ಜಮ್ಮು-ಕಾಶ್ಮೀರ (Jammu-Kashmir): 2023ರ G20 ಶೃಂಗಸಭೆ ಜಮ್ಮು ಮತ್ತು ಕಾಶ್ಮೀರದಲ್ಲಿ ನಡೆಯಲಿದೆ. ಈ ಕುರಿತಂತೆ ಈಗಾಗಲೇ ಐವರು ಸದಸ್ಯರ ಸಹಕಾರ ಸಮಿತಿಯನ್ನು ರಚಿಸಲಾಗಿದೆ.
ಜಮ್ಮು ಮತ್ತು ಕಾಶ್ಮೀರಕ್ಕೆ ನೀಡಲಾಗಿದ್ದ ವಿಶೇಷ ಸ್ಥಾನಮಾನ ರದ್ಧತಿ ಬಳಿಕ ನಡೆಯುತ್ತಿರುವ ಮೊದಲ ಮತ್ತು ಅಂತಾರಾಷ್ಟ್ರೀಯ ಸಭೆ ಇದಾಗಿದ್ದು, ಉನ್ನತ ಮಟ್ಟದ ಸಮಿತಿ ರಚನೆ ಮತ್ತು ಸಿದ್ಧತೆ ನಡೆದಿದೆ.
ಮುಂದಿನ ವರ್ಷ G20 ಶೃಂಗಸಭೆ ನಡೆಸುವ ಕುರಿತು ಕೇಂದ್ರ ಸರ್ಕಾರ ಪ್ರಕಟಿಸಿದೆ. ಅಲ್ಲದೆ, ಸಂಬಂಧಿತ ಇಲಾಖೆಗಳ ಸಿದ್ಧತೆ ಆರಂಭವಾಗಿದೆ.
ಆಗಸ್ಟ್ 2019ರಲ್ಲಿ ಜಮ್ಮು ಮತ್ತು ಕಾಶ್ಮೀರವನ್ನು ವಿಭಜಿಸಿ, ಕೇಂದ್ರಾಡಳಿತ ಪ್ರದೇಶವನ್ನಾಗಿ ರಚನೆ ಮಾಡಲಾಗಿತ್ತು.
ಸಾರಿಗೆ, ಪ್ರವಾಸೋದ್ಯಮ, ಶಿಷ್ಟಾಚಾರ ಮತ್ತು ಅತಿಥಿಗಳ ನಿರ್ವಹಣೆ, ಸಂಸ್ಕೃತಿ ಸಚಿವಾಲಯ ಹೀಗೆ ವಿವಿಧ ಇಲಾಖೆಗಳ ಉನ್ನತ ಮಟ್ಟದ ಅಧಿಕಾರಿಗಳ ನೇತೃತ್ವದಲ್ಲಿ ಸಮಿತಿ ರಚಿಸಿ, ಜಮ್ಮು ಮತ್ತು ಕಾಶ್ಮೀರದಲ್ಲಿ G20 ಶೃಂಗಸಭೆ ನಡೆಸಲಾಗುವುದು ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಹೇಳಿದೆ.
