ಪಾಂಡಿಚೇರಿ ಅಥವಾ ಪುದುಚೇರಿ ಗೋವಾದಂತೆ ಹೆಚ್ಚು ಜನಪ್ರಿಯವಾಗಿರುವ ಪಟ್ಟಣ. ಸ್ನೇಹಿತರೊಂದಿಗೆ ಮೋಜು-ಮಸ್ತಿ ಮಾಡಲು, ಏಕಾಂಗಿಯಾಗಿ ಪ್ರವಾಸ ಮಾಡಲು ಪಾಂಡಿಚೇರಿ ಯೋಗ್ಯವಾಗಿದೆ. ನೈಟ್ ಲೈಫ್ ಅಂತ್ಯವಿಲ್ಲದೆ ಜನರು ಎಂಜಾಯ್ ಮಾಡುತ್ತಾರೆ. ಜೊತೆಗೆ ಫ್ರೆಂಚ್ ಶೈಲಿಯ ಭಕ್ಷ್ಯಗಳ ರುಚಿಯನ್ನು ಸವಿಯಲು ಪುದುಚೇರಿಯಲ್ಲಿರುವ ರೆಸ್ಟೋರೆಂಟ್ಗಳಿಗೆ ಹೋಗಲೇಬೇಕು.
ಕುಟುಂಬ ಪ್ರವಾಸಕ್ಕಿಂತ ಸ್ನೇಹಿತರೊಟ್ಟಿಗೆ ಪಾಂಡಿಚೇರಿ ಪ್ರವಾಸ ಮಾಡುವುದು ರೋಮಾಂಚಕಾರಿಯಾಗಿರುತ್ತದೆ. ಕುಟುಂಬದ ಜೊತೆ ಪ್ರವಾಸ ಮಾಡಲು ಪುದುಚೇರಿ ಯೋಗ್ಯವಾಗಿಲ್ಲ ಎಂದು ಕೆಲವರು ಶಿಫಾರಸ್ಸು ಮಾಡುತ್ತಾರೆ. ಯುವ ಜನತೆಯನ್ನು ಹೆಚ್ಚಾಗಿ ಸೆಳೆಯುವ ಪುದುಚೇರಿಯಲ್ಲಿ ಅಷ್ಟಕ್ಕೂ ಏನೆಲ್ಲಾ ಪ್ರವಾಸಿ ತಾಣಗಳಿವೆ ಎಂಬುದನ್ನು ಇಲ್ಲಿ ನೀಡಲಾಗಿದೆ ತಿಳಿಯಿರಿ.
ಪ್ಯಾರಡೈಸ್ ಬೀಚ್
ಪುದುಚೇರಿಯ ಅತ್ಯಂತ ರಮಣೀಯವಾದ ಕಡಲತೀರಗಳಲ್ಲಿ ಪ್ಯಾರಡೈಸ್ ಬೀಚ್ ಕೂಡ ಒಂದು. ತನ್ನ ಆಹ್ಲಾದಕರವಾದ ವಾತಾವರಣದಿಂದ ಬೀಚ್ ರಸಿಕರನ್ನು ಸೆಳೆಯುತ್ತದೆ. ಅಲ್ಲದೆ, ಚುನ್ನಂಬರ್ನಿಂದ ದೋಣಿ ಸವಾರಿ ಮಾಡುವ ಮೂಲಕ ಸುಲಭವಾಗಿ ತಲುಪಬಹುದು.
ಈ ಬೀಚ್ನಲ್ಲಿ ಸ್ನೇಹಿತರೊಟ್ಟಿಗೆ ವಿನೋದದ ಚಟುವಟಿಕೆಗಳನ್ನು ಕೈಗೊಳ್ಳಬಹುದು. ಸದಾ ಜನಸಂದಣಿಯಿಂದ ಕೂಡಿರುವ ಈ ಕಡಲತೀರಕ್ಕೆ ವಾರಾಂತ್ಯ ಸಮಯದಲ್ಲಿ ಭೇಟಿ ನೀಡದಿರಲು ಶಿಫಾರಸ್ಸು ಮಾಡಲಾಗಿದೆ. ಈ ಬೀಚ್ನಲ್ಲಿ ಮದ್ಯಪಾನ ಮಾಡುವುದು, ಈಜುವುದು ಮಾಡುವಂತಿಲ್ಲ.
ಅರಿಕಮೇಡು
ದಕ್ಷಿಣ ಭಾರತದ ಇತಿಹಾಸವನ್ನು ತಿಳಿಯಲು ನೀವು ಉತ್ಸಾಹ ಹೊಂದಿದ್ದರೆ ಖಂಡಿತವಾಗಿಯೂ ಅರಿಕಮೇಡನ್ನು ತಪ್ಪಿಸಿಕೊಳ್ಳಬಾರದು. ಇದು ಭಾರತ ಮತ್ತು ರೋಮ್ಗಳ ನಡುವೆ ವ್ಯಾಪಾರ ನಡೆಸುತ್ತಿದ್ದ ಪ್ರಮುಖ ಪಟ್ಟಣವಾಗಿ ಕಾರ್ಯನಿರ್ವಹಿಸುತ್ತಿತ್ತು. ಇಲ್ಲಿ ಅನೇಕ ಅವಶೇಷಗಳು ದೊರೆತಿವೆ. ವರದಿಗಳ ಪ್ರಕಾರ, ಇಲ್ಲಿ ಅನೇಕ ಉತ್ಖನನಗಳು ಮತ್ತು ತೀವ್ರವಾದ ಅಧ್ಯಯನಗಳು ನಡೆದಿವೆ. ರೋಮನ್ ಸಾಮ್ರಾಜ್ಯದ ನಡುವೆ ಇದ್ದ ವ್ಯಾಪಾರ ಸಂಬಂಧದ ಬಗ್ಗೆ ಈ ಸ್ಥಳವು ತಿಳಿಸುತ್ತದೆ. ಸ್ನೇಹಿತರೊಂದಿಗೆ ಭೇಟಿ ನೀಡಬಹುದಾದ ಸ್ಥಳಗಳಲ್ಲಿ ಅರಿಕಮೇಡು ಕೂಡ ಒಂದು.
ಓಲ್ಡ್ ಲೈಟ್’ಹೌಸ್
ಪುದುಚೇರಿಯ ಪ್ರವಾಸದಲ್ಲಿ ಅನ್ವೇಷಿಸಲೇಬೇಕಾದ ಮತ್ತೊಂದು ಜನಪ್ರಿಯ ಪ್ರವಾಸ ಸ್ಥಳವೆಂದರೆ ಅದು ಓಲ್ಡ್ ಲೈಟ್ಹಾಸ್. ಇದು 19 ನೇ ಶತಮಾನಕ್ಕೆ ಸೇರಿದ್ದು, ಹಿಂದಿನ ಫ್ರೆಂಚ್ ಆಡಳಿತಗಾರರಿಂದ ನಿರ್ಮಿಸಲ್ಪಟ್ಟ ದೀಪಸ್ತಂಭವಾಗಿದೆ. ಹಾಗೆಯೇ, ತನ್ನ ಸೊಗಸಾದ ವಾಸ್ತುಶಿಲ್ಪದಿಂದ ಹೆಚ್ಚು ಜನಪ್ರಿಯವಾಗಿದೆ. ಅಲ್ಲದೆ, ಫೋಟೋ ಶೂಟ್ ಮಾಡಿಸಿಕೊಳ್ಳಲು ಬಯಸುವವರು ಪುದುಚೇರಿಯ ಈ ದೀಪಸ್ತಂಭವನ್ನು ಆಯ್ಕೆ ಮಾಡಿಕೊಳ್ಳಬಹುದು. ಇದು ಒಂದು ಕಾಲದಲ್ಲಿ ಸಮುದ್ರದ ಹಡಗುಗಳಿಗೆ ಮಾರ್ಗದರ್ಶನ ನೀಡುತ್ತಿದ್ದ ಏಕೈಕ ಬೆಳಕಿನ ವ್ಯವಸ್ಥೆಯಾಗಿ ಕಾರ್ಯ ನಿರ್ವಹಿಸುತ್ತಿತ್ತು.
ಆರೋವಿಲ್ಲೆ
ಅರೋವಿಲ್ಲೆ ಪುದುಚೇರಿಯ ಜನಪ್ರಿಯ ಆಕರ್ಷಣೆಯಾಗಿದ್ದು, 1968 ರಲ್ಲಿ ಮಿರ್ರಾ ಅಲ್ಪಾಸ್ಪಾ ಸ್ಥಾಪಿಸಿದರು. ಇದನ್ನು ವಾಸ್ತುಶಿಲ್ಪಿ ರೋಜರ್ ಆಂಗರ್ ವಿನ್ಯಾಸಗೊಳಿಸಿದರು. ಆರೋವಿಲ್ಲೆಯನ್ನು ಪ್ರೀತಿಯಿಂದ ಸಿಟಿ ಆಫ್ ಡಾನ್ ಎಂದೂ ಕೂಡ ಕರೆಯುತ್ತಾರೆ. ಇದೊಂದು ಬೃಹತ್ ಧ್ಯಾನ ಕೇಂದ್ರವಾಗಿದ್ದು, ವಿಶ್ವದ ಜನರನ್ನು ಆಕರ್ಷಿಸುತ್ತದೆ. ದಾಖಲೆಗಳ ಪ್ರಕಾರ, ಈ ಸ್ಮಾರಕವನ್ನು 124 ದೇಶಗಳ ಮಣ್ಣನ್ನು ತಂದು ಒಂದು ಪಾತ್ರೆಯಲ್ಲಿ ಮಿಶ್ರಣ ಮಾಡಿ ನಿರ್ಮಿಸಲಾಗಿದೆ ಎನ್ನಲಾಗಿದೆ.
ಪುದುಚೇರಿ ಆಶ್ರಮ ಮತ್ತು ಮ್ಯೂಸಿಯಂ
ಪುದುಚೇರಿಯ ಶ್ರೀ ಅರಬಿಂದೋ ಆಶ್ರಮ ಮತ್ತು ಫ್ರೆಂಚ್ ಮ್ಯೂಸಿಯಂ ತುಂಬಾ ಜನಪ್ರಿಯವಾಗಿದೆ. 1926 ರಲ್ಲಿ ನಿರ್ಮಿಸಲಾದ ಈ ಶ್ರೀ ಅರಬಿಂದೋ ಆಶ್ರಮವು ಪ್ರಪಂಚದಾದ್ಯಂತ ಸಂದರ್ಶಕರನ್ನು ಸೆಳೆಯುತ್ತದೆ. ಧ್ಯಾನ ಮತ್ತು ಅಧ್ಯಾತ್ಮಿಕತೆಯ ಮೇಲೆ ಹೆಚ್ಚು ಒಲವು ಇರುವ ಜನರಿಗೆ ಈ ಆಶ್ರಮವು ಇಷ್ಟವಾಗುತ್ತದೆ.
ಫ್ರೆಂಚ್ ಯುದ್ಧ ಸ್ಮಾರಕವನ್ನು ಸ್ನೇಹಿತರೊಟ್ಟಿಗೆ ಭೇಟಿ ನೀಡಲೇಬೇಕು. ವಿಶ್ವ ಸಮರ1 ರಲ್ಲಿ ಪ್ರಾಣ ಕಳೆದುಕೊಂಡ ವೀರ ಸೈನಿಕರಿಗೆ ಗೌರವ ಸಲ್ಲಿಸುವ ಸಲುವಾಗಿ ಈ ಸ್ಮಾರಕವನ್ನು ನಿರ್ಮಿಸಲಾಯಿತು.
