ಬೆಂಗಳೂರು: ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್ನಲ್ಲಿ ನಡೆದ ಭೀಕರ ಉಗ್ರ ದಾಳಿಯಿಂದ ದೇಶದ ಭದ್ರತಾ ಸ್ಥಿತಿಗೆ ಗಂಭೀರ ಸ್ಪಂದನೆ ವ್ಯಕ್ತವಾಗುತ್ತಿರುವಾಗ, ಶ್ರೀನಗರದ ಪವಿತ್ರ ಶ್ರೀ ಆದಿ ಶಂಕರಾಚಾರ್ಯ ಮಠದಲ್ಲಿ ಕನ್ನಡಿಗರ ವಿಶೇಷ ಪೂಜೆ ಮತ್ತು ಶಾಂತಿಗಾಗಿ ಪ್ರಾರ್ಥನೆ ನಡೆಸಲಾಗಿದೆ. ದೇಶದ ಯೋಧರಿಗೆ ಶಕ್ತಿ ತುಂಬಿ, ಕಾಶ್ಮೀರದಲ್ಲಿ ಶಾಂತಿ ನೆಲೆಸಲು ಈ ಪೂಜೆಯನ್ನು ಅರ್ಪಿಸಲಾಯಿತು.
ಮೈಸೂರು ಮತ್ತು ಬೆಂಗಳೂರು ನಗರಗಳಿಂದ ತೆರಳಿದ 13 ಜನರ ಕನ್ನಡಿಗರ ತಂಡ, ಆದಿಶಂಕರ ಜಯಂತಿಯ ಅಂಗವಾಗಿ ಮಠದಲ್ಲಿ ವಿಶೇಷ ರುದ್ರಾಭಿಷೇಕ, ಮೃತ್ಯುಂಜಯ ಜಪ, ಹೋಮ-ಹವನಗಳನ್ನು ನೆರವೇರಿಸಿದೆ. ಈ ಧಾರ್ಮಿಕ ಕಾರ್ಯಕ್ರಮದಲ್ಲಿ ಸಿಆರ್ಪಿಎಫ್ ಮತ್ತು ಭಾರತೀಯ ಸೇನೆಯ ಸಹಾಯ ಸಹ ಇದ್ದು, ಯೋಧರ ಶಕ್ತಿವರ್ಧನೆಗಾಗಿ ವಿಶೇಷ ಪ್ರಾರ್ಥನೆಗಳನ್ನು ಸಲ್ಲಿಸಲಾಯಿತು.
ಡಾ. ನಾಗಲಕ್ಷ್ಮಿ ನಾಗಾರ್ಜುನ್ ನೇತೃತ್ವದ ಮೈಸೂರು ತಂಡ, ಶ್ರೀ ಆದಿ ಶಂಕರಾಚಾರ್ಯರ ಜೀವನದ ಸಾರವನ್ನು ಭರತನಾಟ್ಯ ರೂಪದಲ್ಲಿ ಪ್ರದರ್ಶಿಸಿ, ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಸಮ್ಮೇಳನಕ್ಕೆ ಅದ್ಭುತ ರೂಪ ನೀಡಿತು. ಕಳೆದ 13 ವರ್ಷಗಳಿಂದ ಕನ್ನಡಿಗರ ಈ ತಂಡ ಶ್ರೀನಗರದ ಈ ಮಠದಲ್ಲಿ ಶಂಕರ ಜಯಂತಿಯನ್ನು ಸತತವಾಗಿ ಆಚರಿಸುತ್ತಿದೆ.
ಈ ವೇಳೆ, ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ ಮತ್ತು ಶಾರದಾ ಪೀಠವನ್ನು ಭಾರತಕ್ಕೆ ಮರಳಿ ನೀಡುವಂತೆ ದೇವರಲ್ಲಿ ಪ್ರಾರ್ಥನೆ ಸಲ್ಲಿಸಲಾಯಿತು. ಸಾಧುಸಂತರಾದ ಸುಬೇಂದ್ರ ಬಾನಿ, ಸ್ವಾಮಿ ವಿಶ್ವನಾಥನಂದ ಸರಸ್ವತಿ, ಮಹಾ ಮಂಡಲೇಶ್ವರ ಶ್ರೀ ಅಕ್ಷಗಾನನಂದ ಜೀ ಈ ಆಚರಣೆಯಲ್ಲಿ ಭಾಗವಹಿಸಿ, ರಾಷ್ಟ್ರಶ್ರೇಯಸ್ಸು ಮತ್ತು ಶ್ರದ್ಧೆಯ ಸಂದೇಶವನ್ನು ನೀಡಿದರು.
