ಮನೆಯಂಗಳದಲ್ಲಿ ಹರಡಿಕೊಳ್ಳುವ ಪುಟ್ಟ ಮೂಲಿಕೆ ಒಂದೆಲಗ. ಇದರಿಂದ ಆರೋಗ್ಯಕ್ಕೆ ಸಾಕಷ್ಟು ಪ್ರಯೋಜನಗಳನ್ನು ಪಡೆಯಬಹುದು.
ಹಿತ್ತಲ ಗಿಡ ಮದ್ದಲ್ಲ ಎನ್ನುತ್ತಾರೆ. ಆದರೆ ಹಿತ್ತಲಿನಲ್ಲಿ ಇರುವ ಕೆಲವು ಅಪರೂಪದ ಮೂಲಿಕೆಗಳು ಆರೋಗ್ಯಕ್ಕೆ ಸಾಕಷ್ಟು ಪ್ರಯೋಜನಗಳನ್ನು ನೀಡುತ್ತವೆ. ಜೊತೆಗೆ ಅನಾರೋಗ್ಯಕ್ಕೆ ಮದ್ದಾಗುತ್ತವೆ. ಅವುಗಳನ್ನು ಹುಡುಕಿ ಗುಣ ತಿಳಿದುಕೊಳ್ಳಬೇಕಾಗಿರುವುದು ಮುಖ್ಯವಾಗಿರುತ್ತದೆ.
ಅಂತಹದ್ದೇ ಒಂದು ಪುಟ್ಟ ಸಸ್ಯ ಬ್ರಾಹ್ಮಿ ಅಥವಾ ಒಂದೆಲಗ. ಅರ್ಧ ವೃತ್ತಾಕಾರದ ಪುಟ್ಟ ಪುಟ್ಟ ಎಲೆಗಳನ್ನು ಹೊಂದಿರುವ ಈ ಒಂದೆಲಗ ಅನಾದಿ ಕಾಲದಿಂದಲೂ ಔಷಧೀಯ ಗುಣಗಳಿಂದ ಆಯುರ್ವೇದಲ್ಲಿ ಮಹತ್ವ ಪಡೆದುಕೊಂಡಿದೆ. ಹಾಗಾದರೆ ಈ ಒಂದೆಲಗದಿಂದ ಯಾವೆಲ್ಲಾ ಪ್ರಯೋಜನಗಳನ್ನು ಪಡೆಯಬಹುದು. ಇದರ ಗುಣವೇನು ಎನ್ನುವ ಬಗ್ಗೆ ಆಯುರ್ವೇದ ವೈದ್ಯರಾದ ಡಾ. ಶರದ್‌ ಕುಲಕರ್ಣಿ ಮಾಹಿತಿ ನೀಡಿದ್ದಾರೆ ಇಲ್ಲಿದೆ ನೋಡಿ.
ಒಂದೆಲಗ
ಸಂಸ್ಕೃತದಲ್ಲಿ ಬ್ರಾಹ್ಮಿ ಎಂದು ಕರೆಯುವ ಈ ಒಂದೆಲಗ ಸಾಮಾನ್ಯವಾಗಿ ಎಲ್ಲರ ಮನೆಯ ಹಿತ್ತಲಿನಲ್ಲೂ ಇರುತ್ತದೆ. ಪುಟ್ಟ ಪುಟ್ಟ ಎಲೆಗಳ ಬಳ್ಳಿಯಂತಿರುವ ಈ ಒಂದೆಲಗದ ಗುಣ ಮಾತ್ರ ಬೆಟ್ಟದಷ್ಟು. ಸುಲಭವಾಗಿ ಜೀರ್ಣವಾಗುವ ಈ ಮೂಲಿಕೆಯದ್ದು ಶೀತ ಗುಣ. ದೇಹದಲ್ಲಿ ಉಷ್ಣತೆ ಜಾಸ್ತಿಯಾಗಿದ್ದರೆ ಅಂತಹವರು ಈ ಒಂದೆಲಗದ ರಸವನ್ನು ಸೇವನೆ ಮಾಡಬಹುದು. ಆದರೆ ಇದರ ರಸ ಕಹಿ ಮತ್ತು ಒಗರಿನ ರುಚಿಯನ್ನು ಹೊಂದಿರುತ್ತದೆ. ವಾತ ಮತ್ತು ಪಿತ್ತ ದೋಷವನ್ನು ಸಮತೋಲದಲ್ಲಿಡುವ ನೆರವಾಗುತ್ತದೆ.
ನೆನಪಿನ ಶಕ್ತಿ ವೃದ್ದಿಗೆ ಬೆಸ್ಟ್‌
ನೈಸರ್ಗಿಕ ಮೂಲಿಕೆಯಾಗಿರುವ ಈ ಒಂದೆಲಗ ನೆನಪಿನ ಶಕ್ತಿಯನ್ನು ಹೆಚ್ಚಿಸಲು ಬಹಳ ಉಪಯುಕ್ತವಾಗಿದೆ. ಮೆದುಳಿನ ಕಾರ್ಯ ಚಟುವಟಿಕೆಯನ್ನು ಉತ್ತಮಗೊಳಿಸಿ ಏಕಾಗ್ರತೆಯನ್ನು ಹೆಚ್ಚಿಸುತ್ತದೆ ಜೊತೆಗೆ ಮೆದುಳಿನ ಆರೋಗ್ಯವನ್ನೂ ಕಾಪಾಡುತ್ತದೆ.
ಒಂದೆಲಗದಲ್ಲಿನ ಆಂಟಿ ಆಕ್ಸಿಡೆಂಟ್ಸ್‌ಗಳು ಸ್ವತಂತ್ರ ರಾಡಿಕಲ್ಸ್‌ಗಳನ್ನು ಹಾನಿಯಾಗದಂತೆ ತಡೆದು ನೆನಪಿನ ಶಕ್ತಿಯನ್ನು ವೃದ್ಧಿಸುತ್ತದೆ.
ಕಣ್ಣಿನ ಆರೋಗ್ಯ
ಒಂದಲಗದಲ್ಲಿನ ಆಂಟಿ ಆಕ್ಸಿಡೆಂಟ್‌ಗಳು ಕಣ್ಣಿನ ನರಗಳಿಗೆ ತುಂಬಾ ಒಳ್ಳೆಯದು. ಅಲ್ಲದೆ ಇಡೀ ದಿನ ಕಂಪ್ಯೂಟರ್‌ ಮೊಬೈಲ್‌ ನೋಡಿ ಕಣ್ಣು ಉರಿಯುತ್ತಿದ್ದರೆ ಒಂದೆಲಗದ ಜ್ಯೂಸ್‌ ಮಾಡಿ ಸೇವನೆ ಮಾಡಬಹುದು.
ಇದರಲ್ಲಿನ ಶೀತ ಗುಣ ದೇಹದ ಉಷ್ಣತೆಯನ್ನು ಕಡಿಮೆ ಮಾಡಿ ಸಮತೋಲನದಲ್ಲಿಡಲು ಸಹಾಯ ಮಾಡುತ್ತದೆ. ಇದರಿಂದ ಕಣ್ಣಿಗೂ ತಂಪನೆಯ ಅನುಭವ ಸಿಗುತ್ತದೆ.
ಆತಂಕ, ಒತ್ತಡ ಮುಕ್ತಿ
ಮಾನಸಿಕ ಸ್ಥಿಮಿತವನ್ನು ಕಾಪಾಡಿಕೊಳ್ಳಲು ಒಂದೆಲಗ ಸಹಾಯ ಮಾಡುತ್ತದೆ. ಮಾನಸಿಕವಾಗಿ ಆತಂಕ, ಒತ್ತಡಕ್ಕೆ ಒಳಗಾಗಿದ್ದರೆ ಪ್ರತಿದಿನ ಅರ್ಧ ಲೋಟ ಒಂದೆಲಗದ ಜ್ಯೂಸ್‌ ಸೇವನೆ ಮಾಡಿ. ಇದರಿಂದ ಮಾನಸಿಕ ಒತ್ತಡ, ಆತಂಕ, ತುಮಲಗಳಿಂದ ಹೊರಬರಬಹುದು. ಅಲ್ಲದೆ ಇದು ಒತ್ತಡದ ತಲೆನೋವು, ಆಯಾಸ, ಇದಕ್ಕಿದ್ದ ಹಾಗೆ ಆತಂಕವಾಗುವುದನ್ನೂ ತಡೆಯುತ್ತದೆ.
ನಿದ್ದೆಗೆ ಒಳ್ಳೆಯದು
ಕೆಲವರಿಗೆ ರಾತ್ರಿ ಎಷ್ಟು ಹೊತ್ತಾದರೂ ನಿದ್ದೆ ಬರುವುದಿಲ್ಲ. ಇನ್ನೂ ಕೆಲವರಿಗೆ ದೇಹಕ್ಕೆ ಆಲಸ್ಯ ಹಿಡಿದು ಕುಳಿತಲ್ಲೆಲ್ಲಾ ನಿದ್ದೆ ಬರುತ್ತದೆ. ಎರಡೂ ಸಮಸ್ಯೆಯನ್ನೂ ಒಂದೆಲಗ ನಿವಾರಿಸುತ್ತದೆ. ನೀವು ಒಂದೆಲಗದ ತಂಬುಳಿ, ಚಟ್ನಿಯನ್ನು ಮಾಡಿ ಸೇವಿಸಬಹುದು.
ಇದರಿಂದ ಇಡೀ ದಿನದ ತೂಕಡಿಸುವಿಕೆಯನ್ನು ತಡೆದು ರಾತ್ರಿ ಮಾತ್ರ ನಿದ್ದೆ ಬರುವಂತೆ ಮಾಡುತ್ತದೆ. ಅಲ್ಲದೆ ಆಯಾಸವನ್ನು ನಿವಾರಣೆ ಮಾಡಿ ಮಗುವಿನಂತೆ ಮಲಗಿ ನಿದ್ರಿಸಲು ಸಹಾಯ ಮಾಡುತ್ತದೆ.
ಕರ್ಣನಾದ ಅಥವಾ ಕಿವಿಯಲ್ಲಿ ಕೇಳಿಸುವ ಶಬ್ಧ
ಕೆಲವರಿಗೆ ಕಿವಿಯ ಒಳಗೆ ಗುಯ್‌ ಎನ್ನುವ ಶಬ್ದ ಕೇಳುತ್ತಿರುತ್ತದೆ. ಸಾಮಾನ್ಯವಾಗಿ ವಯಸ್ಸಾದವರಲ್ಲಿ ಹೆಚ್ಚು ಈ ಸಮಸ್ಯೆ ಕಾಡುತ್ತದೆ. ಇದನ್ನು ಟಿನ್ನಿಟಸ್ ಎಂದು ಕರೆಯುತ್ತಾರೆ. ಈ ಸಮಸ್ಯೆಗೆ ಒಂದೆಲಗ ಪರಿಹಾರ ನೀಡುತ್ತದೆ.
ಒಂದೆಲಗವನ್ನು ದಿನಕ್ಕೆ ಒಂದು ಬಾರಿಯಾದರೂ ಸೇವಿಸುವ ಅಭ್ಯಾಸ ಮಾಡಿಕೊಂಡರೆ ಈ ರೀತಿಯ ಕಿವಿಯ ಸಮಸ್ಯೆಯನ್ನು ನಿವಾರಿಸುತ್ತದೆ. ಅಲ್ಲದೆ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿಯಂತ್ರಿಸಿ ಮಧುಮೇಹಿಗಳನ್ನು ಆರೋಗ್ಯವಾಗಿರುವಂತೆ ಮಾಡುತ್ತದೆ.
ಚರ್ಮ ಮತ್ತು ಕೂದಲಿಗೆ ಒಳ್ಳೆಯದು
ಒಂದೆಲಗ ಕೇವಲ ಆಂತರಿಕ ಆರೋಗ್ಯಕ್ಕೆ ಮಾತ್ರವಲ್ಲ ಚರ್ಮ ಮತ್ತು ಕೂದಲಿನ ಆರೋಗ್ಯವನ್ನು ಕಾಪಾಡಲು ಸಹಾಯ ಮಾಡುತ್ತದೆ. ನೀವು ಒಂದೆಲಗದ ಫೇಸ್‌ ಪ್ಯಾಕ್‌ ಮತ್ತು ಹೇರ್‌ ಪ್ಯಾಕ್‌ಗಳನ್ನು ಹಾಕಿಕೊಳ್ಳಬಹುದು.
ಚರ್ಮದ ಮೇಲಿನ ಮೊಡವೆ, ತುರಿಕೆ, ಚರ್ಮಕಪ್ಪಾದುದನ್ನೂ ಕೂಡ ಸರಿಪಡಿಸುತ್ತದೆ. ಅದರ ಜೊತೆಗೆ ಸೀಳುಕೂದಲು, ತಲೆಹೊಟ್ಟಿನ ಸಮಸ್ಯೆಯನ್ನೂ ನಿವಾರಣೆ ಮಾಡುತ್ತದೆ. ಒಂದೆಲಗವನ್ನು ತಲೆಗೆ ಹಾಕುವುದರಿಂದ ದೇಹದಲ್ಲಿನ ಉಷ್ಣತೆಯೂ ಕಡಿಮೆಯಾಗುತ್ತದೆ.
ಅಧಿಕ ರಕ್ತದೊತ್ತಡವಿದ್ದವರಿಗೆ…
ಹೈಪರ್‌ ಟೆನ್ಷನ್‌ ಅಥವಾ ಅಧಿಕ ರಕ್ತದೊತ್ತಡ ಇದ್ದವರಿಗೂ ಕೂಡ ಒಂದೆಲಗ ಬೆಸ್ಟ್‌ ಮದ್ದಾಗಿದೆ.
ದೇಹದಲ್ಲಿನ ಆತಂಕವನ್ನು ಕಡಿಮೆ ಮಾಡುವ ಮೂಲಕ ದೇಹದಲ್ಲಿ ರಕ್ತದ ಹರಿವನ್ನು ಸುಧಾರಿಸುತ್ತದೆ. ಹೀಗಾಗಿ ರಕ್ತದೊತ್ತಡ ಅಥವಾ ಬಿಪಿ ಸಮಸ್ಯೆ ಇದ್ದವರೂ ಒಂದೆಲಗವನ್ನು ಆಹಾರದಲ್ಲಿ ಬಳಕೆ ಮಾಡುವುದು ಒಳ್ಳೆಯದು.
