ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿ ಫೀಲ್ಡ್ ಮಾರ್ಷಲ್ ಕಾರ್ಯಪ್ಪ ಅವರ ಹೆಸರನ್ನು ಮೆಟ್ರೋ ನಿಲ್ದಾಣಕ್ಕೆ ಇಡುವ ಸಂಬಂಧ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಕ್ಯಾಬಿನೆಟ್ ನಲ್ಲಿ ಚರ್ಚಿಸಿ ತೀರ್ಮಾನಿಸಲಾಗುವುದು ಎಂದು ಭರವಸೆ ನೀಡಿದರು. ಕೊಡವ ಸಮಾಜದ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಅವರು ಮಹತ್ವದ ಘೋಷಣೆ ನೀಡಿದ್ದಾರೆ.
ವಸಂತನಗರದ ಕೊಡವ ಸಭಾಂಗಣದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಸಿಎಂ ಮಾತನಾಡಿ, “ಕೊಡವ ಸಮಾಜ ಶಿಸ್ತು, ದೇಶ ಸೇವೆ ಮತ್ತು ಸಾಂಸ್ಕೃತಿಕ ಮಟ್ಟದಲ್ಲಿ ದೇಶದ ಪ್ರಮುಖ ಆಸ್ತಿಯಾಗಿದೆ. ಫೀಲ್ಡ್ ಮಾರ್ಷಲ್ ಕಾರ್ಯಪ್ಪ ಅವರಂತೆ ದೇಶಕ್ಕೆ ಅಪಾರ ಸೇವೆ ಸಲ್ಲಿಸಿದ ವ್ಯಕ್ತಿಯ ಹೆಸರನ್ನು ಮೆಟ್ರೋ ನಿಲ್ದಾಣಕ್ಕೆ ಇಡುವ ವಿಚಾರವನ್ನು ಮಂತ್ರಿಮಂಡಲದಲ್ಲಿ ಚರ್ಚಿಸಿ ನಿರ್ಧಾರಕ್ಕೆ ಬರುವೆವು” ಎಂದು ಹೇಳಿದರು.
ಶಾಸಕ ಪೊನ್ನಣ್ಣ ಅವರ ಭವಿಷ್ಯ ಕುರಿತು ಮಾತನಾಡಿದ ಸಿಎಂ, “ಅವರು ಕೊಡವ ಸಮಾಜದ ಶ್ರೇಷ್ಠ ಆಸ್ತಿಯಾಗಿದ್ದು, ಇಂತಹವರನ್ನು ಬೆಂಬಲಿಸಿದರೆ ಅವರು ರಾಜ್ಯದ ಮಹತ್ವದ ನಾಯಕರಾಗಬಲ್ಲರು. ಇವರಲ್ಲಿ ಫೈರ್ಬ್ರಾಂಡ್ ರಾಜಕಾರಣಿಯ ಲಕ್ಷಣಗಳಿವೆ” ಎಂದು ಹೇಳಿದರು.
ಕೊಡವ ಸಮಾಜದ ಬಗ್ಗೆ ಪ್ರಶಂಸಾ ಪೂರ್ವಕ ಮಾತುಗಳು:
- ದೇಶಸೇವೆ, ಸೈನ್ಯ, ಕ್ರೀಡೆ ಮತ್ತು ಆಡಳಿತ ಕ್ಷೇತ್ರಗಳಲ್ಲಿ ಕೊಡವರು ತಮ್ಮದೇ ಆದ ವಿಶಿಷ್ಟ ಸ್ಥಾನ ಹೊಂದಿದ್ದಾರೆ ಎಂದು ಸಿಎಂ ಸಿದ್ದರಾಮಯ್ಯ ಹೇಳಿದರು.
- ಮಾಜಿ ಶಾಸಕರಾದ ಎ.ಕೆ.ಸುಬ್ಬಯ್ಯ ಮತ್ತು ಎಂ.ಸಿ.ನಾಣಯ್ಯ ಅವರ ಸಮಾಜಮುಖಿ ಧೋರಣೆಯ ಉದಾಹರಣೆ ನೀಡಿ, ಇಂದಿನ ಯುವ ರಾಜಕಾರಣಿಗಳು ಅದನ್ನು ಅನುಸರಿಸಬೇಕು ಎಂದು ಹೇಳಿದರು.
ಎಲ್ಲಾ ಸಮುದಾಯಗಳಿಗೆ ಜಾಗದ ಹಂಚಿಕೆ ವೇಳೆ ಸರ್ಕಾರ ನಿಗದಿಪಡಿಸಿರುವ ಮಾರ್ಗಸೂಚಿಗಳಂತೆ ಶೇಕಡಾ 10ರಷ್ಟು ಬೆಲೆಗೆ ಜಾಗ ನೀಡಲಾಗುವುದು. ಈ ನಿಯಮದಡಿಯಲ್ಲಿ ಕೊಡವ ಸಮಾಜಕ್ಕೂ ಜಾಗ ನೀಡಲಾಗಿದೆ ಎಂದು ತಿಳಿಸಿದರು.
“ಜಾತಿ, ಧರ್ಮ ಎಲ್ಲವೂ ಮನೆಯೊಳಗೆ ಇರಲಿ. ನಾವು ಬುದ್ಧಿವಂತರು, ಭಾರತೀಯರು ಎಂಬ ಜ್ಞಾನ ಎಲ್ಲರಲ್ಲೂ ಇರಬೇಕು. ದೇಶದ ಏಕತೆಗೆ ಮತ್ತು ಸೌಹಾರ್ದತೆಗೆ ಕೊಡವ ಸಮಾಜ ನಿಜವಾದ ಮಾದರಿಯಾಗಿದೆ” ಎಂದು ಸಿದ್ದರಾಮಯ್ಯ ಹೇಳಿದರು.
ಕಾರ್ಯಕ್ರಮದಲ್ಲಿ ಡಿಸಿಎಂ ಡಿ.ಕೆ. ಶಿವಕುಮಾರ್, ಸಚಿವರುಗಳು ಕೆ.ಜೆ. ಜಾರ್ಜ್, ಬೈರತಿ ಸುರೇಶ್, ಕೃಷ್ಣ ಬೈರೇಗೌಡ ಹಾಗೂ ಶಾಸಕ ಮಂಥರ್ ಗೌಡ, ಮುಖ್ಯಮಂತ್ರಿಗಳ ಕಾನೂನು ಸಲಹೆಗಾರ ಪೊನ್ನಣ್ಣ ಹಾಜರಿದ್ದರು.
