ವಿಜಯಪುರ(ದೇವನಹಳ್ಳಿ): ಪಟ್ಟಣದ 9ನೇ ವಾರ್ಡ್ ನಿವಾಸಿ ಸೀನಪ್ಪ ಎಂಬುವವರ ಮನೆಯಲ್ಲಿ ಶುಕ್ರವಾರ 10 ಲಕ್ಷ ಮೌಲ್ಯದ ಚಿನ್ನಾಭರಣ ಹಾಗೂ 35 ಸಾವಿರ ನಗದು ಕಳ್ಳತನವಾಗಿದೆ.
ಬೇಸಿಗೆಯ ಕಾರಣ ಕೆಳಗಿನ ಮನೆಗೆ ಬೀಗ ಹಾಕಿ, ಮಹಡಿ ಮನೆಯಲ್ಲಿ ಸೀನಪ್ಪ ಕುಟುಂಬ ಮಲಗಿತ್ತು. ಇದೇ ಸಮಯದಲ್ಲಿ ಕಳ್ಳರು ಮನೆ ಬಾಗಿಲು ಮುರಿದು ಕೋಣೆಯಲ್ಲಿದ್ದ ಬೀರುವಿನ ಬಾಗಿಲು ಒಡೆದು ಹಾಕಿ, ಲಾಂಗ ಚೈನ್, ನೆಕ್ಲೆಸ್, ವಾಲೆ ಜುಮುಕಿ, ವಾಲೆ ಸೆಟ್, ಕತ್ತಿನ ಚೈನ್, ಬ್ರಾಸ್ಲೈಟ್, ತಾಳಿ, ಗುಂಡು ಸೇರಿದಂತೆ 35 ಸಾವಿರ ನಗದು ದೋಚಿಕೊಂಡು ಹೋಗಿದ್ದಾರೆ.
ಬೆಳಗಿನ ಜಾವ 3 ಗಂಟೆ ಸಮಯದಲ್ಲಿ ಕೆಳಗೆ ಬಂದು ನೋಡಿದಾಗ ಕಳ್ಳತನವಾಗಿರುವುದು ಗೊತ್ತಾಯಿತು ಎಂದು ಸೀನಪ್ಪ ಅವರ ಪುತ್ರ ನಾಗರಾಜ್ ದೂರಿನಲ್ಲಿ ತಿಳಿಸಿದ್ದಾರೆ.
ಪಟ್ಟಣದ ಪೊಲೀಸ್ ಠಾಣೆಗೆ ಪ್ರಕರಣ ದಾಖಲಾಗಿದೆ. ಸ್ಥಳಕ್ಕೆ ಸರ್ಕಲ್ ಇನ್ ಸ್ಪೆಕ್ಟರ್ ಎಂ.ಎಸ್.ರವಿ, ಹಾಗೂ ಬೆರಳಚ್ಚು ತಜ್ಞರು, ಶ್ವಾನದಳ, ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.
