ನವದೆಹಲಿ: ನಟಿ ಸೋನಮ್ ಕಪೂರ್ ಹಾಗೂ ಉದ್ಯಮಿ ಆನಂದ ಅಹುಜಾ ದಂಪತಿಯ ದೆಹಲಿ ನಿವಾಸದಲ್ಲಿ ಇತ್ತೀಚೆಗೆ ದರೋಡೆ ನಡೆದಿದ್ದು, ಸುಮಾರು 1.41 ಕೋಟಿ ಮೌಲ್ಯದ ನಗದು ಹಾಗೂ ಆಭರಣ ಕಳವಾಗಿದೆ ಎಂಬ ಮಾಹಿತಿ ಲಭ್ಯವಾಗಿದೆ.
ದೆಹಲಿ ಪೊಲೀಸ್‌ಗೆ ಸೋನಮ್ ಕಪೂರ್ ನೀಡಿರುವ ದೂರಿನ ಆಧಾರದ ಮೇಲೆ ಅಮೃತ್ ಶೇರ್ಗಿಲ್ ಮಾರ್ಗದ ಮನೆಯಲ್ಲಿ ಕಳವಾಗಿದೆ ಎಂಬುದಾಗಿ ಕೆಲ ವಾಹಿನಿಗಳು ವರದಿ ಮಾಡಿವೆ.
ದೂರಿನ ಅನ್ವಯ ತೀವ್ರ ತನಿಖೆ ನಡೆಸುತ್ತಿರುವ ಪೊಲೀಸರು ಅಹುಜಾ ಮನೆಯಲ್ಲಿನ 24 ಕಾರ್ಮಿಕರನ್ನು ವಿಚಾರಣೆ ನಡೆಸಿದ್ದಾರೆ. ಮನೆಗೆ ವಿಧಿ ವಿಜ್ಞಾನ ಪ್ರಯೋಗಾಲಯ ತಂಡ ಕೂಡ ಭೇಟಿ ನೀಡಿದೆ ಎಂದು ತಿಳಿದು ಬಂದಿದೆ.
ಸೋನಮ್ ಕಪೂರ್ ಮನೆಯಲ್ಲಿ ಅವರ ಅತ್ತೆ, ಮಾವ, ಗಂಡ ಆನಂದ ಅವರ ಅಜ್ಜಿ ವಾಸಿಸುತ್ತಿದ್ದಾರೆ. ಮೂಲಗಳ ಪ್ರಕಾರ ಈ ದೊಡ್ಡಮಟ್ಟದ ಕಳ್ಳತನ ಫೆಬ್ರವರಿಯಲ್ಲಿಯೇ ನಡೆದಿದೆ. ಫೆ.27 ರಂದು ದೂರು ದಾಖಲಾಗಿದೆ ಎಂದು ತಿಳಿದು ಬಂದಿದೆ. ಸದ್ಯ ಮುಂಬೈನಲ್ಲಿರುವ ಸೋನಮ್ ಹಾಗೂ ಆನಂದ ಅವರು ತಮ್ಮ ಮೊದಲ ಮಗು ಆಗಮನದ ನಿರೀಕ್ಷೆಯಲ್ಲಿದ್ದಾರೆ.
