ಬೆಂಗಳೂರು: ಬೆಂಗಳೂರು ನಗರದಲ್ಲಿ ನಡೆದ ಆರ್ಸಿಬಿ ವಿಜಯೋತ್ಸವದ ಸಂದರ್ಭದಲ್ಲಿ ಸಂಭವಿಸಿದ ಭೀಕರ ಕಾಲ್ತುಳಿತ ಪ್ರಕರಣಕ್ಕೆ ಸಂಬಂಧಿಸಿದಂತೆ, ಕರ್ನಾಟಕ ಹೈಕೋರ್ಟ್ ಇಂದು ಸ್ವಯಂ ಪ್ರೇರಿತ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಪಿಐಎಲ್ ವಿಚಾರಣೆ ನಡೆಸಲಿದೆ. ಈ ದುರಂತದಲ್ಲಿ 11 ಜನರು ದುರ್ಮರಣಕ್ಕೊಳಗಾಗಿದ್ದರು.
ಹೈಕೋರ್ಟ್ನ ನ್ಯಾ. ವಿ. ಕಾಮೇಶ್ವರರಾವ್ ಮತ್ತು ನ್ಯಾ. ಸಿ.ಎಂ. ಜೋಶಿ ಅವರಿಬ್ಬರ ನೇತೃತ್ವದ ಪೀಠವು ಈ ಪ್ರಕರಣದ ಕುರಿತಂತೆ ವಿಚಾರಣೆ ನಡೆಸುತ್ತಿದ್ದು, ಸರ್ಕಾರಕ್ಕೆ ಇದುವರೆಗೆ ನಡೆದ ಘಟನೆಯ ಕುರಿತು ಸ್ಪಷ್ಟ ವಿವರ ನೀಡುವಂತೆ ಸೂಚನೆ ನೀಡಲಾಗಿದೆ. ಸರ್ಕಾರದ ಉತ್ತರಗಳು ಮುಚ್ಚಿದ ಲಕೋಟೆಯಲ್ಲಿ ನ್ಯಾಯಾಲಯದ ಮುಂದೆ ಹಾಜರಾಗಲಿದೆ.
ಜೂನ್ 4ರಂದು ಬೆಂಗಳೂರು ವಿಧಾನಸೌಧದ ಬಳಿ ನಡೆದ ಐಪಿಎಲ್ 2025 ಟ್ರೋಫಿ ಜಯಿಸಿದ ಆರ್ಸಿಬಿ ತಂಡದ ಅಭಿನಂದನಾ ಸಮಾರಂಭ ವೇಳೆ ಉಂಟಾದ ಕಾಲ್ತುಳಿತದಲ್ಲಿ 11 ಜನರು ಸಾವನ್ನಪ್ಪಿದ್ದು, ಅನೇಕರಿಗೆ ಗಾಯಗಳಾದವು. ಜನಸಂದಣಿಯ ನಿಯಂತ್ರಣ ವೈಫಲ್ಯ ಮತ್ತು ಅಸಮರ್ಪಕ ವ್ಯವಸ್ಥೆಗಳೇ ದುರಂತಕ್ಕೆ ಕಾರಣ ಎಂದು ಹಲವರು ಆರೋಪಿಸುತ್ತಿದ್ದಾರೆ.
ಹೈಕೋರ್ಟ್ ಕೇಳಿದ ಪ್ರಮುಖ ಪ್ರಶ್ನೆಗಳು:
- ಈ ಸಮಾರಂಭ ಆಯೋಜನೆಗೆ ನಿರ್ಧಾರ ಮಾಡಿದವರು ಯಾರು?
- ಸಾರ್ವಜನಿಕರ ಹಿತದಲ್ಲಿ ತೊಡಗಿಕೊಳ್ಳಬೇಕಾದ ಎಸ್ಓಪಿ ಇದ್ದಿದೆಯೆ?
- ಟ್ರಾಫಿಕ್ ನಿಯಂತ್ರಣಕ್ಕೆ ಏನು ಕ್ರಮ ಕೈಗೊಂಡರು?
- ಜನಸಮೂಹ ನಿಯಂತ್ರಣಕ್ಕಾಗಿ ಯಾವ ವ್ಯವಸ್ಥೆ ಮಾಡಲಾಗಿತ್ತು?
- ಸ್ಥಳದಲ್ಲಿ ತುರ್ತು ವೈದ್ಯಕೀಯ ಸೇವೆ ಲಭ್ಯವಿತ್ತೇ?
- ಗಾಯಗೊಂಡವರನ್ನು ಆಸ್ಪತ್ರೆಗೆ ಸಾಗಿಸಲು ಎಷ್ಟು ಸಮಯ ತೆಗೆದುಕೊಂಡರು?
- ಕಾರ್ಯಕ್ರಮಕ್ಕೆ ಸರಿಯಾದ ಅನುಮತಿ ಪಡೆದಿದ್ದರೇ?
- ಇಂತಹ ಜನಜಾತ್ರೆಯ ಕಾರ್ಯಕ್ರಮಕ್ಕೆ ಎಷ್ಟರ ಮಟ್ಟಿಗೆ ಪೂರ್ವ ಸಿದ್ಧತೆ ಮಾಡಲಾಗಿತ್ತು?
ಈ ಎಲ್ಲಾ ಪ್ರಶ್ನೆಗಳಿಗೆ ಸರ್ಕಾರವು ಹೈಕೋರ್ಟ್ ಮುಂದೆ ಸ್ಪಷ್ಟ ಮತ್ತು ಸಂಪೂರ್ಣವಾದ ಉತ್ತರಗಳನ್ನು ನೀಡಬೇಕಾಗಿರುವಂತಾಗಿದೆ.
ಈ ಪ್ರಕರಣವು ರಾಜ್ಯದ ಜನರಲ್ಲಿ ಆಕ್ರೋಶ ಹುಟ್ಟಿಸಿದ್ದು, ಹಲವರು ಸರ್ಕಾರದ ನಿರ್ಲಕ್ಷ್ಯ ಮತ್ತು ಎಚ್ಚರಿಕೆಯ ಕೊರತೆಯೇ ಈ ಅವಘಡಕ್ಕೆ ಕಾರಣವೆಂದು ಟೀಕಿಸುತ್ತಿದ್ದಾರೆ.
