ಬೆಂಗಳೂರು: ರಾಕಿಂಗ್‌ ಸ್ಟಾರ್‌ ಯಶ್ ಅಭಿನಯದ ʼಟಾಕ್ಸಿಕ್ʼ ಶೂಟಿಂಗ್‌ ಹಂತದಲ್ಲಿ ಮತ್ತೆ ಮತ್ತೆ ಸದ್ದು ಮಾಡುತ್ತಿದೆ. ಸಿನಿಮಾದ ಕುರಿತು ಯಾವುದೇ ಅಪ್ಡೇಟ್‌ ಗಳು ಅಧಿಕೃತವಾಗಿ ಕೇಳಿ ಬರುತ್ತಿಲ್ಲದಿದ್ರೂ ರೂಮರ್ಸ್ ಗಳು ದೊಡ್ಡದಾಗಿಯೇ ಹರಿದಾಡುತ್ತಿದೆ.
ಮಾಲಿವುಡ್‌ ಡೈರೆಕ್ಟರ್‌ ಗೀತು ಮೋಹನ್ ದಾಸ್ ದೊಡ್ಡದಾಗಿಯೇ ʼಟಾಕ್ಸಿಕ್ʼ ಸಿನಿಮಾವನ್ನು ಕಟ್ಟಿಕೊಡಲಿದ್ದಾರೆ. ಇದಕ್ಕಾಗಿ ಪಾತ್ರವರ್ಗದಿಂದ ಹಿಡಿದು ಎಲ್ಲಾ ರೀತಿಯ ತಯಾರಿಯನ್ನು ಗೀತು ಮೋಹನ್ ದಾಸ್ ಮಾಡಿಕೊಂಡಿದ್ದಾರೆ.
ಆರಂಭಿಕವಾಗಿ ಬೆಂಗಳೂರಿನ ಹೆಚ್‌ಎಂಟಿ ಫ್ಯಾಕ್ಟರಿ ಆವರಣದಲ್ಲಿ ಸೆಟ್ ನಿರ್ಮಿಸಿ ಮೊದಲ ಹಂತದ ಚಿತ್ರೀಕರಣ ನಡೆಸಲಾಗಿದೆ.
ಪಾತ್ರ ವರ್ಗದ ಬಗ್ಗೆ ʼಟಾಕ್ಸಿಕ್ʼ ಸಖತ್‌ ಕ್ರೇಜಿ ಆಗಿ ಕುತೂಹಲ ಹೆಚ್ಚಿಸಿದೆ. ಈಗಾಗಲೇ ನಯನತಾರ ಜೊತೆಗೆ ಅಕ್ಷಯ್‌ ಒಬೆರಾಯ್, ತೆಲುಗು-ತಮಿಳು ನಟ ತಣಿಕೆಲ್ಲ ಭರಣಿ ಅವರು ಚಿತ್ರತಂಡದ ಜತೆ ಸೇರಿಕೊಂಡಿದ್ದಾರೆ.
ಕಿಯಾರಾ ಅಡ್ವಾಣಿ ಹುಮಾ ಖುರೇಷಿ ಕಾಣಿಸಿಕೊಳ್ಳಲಿದ್ದಾರೆ. ಇದರೊಂದಿಗೆ ನವಾಝುದ್ದೀನ್ ಸಿದ್ದಿಕಿ ಕೂಡ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗುತ್ತಿದೆ.
ಈ ನಡುವೆ ಇದೀಗ ಬ್ರಿಟೀಷ್‌ ನಟನೊಬ್ಬ ʼಟಾಕ್ಸಿಕ್ʼ ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನುವ ಸುದ್ದಿ ಹಬ್ಬಿದೆ. ಬ್ರಿಟೀಷ್‌ ನಟ ಬೆನೆಡಿಕ್ಟ್ ಗ್ಯಾರೆಟ್ ಅವರು ʼಟಾಕ್ಸಿಕ್ʼ ನಲ್ಲಿ ನಟಿಸಲಿದ್ದಾರೆ ಎನ್ನಲಾಗುತ್ತಿದೆ.
ಬೆನೆಡಿಕ್ಟ್ ಗ್ಯಾರೆಟ್ ಅವರು ಇತ್ತೀಚೆಗೆ ಅವರ ಜಿಮ್‌ ಬಾಡಿಯ ಫೋಟೋವನ್ನು ಸೋಶಿಯಲ್‌ ಮೀಡಿಯಾದಲ್ಲಿ ಹಾಕಿದ್ದರು. ಇದನ್ನು ನೋಡಿ ಬಳಕೆದಾರರೊಬ್ಬರು ʼಕೆಜಿಎಫ್-3ʼ ನ ಅಧೀರ ಎಂದು ಕಮೆಂಟ್‌ ಮಾಡಿದ್ದಾರೆ.
ಇದಕ್ಕೆ ಬೆನೆಡಿಕ್ಟ್ ಸದ್ಯಕ್ಕೆ ನಾನು ಯಶ್ ಜತೆ ಕೆಲಸ ಮಾಡುತ್ತಿದ್ದೇನೆ” ಎಂದು ಕಮೆಂಟ್‌ಗೆ ರಿಪ್ಲೈ ಕೊಟ್ಟಿದ್ದಾರೆ. ಆ ಮೂಲಕ ʼಟಾಕ್ಸಿಕ್ʼ ನಲ್ಲಿ ತಾನು ಇರಲಿದ್ದೇನೆ ಎನ್ನುವ ಸುಳಿವನ್ನು ನೀಡಿದ್ದಾರೆ.
ಬ್ರಿಟೀಷ್‌ ನಟನಾಗಿದ್ದರೂ ಬೆನೆಡಿಕ್ಟ್ ಅವರಿಗೆ ಭಾರತೀಯ ಸಿನಿಮಾರಂಗ ಹೊಸತಲ್ಲ. ಬಾಲಿವುಡ್‌ ನಲ್ಲಿ ʼಔರಾನ್ ಮೇ ಕಹಾನ್ ದಮ್ ಥಾʼ ಸೇರಿದಂತೆ ʼಕಂಜ್ಯೂರಿಂಗ್ ಕಣ್ಣಪ್ಪನ್ʼ ಎನ್ನುವ ತಮಿಳು ಹಾಗೂ ಕೆಲ ಮರಾಠಿ ಸಿನಿಮಾದಲ್ಲೂ ಅವರು ನಟಿಸಿದ್ದಾರೆ.
300 ಕೋಟಿ ರೂ. ಬಜೆಟ್‌ ನಲ್ಲಿ ಕೆವಿಎನ್ ಪ್ರೊಡಕ್ಷನ್ಸ್ ಜೊತೆ ಸೇರಿ ಯಶ್ ‘ಟಾಕ್ಸಿಕ್’ ಸಿನಿಮಾ ನಿರ್ಮಾಣ ಮಾಡುತ್ತಿದ್ದಾರೆ.
2025ರ ಏ.10 ರಂದು ʼಟಾಕ್ಸಿಕ್ʼ ಪ್ಯಾನ್‌ ಇಂಡಿಯಾ ಭಾಷೆ ಸೇರಿದಂತೆ ವಿದೇಶಿ ಭಾಷೆಯಲ್ಲೂ ತೆರೆಗೆ ಬರಲಿದೆ. ಆದರೆ ಇನ್ನೊಂದೆಡೆ ಏ.10ರಂದು ʼಟಾಕ್ಸಿಕ್ʼ ರಿಲೀಸ್‌ ಆಗುವುದು ಅನುಮಾನ ಎನ್ನುವ ಮಾತು ಕೂಡ ಕೇಳಿ ಬರುತ್ತಿದೆ.
