ಚೆನ್ನೈ: ಸೂರ್ಯ ಅಭಿನಯದ ʼಕಂಗುವʼ ಸಿನಿಮಾದ ಪೋಸ್ಟರ್‌ ಗಳು ಹೈಪ್‌ ಹೆಚ್ಚಿಸಿದ ಬಳಿಕ, ಇದೀಗ ಸಿನಿಮಾದ ಟೀಸರ್‌ ಹವಾ ಎಬ್ಬಿಸಿದೆ. ಪುಟ್ಟ ಟೀಸರ್‌ ನೋಡಿ ಸೂರ್ಯ ಅವರ ಫ್ಯಾನ್ಸ್‌ ಗಳು ಸಿನಿಮಾ ನೋಡಲು ತುದಿಗಾಲಲ್ಲಿ ನಿಂತಿದ್ದಾರೆ.
ಸೂರ್ಯ ಸಿನಿಕೆರಿಯರ್‌ ನಲ್ಲಿ ವಿಭಿನ್ನ ಸಿನಿಮಾವೆಂದೇ ಹೇಳಲಾಗುತ್ತಿರುವ ʼಕಂಗುವʼ ಅನೌನ್ಸ್‌ ಆದ ಸಮಯದಿಂದ ಸದ್ದು ಮಾಡಿದೆ. ʼಅನ್ನಾಥೆʼ, ʼವಿಶ್ವಾಸಂʼ, ವೇದಾಲಂʼ.. ಹೀಗೆ ಕಾಲಿವುಡ್ ನಲ್ಲಿ ಸೂಪರ್‌ ಹಿಟ್‌ ಸಿನಿಮಾಗಳನ್ನು ನೀಡಿರುವ ಶಿವ ʼಕಂಗುವʼ ಸಿನಿಮಾಕ್ಕೆ ಆ್ಯಕ್ಷನ್ ಕಟ್‌ ಹೇಳಿದ್ದಾರೆ.
ಈಗಾಗಲೇ ಸಿನಿಮಾದ ಗ್ಲಿಂಪ್ಸ್‌ ವೊಂದು ಸಿಕ್ಕಾಪಟ್ಟೆ ಸೌಂಡ್‌ ಮಾಡಿದೆ. ಇದೀಗ ಚಿತ್ರತಂಡ ಬಹುನಿರೀಕ್ಷಿತ ಸಿನಿಮಾದ ಟೀಸರ್‌ ರಿಲೀಸ್‌ ಮಾಡಿದೆ.
ಯುದ್ಧದದಲ್ಲಿ ಹೋರಾಡುವ ಸೈನ್ಯ, ಸೈನ್ಯಕ್ಕೊಬ್ಬ ನಾಯಕ. ಆ ನಾಯಕನ ರೌದ್ರ ಅವಾತರ ಹೀಗೆ ಸೂರ್ಯ ಹಾಗೂ ಬಾಬಿ ಡಿಯೋಲ್‌ ಅವರ ಪಾತ್ರದ ಝಲಕ್‌ ನ್ನು ಟೀಸರ್‌ ನಲ್ಲಿ ತೋರಿಸಲಾಗಿದೆ. ಇದೊಂದು ಪಕ್ಕಾ ಮಾಸ್‌ ಸಿನಿಮಾವೆನ್ನುವುದು, ಹಾಗೂ ಸಿನಿಮಾದಲ್ಲಿ ದೃಶ್ಯಗಳು ರೋಮಾಂಚನವಾಗಿರುತ್ತದೆ ಎನ್ನುವುದು ಸಿನಿಮಾದ ಟೀಸರ್‌ ನೋಡುವಾಗಲೇ ಗೊತ್ತಾಗುತ್ತದೆ.
ಸಿನಿಮಾದಲ್ಲಿ ನೆಗೆಟಿವ್‌ ರೋಲ್‌ ನಲ್ಲಿ ʼಉಧಿರನ್‌ ʼ ಪಾತ್ರದಲ್ಲಿ ಬಾಬಿ ಡಿಯೋಲ್‌ ಕಾಣಿಸಿಕೊಳ್ಳಲಿದ್ದಾರೆ. ಸೂರ್ಯ ಜೊತೆ ದಿಶಾ ಪಟಾನಿ ನಟಿಸಿದ್ದಾರೆ. ನಟರಾಜನ್ ಸುಬ್ರಮಣ್ಯಂ, ಜಗಪತಿ ಬಾಬು, ಯೋಗಿ ಬಾಬು, ರೆಡಿನ್ ಕಿಂಗ್ಸ್ಲಿ, ಕೋವೈ ಸರಳಾ, ಆನಂದರಾಜ್, ರವಿ ರಾಘವೇಂದ್ರ, ಕೆಎಸ್ ರವಿಕುಮಾರ್ ನಟಿಸಿದ್ದಾರೆ.
ಛಾಯಾಗ್ರಹಣವನ್ನು ವೆಟ್ರಿ ಪಳನಿಸಾಮಿ ಮಾಡಿದ್ದು, ದೇವಿ ಶ್ರೀ ಪ್ರಸಾದ್ ಸಂಗೀತ ಸಂಯೋಜಿಸಿದ್ದಾರೆ.
ಇದೇ ವರ್ಷ 10 ಭಾಷೆಗಳಲ್ಲಿ ಸಿನಿಮಾ ತೆರೆಕಾಣಲಿದೆ. ತ್ರೀ ಡಿಯಲ್ಲೂ ಸಿನಿಮಾ ರಿಲೀಸ್‌ ಆಗಲಿದೆ ಎನ್ನಲಾಗಿದೆ.
