ಇತ್ತೀಚಿನ ದಿನಗಳಲ್ಲಿ ಬದಲಾದ ಜೀವನಶೈಲಿ, ಆಹಾರ ಪದ್ಧತಿ, ಎಲೆಕ್ಟ್ರಾನಿಕ್‌ ವಸ್ತುಗಳ ಅತಿಯಾದ ಬಳಕೆಯಿಂದ ಅಥವಾ ಮಾನಸಿಕ ಖಿನ್ನತೆ, ಪ್ರೀತಿ ಪಾತ್ರರ ನಷ್ಟ ಹೀಗೆ ಹಲವು ಕಾರಣಗಳಿಂದ ಅನೇಕರಲ್ಲಿ ರಾತ್ರಿ ನಿದ್ದೆ ಸರಿಯಾಗಿ ಬರದಿರುವ ಸಮಸ್ಯೆ ಕಾಡುತ್ತಿದೆ. ಇದು ಪೂರ್ತಿಯಾಗಿ ನಿದ್ರಾಹೀನತೆ ಕಾಯಿಲೆ ಅಲ್ಲ. ಆದರೆ ಅದರ ಆರಂಭದ ಹಂತ ಹೇಳಬಹುದು.
ರಾತ್ರಿ ಚೆನ್ನಾಗಿ ನಿದ್ದೆ ಬರಬೇಕೆಂದರೆ ಏನು ಮಾಡಬೇಕು, ಜೀವನಶೈಲಿಯಲ್ಲಿ ಮಾಡಿಕೊಳ್ಳಬೇಕಾದ ಬದಲಾವಣೆಗಳೇನು ಎಂಬುದರ ಬಗ್ಗೆ ಇಲ್ಲಿದೆ ಮಾಹಿತಿ.
ಆಹಾರ ಸೇವನೆ
ರಾತ್ರಿ ಚೆನ್ನಾಗಿ ನಿದ್ದೆ ಬರಬೇಕೆಂದರೆ ರಾತ್ರಿಯ ಊಟ ಸರಿಯಾಗಿರಬೇಕು. ನಿದ್ದೆಗೆ ಪೂರಕವಾಗುವ ಆಹಾರಗಳನ್ನು ಸೇವಿಸುವುದು ಒಳ್ಳೆಯದು. ಅಂದರೆ ಹೆಚ್ಚು ಖಾರವಿಲ್ಲದ ಪದಾರ್ಥ, ಸ್ವಲ್ಪ ಮೊಸರು, ಹಣ್ಣುಗಳ ಸೇವನೆ ಹಾಗೂ ಹಾಲು ಕುಡಿಯುವುದು ಮುಖ್ಯವಾಗಿರುತ್ತದೆ. ಹೊಟ್ಟೆಯಲ್ಲಿ ಬಹುಬೇಗನೆ ಜೀರ್ಣವಾಗುವ ಹಾಗೂ ಯಾವುದೇ ರೀತಿ ಸಂಕಟಗಳನ್ನು ಉಂಟು ಮಾಡದೇ ಇರುವ ಆಹಾರಗಳ ಸೇವನೆ ರಾತ್ರಿ ಒಳ್ಳೆಯದು. ಊಟದ ನಂತರ ಕನಿಷ್ಠ ಒಂದರಿಂದ ಎರಡು ಗಂಟೆಗಳ ನಂತರ ಮಲಗಿ. ಇದರಿಂದ ತಿಂದ ಆಹಾರ ಹೊಟ್ಟೆಯಲ್ಲಿ ಸರಿಯಾಗಿ ಜೀರ್ಣವಾಗಿರುತ್ತದೆ.
ಬ್ರಿಸ್ಕ್ ವಾಕಿಂಗ್‌
ಮಾನಸಿಕ ಆರೋಗ್ಯವನ್ನು ಸುಧಾರಿಸಲು ನಿಮಗೆ ವಾಕಿಂಗ್‌ ಅತ್ಯುತ್ತಮ ದಾರಿಯಾಗಿದೆ. ಮನೆಯ ಹೊರಗೆ ಪ್ರತಿದಿನ ಬೆಳಗ್ಗೆ ಮತ್ತು ರಾತ್ರಿ ಊಟದ ನಂತರ 15 ನಿಮಿಷ ವಾಕಿಂಗ್‌ ಮಾಡಿದರೆ ಮನಸ್ಸು ಪ್ರಫುಲ್ಲವಾಗುತ್ತದೆ. ನೀವೇನಾದರೂ ಇಡೀ ದಿನ ಕುಳಿತು ಕೆಲಸ ಮಾಡಿದ್ದರೆ ನಡಿಗೆಯಿಂದ ಕಾಲುಗಳಿಗೆ ಆಹ್ಲಾದತೆ ಸಿಗುತ್ತದೆ. ಈ ಮೂಲಕ ಉತ್ತಮ ನಿದ್ದೆಯೂ ಬರುತ್ತದೆ. ಅಲ್ಲದೆ ಬ್ರಿಸ್ಕ್ ವಾಕ್‌ನಿಂದ ದೇಹದಲ್ಲಿ ಆರೋಗ್ಯಕ್ಕೆ ಉತ್ತಮವಾಗಿರುವ ಹಾರ್ಮೋನಗಳು ಉತ್ಪತ್ತಿಯಾಗುತ್ತವೆ.
ವ್ಯಸನಗಳಿಂದ ದೂರವಿರಿ
ನಿದ್ದೆ ಚೆನ್ನಾಗಿ ಬರಬೇಕೆಂದರೆ ದೇಹಕ್ಕೆ ಏನು ನೀಡುತ್ತೇವೆ ಎನ್ನುವುದು ಮುಖ್ಯವಾಗಿರುತ್ತದೆ. ಹೀಗಾಗಿ ಧೂಮಪಾನ, ಮದ್ಯಪಾನ, ಡ್ರಗ್ಸ್‌ನಂತಹ ಅಭ್ಯಾಸಗಳಿಂದ ದೂರವಿರಿ. ನೀವು ವ್ಯಸನಗಳಿಗೆ ದಾಸರಾದಷ್ಟೂ ದೇಹದಲ್ಲಿನ ತೂಕ ಹೆಚ್ಚಳವಾಗುತ್ತದೆ. ದೇಹದ ತೂಕ ಒಂದು ಬಾರಿ ಹೆಚ್ಚಾದರೆ ಸಾಲು ಸಾಲು ಅನಾರೋಗ್ಯ ಸಮಸ್ಯೆಗಳು ಕಾಡಲಾರಂಭಿಸುತ್ತವೆ. ಅಲ್ಲದೆ ದೇಹದ ತೂಕ ಹೆಚ್ಚಿರುವ ಕೆಲವರಲ್ಲಿ ರಾತ್ರಿ ಮೂಗು ಬ್ಲಾಕ್‌ ಆಗುವ ಸಾಧ್ಯತೆ ಇರುತ್ತದೆ. ಇದರಿಂದ ನಿದ್ದೆಗೆ ಅಡ್ಡಿಯಾಗಬಹುದು.
ಗ್ಯಾಜೆಟ್‌ಗಳ ಬಳಕೆ
ಪ್ರಸ್ತುತದಲ್ಲಿ ರಾತ್ರಿ ಮಲಗುವಾಗ, ಬೆಳಿಗ್ಗೆ ಏಳುವಾಗಲು ಮೊಬೈಲ್‌ ನೋಡುವುದು ಸಾಮಾನ್ಯವಾಗಿದೆ. ಆದರೆ ಇದರಿಂದ ಮೆದುಳಿಗೆ ಸಾಕಷ್ಟು ಹಾನಿಯುಂಟು ಮಾಡುತ್ತದೆ ಎನ್ನುವುದು ನೆನಪಿರಲಿ. ರಾತ್ರಿ ನಿದ್ದೆಗೆ ಅಡ್ಡಿ ಮಾಡುವುದು ಇದೇ ಗ್ಯಾಜೆಟ್‌ ಗಳೇ ಆಗಿವೆ. ಸರಿ ರಾತ್ರಿಯವರೆಗೂ ಟಿವಿ ನೋಡುವುದು, ಮೊಬೈಲ್‌, ವಿಡಿಯೋ ಗೇಮ್‌ ಎಂದು ಬಳಸುತ್ತಿದ್ದರೆ ಕಣ್ಣು ಅತಿಯಾಗಿ ದಣಿದು ನಿದ್ದೆಗೆ ಜಾರುತ್ತದೆ. ಆದರೆ ಈ ನಿದ್ದೆ ಪರಿಪೂರ್ಣವಾಗಿರುವುದಿಲ್ಲ. ಬೇಕಾದರೆ ನೀವೇ ಗಮನಿಸಿ, ನಿದ್ದೆ ಮಾಡಿ ಎದ್ದರೂ ಆಯಾಸ, ತಲೆನೋವು ಕಾಡುತ್ತಿರುತ್ತದೆ. ಹೀಗಾಗಿ ಮಲಗುವ ಕನಿಷ್ಠ ಅರ್ಧ ಗಂಟೆ ಮೊದಲಾದರೂ ನಿಮ್ಮ ಗ್ಯಾಜೆಟ್‌ಗಳಿಂದ ದೂರವಿರಿ. ಆ ಸಮಯದಲ್ಲಿ ವಾಕಿಂಗ್‌ ಮಾಡುವುದೋ ಅಥವಾ ಧ್ಯಾನ ಮಾಡುವುದೋ ಅಂತಹ ಅಭ್ಯಾಸಗಳನ್ನು ರೂಢಿಸಿಕೊಳ್ಳಿ ನಿದ್ದೆ ಚೆನ್ನಾಗಿ ಬರುತ್ತದೆ.
ಯೋಗಾಸನಗಳು
ಊಟದ ನಂತರ 2 ಗಂಟೆಗಳ ಬಳಿಕ ಅರ್ಧಗಂಟೆ ಯೋಗಾಸನಗಳನ್ನು ಅಭ್ಯಾಸ ಮಾಡಿ. ಯೋಗಾಸನದಿಂದ ದೇಹಕ್ಕೆ ಕೊಂಚ ಮಟ್ಟಿನ ದಣಿವಾಗುತ್ತದೆ. ಅಲ್ಲದೆ ಆಹಾರ ಕೂಡ ಸರಿಯಾಗಿ ಜೀರ್ಣವಾಗಿ ಚೆನ್ನಾಗಿ ನಿದ್ದೆ ಬರಲು ಸಹಾಯವಾಗುತ್ತದೆ. ಉತ್ಥಾನಾಸನ, ಬದ್ಧಕೋನಾಸನ, ಸೇತುಬಂಧಾಸನ, ಅಧೋ ಮುಖಶ್ವಾನಾಸನ, ಬಾಲಾಸನ ಹೀಗೆ ನಿದ್ದೆಗೆ ಎಲ್ಲಾ ರೀತಿಯ ಆಸನಗಳು ಸಹಕಾರಿಯಾಗಿವೆ.
