೇ ಯುವತಿಯ ಫೋಟೋ ಹಾಕುತ್ತಿದ್ದ. ಹೀಗೆ ಸಂಪರ್ಕಕ್ಕೆ ಬಂದವರಲ್ಲಿ ಕೆಲವು ದಿನಗಳ ಸಲುಗೆಯ ನಂತರ, ತನಗೆ ಆರ್ಥಿಕ ಸಂಕಷ್ಟವಿದೆ ಎಂದು ಹಣ ಕೇಳುತ್ತಿದ್ದ. ‘ಗೆಳತಿ’ ಕಷ್ಟಕ್ಕೆ ನೆರವಾಗುತ್ತಿದ್ದೇನೆ ಎಂದು ತಿಳಿದು ಹಲವರು ಫೋನ್‌ ಪೇ, ಗೂಗಲ್‌ ಪೇ ಮೂಲಕ ಕೂಡ ಹಣ ಹಾಕಿದ್ದರು.
ಕೆಲವೊಬ್ಬರು 1000 ರೂ. ನಿಂದ ಹಿಡಿದು 50 ರೂ. ಸಾವಿರವರೆಗೂ ಹಣ ಹಾಕಿದ್ದಾರೆ. ಹೀಗೆ ಆರೋಪಿ ಕಬಳಿಸಿದ ಹಣ ಬರೋಬ್ಬರಿ 19 ರೂ. ಲಕ್ಷ ದಾಟಿದೆ.
ಮೂರು ವರ್ಷಗಳ ಹಿಂದೆ ಫೇಸ್‌ ಬುಕ್‌ ಖಾತೆ ತೆರೆಯಲಾಗಿದೆ. ಈ ಫೇಸ್‌ಬುಕ್‌ನಲ್ಲಿ ಸ್ನೇಹಿತರಾದವರ ಸಂಖ್ಯೆ 5 ಸಾವಿರ ದಾಟಿದೆ. ಫೇಸ್‌ ಬುಕ್‌ ವೊಂದರಲ್ಲಿ ತನ್ನ ಫೋಟೊಗಳು ಇರುವುದು ಗೊತ್ತಾದ ಯುವತಿ ಜುಲೈ 4ರಂದು ದುಬೈನಿಂದ ಮರಳಿ ಬಂದು ಇಲ್ಲಿನ ಸೈಬರ್‌ ಅಪರಾಧ ವಿಭಾಗದ ಪೊಲೀಸರಿಗೆ ದೂರು ನೀಡಿದ್ದರು. ಪ್ರಕರಣ ಭೇದಿಸಿದ ಸಿಇಎನ್‌ (ಸೈಬರ್‌ ಎಕೊನಾಮಿಕ್‌ ಅಫೆನ್ಸಿಸ್‌ ಅಂಡ್‌ ನಾಕೊಟಿಕ್ಸ್‌) ಪೊಲೀಸರು ಕೆಲವೇ ದಿನಗಳಲ್ಲಿ ಯುವಕನನ್ನು ಬಂಧಿಸಿದ್ದಾರೆ.
ಸದ್ಯ ಬಂಧಿತನಾದ ಯುವಕ ಪಿಎಸ್‌ಐ ಆಗಲು ಸಿದ್ಧತೆ ನಡೆಸಿದ್ದ. ದೈಹಿಕ ಸಾಮರ್ಥ್ಯ ಪರೀಕ್ಷೆಯಲ್ಲೂ ಪಾಸಾಗಿದ್ದ. ಧಾರವಾಡದಲ್ಲಿ ಕೋಚಿಂಗ್‌ ಸೆಂಟರ್‌ವೊಂದರಲ್ಲಿ ತರಬೇತಿ ಪಡೆಯುತ್ತಿದ್ದ. ತನ್ನ ಖಾತೆಗೆ ಹಣ ಬಂದ ಮೇಲೆ ಗೋವಾ ಮತ್ತಿತರ ಸ್ಥಳಗಳಿಗೆ ತೆರಳಿ ದಿನಗಳನ್ನು ಕಳೆಯುತ್ತಿದ್ದ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ಹಣ ಹಾಕಿದವರು ಮರಳಿ ಕೇಳಿದರೆ ಅವರ ನಂಬರ್‌ ‘ಬ್ಲಾಕ್‌’ ಮಾಡುತ್ತಿದ್ದ. ತನ್ನ ನಂಬರ್‌ಗೆ ಯಾವುದೇ ಕರೆ ಬಂದರೂ ತೆಗೆಯುತ್ತಿರಲಿಲ್ಲ ಎಂದೂ ಮಾಹಿತಿ ನೀಡಿದ್ದಾರೆ.
