ಮೈಸೂರು (Mysuru): ಡೇಟಿಂಗ್ಗೆ ಹುಡುಗಿಯರು ಸಿಗುತ್ತಾರೆ ಎಂದು ಜಾಹೀರಾತು ನೀಡಿ ವಂಚಿಸುತ್ತಿದ್ದ ಆರೋಪಿಯನ್ನು ನಗರದ ಸೈಬರ್ ಕ್ರೈಂ ಪೊಲೀಸರು ಬಂಧಿಸಿದ್ದಾರೆ.
ಆರೋಪಿಯು ಲೋಕ್ಯಾಂಟೋ ಎಂಬ ಡೇಟಿಂಗ್ ಆ್ಯಪ್ ಮೂಲಕ ಯುವತಿಯರ ಫೋಟೋಗಳನ್ನು ಹಾಕಿ ಡೇಟಿಂಗ್ಗೆ ಹುಡುಗಿಯರು ಸಿಗುತ್ತಾರೆ ಎಂದು ಜಾಹೀರಾತು ನೀಡುತ್ತಿದ್ದ.
ಸಿಂಗಲ್ ಕಾಲೇಜು ಹುಡುಗಿಯರು ಸಿಗುತ್ತಾರೆ. ನಗ್ನ ವಿಡಿಯೋ ಕಾಲ್ ಸರ್ವಿಸ್ ಇದೆ. ಹುಡುಗಿಯರೇ ನೇರವಾಗಿ ನಿಮ್ಮನ್ನು ಭೇಟಿ ಮಾಡುತ್ತಾರೆ ಎಂದೆಲ್ಲಾ ಹೇಳಿ ಸುಮಾರು 80 ರಿಂದ 100 ಜನರ ಬಳಿ 8 ಲಕ್ಷಕ್ಕೂ ಅಧಿಕ ಹಣ ವಂಚಿಸಿದ್ದಾನೆ.
ಈತ ತಾನು ಸರ್ವಿಸ್ ನೀಡುವ ಮೊದಲು ಶೇ.50 ಹಣ ಪಾವತಿಸಬೇಕು ಎಂದು ನಿರ್ಬಂಧ ವಿಧಿಸುತ್ತಿದ್ದನಂತೆ. ಯುವತಿಯರ ಫೋಟೋ ನೋಡಿ ಕಾಮದಾಸೆಗೆ ಅದೆಷ್ಟೋ ಜನರು 50 ಪರ್ಸೆಂಟ್ ಹಣವನ್ನು ಫೋನ್ ಪೇ, ಗೂಗಲ್ ಪೇ ಹಾಗೂ ಆನ್ಲೈನ್ ಪೇಮೆಂಟ್ ಪಾವತಿಸುತ್ತಿದ್ದರು. ಆರೋಪಿ ಹಣ ಬಂದ ಮೇಲೆ ಫೋನ್ ರಿಸೀವ್ ಮಾಡುತ್ತಿರಲಿಲ್ಲ.
ಈ ಬಗ್ಗೆ ಬಂದ ದೂರಿನ ಆಧಾರದ ಮೇಲೆ ಕೂಡಲೇ ಕಾರ್ಯಪ್ರವೃತ್ತರಾದ ಸೈಬರ್ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ. ಆತನಿಂದ ಲ್ಯಾಪ್ಟಾಪ್, 4 ಮೊಬೈಲ್ ವಶಪಡಿಸಿಕೊಂಡಿದ್ದು ತನಿಖೆ ಚುರುಕುಗೊಳಿಸಿದ್ದಾರೆ. ಪೊಲೀಸರು ಆರೋಪಿಯ ಹೆಸರು ಬಹಿರಂಗಪಡಿಸಿಲ್ಲ.