ಧ್ಯಾನ, ಯೋಗಾಭ್ಯಾಸ, ವ್ಯಾಯಾಮ ಇವುಗಳೆಲ್ಲವೂ ಗಟ್ಟಿ ಮನಸ್ಸು ಇರುವವರಿಗೆ ಮಾತ್ರ ಮಾಡಲು ಸಾಧ್ಯ. ಏಕೆಂದರೆ ಇವುಗಳಿಗೆ ಪರಿಶ್ರಮ ಕೂಡ ಅಷ್ಟೇ ಬೇಕಾಗುತ್ತದೆ ಮತ್ತು ಫಲಿತಾಂಶ ಕೂಡ ಅಷ್ಟೇ ಉನ್ನತ ಮಟ್ಟದಲ್ಲಿ ಲಭ್ಯವಾಗುತ್ತದೆ.
ಅತ್ಯುತ್ತಮ ಆಹಾರ ಪದ್ಧತಿಯನ್ನು ಮೈಗೂಡಿಸಿಕೊಂಡು ಜಡ ಜೀವನ ಶೈಲಿಯಿಂದ ಹೊರ ಬಂದು ಯಾರು ತಮ್ಮನ್ನು ತಾವು ಇಂತಹ ಅಭ್ಯಾಸಗಳಲ್ಲಿ ಪ್ರತಿ ದಿನ ತೊಡಗಿಸಿಕೊಂಡಿರುತ್ತಾರೆ, ಅಂತಹವರಿಗೆ ಸಣ್ಣ ಪುಟ್ಟ ಆರೋಗ್ಯ ಸಮಸ್ಯೆಗಳು ಬಹುತೇಕ ಕಾಡುವುದಿಲ್ಲ. ಕೆಮ್ಮು, ಕಫ, ಶೀತ, ನೆಗಡಿ, ಜ್ವರ ಇತ್ಯಾದಿಗಳ ರೂಪದಲ್ಲಿರುವ ಕಾಯಿಲೆಗಳು ಕಾಡುವುದಿಲ್ಲ. ದೇಹದಲ್ಲಿ ರೋಗ ನಿರೋಧಕ ಶಕ್ತಿ ಅಪಾರ ಪ್ರಮಾಣದಲ್ಲಿ ಇರುತ್ತದೆ.
ಆರೋಗ್ಯಕರವಾದ ಹೃದಯವನ್ನು ಹೊಂದಲು ಅನುಕೂಲವಾಗುತ್ತದೆ. ಆಗಾಗ ಯಾರು ಶೀತ, ನೆಗಡಿ, ಕೆಮ್ಮು ಇಂತಹ ಸಮಸ್ಯೆಗಳಿಂದ ಬಳಲುತ್ತಿರುತ್ತಾರೆ ಅಂತಹವರು ತಮ್ಮ ಸಮಸ್ಯೆಯ ಪರಿಹಾರಕ್ಕೆ ಯೋಗಾಭ್ಯಾಸವನ್ನು ಆಯ್ದುಕೊಳ್ಳುವುದು ಬಹಳ ಒಳ್ಳೆಯದು. ದಿನದ ಕೆಲವು ಸಮಯವನ್ನು ಯೋಗಾಭ್ಯಾಸಕ್ಕೆ ಮೀಸಲಿಟ್ಟರೆ ಅದರಿಂದ ಉಂಟಾಗುವ ಆರೋಗ್ಯ ಪ್ರಯೋಜನಗಳು ಮಾತ್ರ ಅಪಾರ.
ಪರ್ವತಾಸನ ಅಥವಾ ಗುಡ್ಡದ ಭಂಗಿ
ಎದೆಯ ಭಾಗದ ಮಾಂಸಖಂಡಗಳನ್ನು ಸದೃಢಪಡಿಸುವಲ್ಲಿ ಈ ಯೋಗಾಸನ ನೆರವಿಗೆ ಬರಲಿದೆ. ಕೈಗಳ ಭಾಗದಲ್ಲಿ ಚಲನೆ ಇರುವುದರಿಂದ ನಮ್ಮ ಶ್ವಾಸಕೋಶದ ಭಾಗ ಮತ್ತು ಎದೆಯ ಭಾಗದ ಮಾಂಸಖಂಡಗಳಿಗೆ ಸದೃಢತೆ ಸಿಗುತ್ತದೆ. ಜೊತೆಗೆ ನಮ್ಮ ದೇಹದಿಂದ ವಿಷಕಾರಿ ಅಂಶಗಳನ್ನು ಹೊರ ಹಾಕಲು ಸಹ ಇದು ಅನುಕೂಲವಾಗುತ್ತದೆ. ಆಂತರಿಕವಾಗಿ ರೋಗ ನಿರೋಧಕ ಶಕ್ತಿ ಬಲಗೊಂಡು ಸೋಂಕುಗಳ ವಿರುದ್ಧ ರಕ್ಷಣೆ ದೊರೆಯುತ್ತದೆ.
ಈ ಯೋಗಾಭ್ಯಾಸವನ್ನು ಮಾಡುವ ವಿಧಾನ
• ಮೊದಲು ನೆಲದ ಮೇಲೆ ಆರಾಮವಾಗಿ ಸುಖಾಸನದಲ್ಲಿ ಕುಳಿತುಕೊಂಡು ನಿಮ್ಮ ಎರಡು ಕೈಗಳನ್ನು ಮೇಲ್ಭಾಗಕ್ಕೆ ಆಕಾಶದ ಕಡೆಗೆ ಚಾಚಿ. ನಿಮ್ಮ ಎರಡು ಅಂಗೈಗಳು ಒಂದನ್ನೊಂದು ನೋಡುವಂತೆ ಇಟ್ಟುಕೊಳ್ಳಿ.
• ಈಗ ನಿಮ್ಮ ಎರಡು ಕೈಗಳನ್ನು ಜೋಡಿಸಿಟ್ಟುಕೊಂಡು, ದೀರ್ಘವಾಗಿ ಉಸಿರನ್ನು ಒಳಗೆ ತೆಗೆದುಕೊಂಡು ಉಸಿರು ಬಿಡುತ್ತಾ ಕೈಗಳನ್ನು ಅಗಲಿಸಿ. ಇದರಿಂದ ನಿಮ್ಮ ಹೊಟ್ಟೆಯ ಕಡೆಗಿನ ಮಾಂಸಖಂಡಗಳ ಭಾಗದಲ್ಲಿ ಸ್ವಲ್ಪ ವಿಸ್ತಾರದ ಅನುಭವ ಕಂಡುಬರುತ್ತದೆ.
• ಸುಮಾರು 12 ರಿಂದ 15 ಸೆಕೆಂಡುಗಳು ಹೀಗೆ ಇದ್ದು ನಂತರ ವಿಶ್ರಮಿಸಿ.
• ಈ ಆಸನವನ್ನು ಐದು ಬಾರಿ ಮೇಲೆ ಹೇಳಿದ ರೀತಿಯಲ್ಲಿ ಮಾಡಿ.
ಉಸ್ತ್ರಸನ ಅಥವಾ ಒಂಟೆ ಭಂಗಿ
ಈ ಭಂಗಿಯಲ್ಲಿ ನಿಮ್ಮ ಶ್ವಾಸಕೋಶಗಳು ತೆರೆದುಕೊಳ್ಳಲು ಅನುಕೂಲವಾಗುತ್ತದೆ ಜೊತೆಗೆ ಸಂಪೂರ್ಣ ಉಸಿರಾಟ ವ್ಯವಸ್ಥೆ ಆಮ್ಲಜನಕದಿಂದ ತುಂಬಿರಲು ಅನುಕೂಲವಾಗುತ್ತದೆ. ಮೂಗಿನಿಂದ ಹಿಡಿದು ಉಸಿರಾಟ ಮತ್ತು ಶ್ವಾಸಕೋಶ ಆರೋಗ್ಯದಿಂದ ಕೂಡಿರುತ್ತದೆ.
ಈ ಯೋಗಾಸನವನ್ನು ಮಾಡುವ ವಿಧಾನ
• ಮೊದಲಿಗೆ ನೆಲದ ಮೇಲೆ ಒಂದು ಯೋಗ ಚಾಪೆಯ ಮೇಲೆ ಕುಳಿತುಕೊಳ್ಳಿ.
• ಈಗ ನಿಮ್ಮ ಎರಡು ಕೈಗಳನ್ನು ನಿಮ್ಮ ಸೊಂಟದ ಭಾಗದ ಮೇಲೆ ಇರಿಸಿ. ಹೇಗೆ ಎಂದರೆ ನಿಮ್ಮ ಸೊಂಟದ ಮೂಳೆಯ ಅಂಚಿನ ಮೇಲೆ ನಿಮ್ಮ ಎರಡು ಕೈಗಳು ಇರಬೇಕು.
• ಈಗ ನಿಧಾನವಾಗಿ ನಿಮ್ಮ ಸೊಂಟದ ಭಾಗವನ್ನು ನೆಲದ ಕಡೆಗೆ ಬರುವಂತೆ ಮಾಡಿ ನಿಮ್ಮ ಮೇಲ್ಭಾಗದ ದೇಹವನ್ನು ಕ್ರಮೇಣವಾಗಿ ಒಂಟೆಯ ರೀತಿ ಮೇಲೆತ್ತಿ.
• ಈಗ ದೀರ್ಘವಾಗಿ ಉಸಿರನ್ನು ಒಳಗೆ ತೆಗೆದುಕೊಂಡು ಹಿಂದಕ್ಕೆ ಬಾಗಿದಂತೆ ಮಾಡಿ ನಿಮ್ಮ ತಲೆಯನ್ನು ಪಕ್ಕಕ್ಕೆ ತಿರುಗಿಸಿ.
• ನಿಮ್ಮ ಎರಡು ಪಾದಗಳ ಮೇಲೆ ನಿಮ್ಮ ಅಂಗೈಗಳನ್ನು ಇರಿಸಿಕೊಂಡು ಬೆಂಬಲ ಕೊಟ್ಟುಕೊಳ್ಳಿ.
• ಸುಮಾರು ಹದಿನೈದು ಸೆಕೆಂಡುಗಳ ಕಾಲ ಹೀಗೆ ಇದ್ದು ನಂತರ ಸಹಜ ಸ್ಥಿತಿಗೆ ಮರಳಿ ಬನ್ನಿ.
ಸೇತುಬಂದಾಸನ
• ಈ ಯೋಗಾಭ್ಯಾಸದ ಪ್ರಕಾರದಲ್ಲಿ ನಿಮ್ಮ ಎದೆಯ ಭಾಗ ತೆರೆದುಕೊಂಡಂತೆ ಆಗಿ ನಿಮ್ಮ ದೇಹದ ರೋಗನಿರೋಧಕ ಶಕ್ತಿ ಹೆಚ್ಚಾಗುತ್ತದೆ ಮತ್ತು ನಿಮ್ಮನ್ನು ಕೆಮ್ಮು ಮತ್ತು ಶೀತದ ಸಮಸ್ಯೆಗಳಿಂದ ದೂರಮಾಡುತ್ತದೆ.
• ಈ ಭಂಗಿಯನ್ನು ಮಾಡುವ ವಿಧಾನ
• ನೆಲದ ಮೇಲೆ ಒಂದು ಯೋಗ ಚಾಪೆಯನ್ನು ಹಾಸಿ ಬೆನ್ನಿನ ಮೇಲೆ ಮಲಗಿ ಮತ್ತು ಮಂಡಿಯನ್ನು ಮಡಚಿ ಇಟ್ಟುಕೊಳ್ಳಿ. ನಿಮ್ಮ ಪಾದಗಳನ್ನು ನೆಲದ ಮೇಲೆ ಇರಿಸಿಕೊಳ್ಳಿ.
• ಈಗ ನೀವು ಉಸಿರು ಹೊರಗೆ ಬಿಡುತ್ತಿರುವಂತೆ, ನಿಮ್ಮ ತೋಳುಗಳಲ್ಲಿನ ಶಕ್ತಿಯನ್ನು ಬಳಸಿಕೊಂಡು ನಿಮ್ಮ ಸೊಂಟದ ಭಾಗವನ್ನು ಮೇಲೆತ್ತಲು ಪ್ರಯತ್ನಿಸಿ.
• ನಿಮ್ಮ ದೇಹವನ್ನು ಮೇಲೆತ್ತಿದ ಸಂದರ್ಭದಲ್ಲಿ ಐದು ಬಾರಿ ದೀರ್ಘವಾಗಿ ಉಸಿರಾಡಲು ಪ್ರಯತ್ನಿಸಿ.
• ಸುಮಾರು ನಾಲ್ಕರಿಂದ ಐದು ಬಾರಿ ಇದೇ ರೀತಿ ಮುಂದುವರಿಸಿ.
ಕಪಾಲಭಟಿ ಪ್ರಾಣಯಾಮ
ಕಪಾಲಭಟಿ ಪ್ರಾಣಯಾಮ ನಿಮ್ಮ ಕೆಮ್ಮಿನ ಸಮಸ್ಯೆಯನ್ನು ದೂರಮಾಡಲು ಪರಿಣಾಮಕಾರಿಯಾಗಿ ಕೆಲಸ ಮಾಡಬಲ್ಲ ಯೋಗಾಭ್ಯಾಸವಾಗಿದೆ. ಇದರ ಪ್ರಕಾರ ನಿಮ್ಮ ಶ್ವಾಸಕೋಶದಲ್ಲಿ ಕಂಡುಬರುವ ವಿಷಕಾರಿ ಅಂಶಗಳು ದೂರವಾಗುತ್ತವೆ. ಯಾರಿಗೆ ಹೆಚ್ಚಾಗಿ ಕಫ ಸಮಸ್ಯೆ ಇರುತ್ತದೆ ಅಂತಹವರಿಗೆ ಈ ಯೋಗಾಭ್ಯಾಸ ತುಂಬಾ ಪ್ರಬಲವಾಗಿ ಕೆಲಸ ಮಾಡಬಲ್ಲದು.
ಈ ಯೋಗಾಭ್ಯಾಸವನ್ನು ಮಾಡುವ ವಿಧಾನ
• ಮೊದಲು ನೆಲದ ಮೇಲೆ ಸುಖಾಸನದಲ್ಲಿ ಕುಳಿತುಕೊಳ್ಳಿ. ನಿಮ್ಮ ಎರಡು ಅಂಗೈಗಳು ಮಂಡಿ ಮೇಲೆ ಇರಲಿ. ಆದರೆ ಅಂಗೈಗಳನ್ನು ಮೇಲೆ ನೋಡುವಂತೆ ಇಟ್ಟುಕೊಳ್ಳಿ.
• ದೀರ್ಘವಾಗಿ ಉಸಿರನ್ನು ಒಳಗೆ ತೆಗೆದುಕೊಂಡು ಹೊರಗೆ ಬಿಡುವಾಗ ಮೂಗಿನ ಮೂಲಕ ಉಸಿರನ್ನು ಹೊರ ಬಿಟ್ಟು ಹೊಟ್ಟೆಯನ್ನು ಒಳಗೆಳೆದುಕೊಳ್ಳಿ.
• ಈಗ ನಿಧಾನವಾಗಿ ಉಸಿರನ್ನು ಒಳಗೆ ತೆಗೆದುಕೊಂಡು ಹೊಟ್ಟೆಯ ಭಾಗದ ಮಾಂಸಖಂಡಗಳನ್ನು ಸಡಿಲವಾಗಿ ಇಟ್ಟುಕೊಳ್ಳಿ. ನಿಧಾನವಾಗಿ ನಿಮ್ಮ ಹೊಟ್ಟೆಯ ಭಾಗದ ಮಾಂಸಖಂಡಗಳನ್ನು ಒಳಗೆ ತೆಗೆದುಕೊಂಡು ನಂತರ ಹೊರಬಿಡಿ.
• ಸುಮಾರು 50 ಬಾರಿ ಇದೇ ರೀತಿ ಮಾಡಿ ನಿಮಗೆ ಆರಾಮದಾಯಕ ಎನಿಸಿದ ತಕ್ಷಣ ನಿಮ್ಮ ಅಭ್ಯಾಸವನ್ನು ಮತ್ತಷ್ಟು ಬಾರಿ ಮುಂದುವರೆಸಬಹುದು.
• ಪ್ರತಿದಿನ ಬೆಳಗಿನ ಜಾವ ಮತ್ತು ಸಂಜೆಯ ಸಮಯದಲ್ಲಿ ಈ ಯೋಗಾಭ್ಯಾಸವನ್ನು ಮುಂದುವರಿಸಬಹುದು.
ಉಜ್ಜಾಯಿ ಪ್ರಾಣಾಯಾಮ
ಉಜ್ಜಾಯಿ ಪ್ರಾಣಾಯಾಮವನ್ನು ಮಾಡುವ ವಿಧಾನದಿಂದ ನಿಮ್ಮ ಶ್ವಾಸಕೋಶದಲ್ಲಿ ಹೆಚ್ಚಾಗಿ ಸೇರಿಕೊಂಡಿರುವ ಕಫ ಹೊರಗೆ ಬರುತ್ತದೆ ಮತ್ತು ನಿಮ್ಮ ದೇಹ ಬಿಸಿಯಾಗುತ್ತದೆ ಜೊತೆಗೆ ನಿಮ್ಮ ದೇಹದ ಒಳಭಾಗದಿಂದ ವಿಷಕಾರಿ ಅಂಶಗಳು ಬೆವರಿನ ರೂಪದಲ್ಲಿ ದೂರವಾಗುತ್ತದೆ.
ಉಜ್ಜಾಯಿ ಪ್ರಾಣಾಯಾಮವನ್ನು ಮಾಡುವ ಬಗೆ
• ಮೊದಲಿಗೆ ನೆಲದ ಮೇಲೆ ಸುಖಾಸನದ ಭಂಗಿಯಲ್ಲಿ ಆರಾಮವಾಗಿ ಕುಳಿತುಕೊಳ್ಳಿ. ಈಗ ಕಣ್ಣುಮುಚ್ಚಿಕೊಂಡು ನಿಮ್ಮ ಎರಡು ಕೈಗಳನ್ನು ಮಂಡಿಯ ಮೇಲೆ ಮೇಲ್ಭಾಗಕ್ಕೆ ಬರುವಂತೆ ಇಟ್ಟುಕೊಳ್ಳಿ.
• ನಿಮ್ಮ ಗಂಟಲಿನ ಭಾಗವನ್ನು ಬಿಗಿ ಹಿಡಿದುಕೊಂಡು ಉಸಿರನ್ನು ದೀರ್ಘವಾಗಿ ಒಳಗೆ ತೆಗೆದುಕೊಳ್ಳಿ. ಈ ರೀತಿ ಮಾಡುವಾಗ ನಿಮ್ಮ ಗಂಟಲಿನ ಭಾಗದಿಂದ ವಿಸಲ್ ಸದ್ದು ಬರುವಂತೆ ಇರಬೇಕು.
• ನಿಮ್ಮ ಉಸಿರನ್ನು ಐದು ನಿಮಿಷಗಳ ಕಾಲ ಭದ್ರವಾಗಿ ಬಿಗಿಹಿಡಿದು ನಿಧಾನವಾಗಿ ಹೊರಬಿಡಿ. ನಿಮ್ಮ ಗಂಟಲಿನ ಭಾಗವನ್ನು ಸ್ವಲ್ಪ ಬಿಸಿ ಮಾಡಿಕೊಂಡು ನೀವು ಒಳಗೆ ತೆಗೆದುಕೊಂಡ ಉಸಿರನ್ನು ಹೊರಗೆ ಬಿಡಿ. ಈ ಸಮಯದಲ್ಲಿ ನಿಮ್ಮ ಗಂಟಲಿನ ಭಾಗದಿಂದ ಉಶ್ ಎಂಬ ಸದ್ದು ಬರಬೇಕು.
• ಮೂರರಿಂದ ನಾಲ್ಕು ಬಾರಿ ಈ ರೀತಿ ಮಾಡುವುದರ ಜೊತೆಗೆ ನಿಮ್ಮ ಅಭ್ಯಾಸದ ಮಿತಿಯನ್ನು ಹೆಚ್ಚು ಮಾಡಿಕೊಳ್ಳಬಹುದು.
