ಮೈಸೂರು : ಅನಿಲ ಗ್ರಾಹಕರ ಸುರಕ್ಷತೆಗೆ ಆದ್ಯತೆ ವಹಿಸಿರುವ ತೈಲ ಕಂಪನಿಗಳು, ಅನಿಲ ಸೋರಿಕೆಯಾಗಿ ಸಂಭವಿಸುವ ಅಗ್ನಿ ಅವಘಡಗಳನ್ನು ತಪ್ಪಿಸಲು ಗ್ರಾಹಕರಿಗೆ ಫೈರ್ ಬಾಲ್ಗಳನ್ನು ವಿತರಿಸಲು ಮುಂದಾಗಿವೆ.
ಅನಿಲ ಸೋರಿಕೆಯಿಂದಾಗಿ ಸಾಕಷ್ಟು ಮನೆಗಳಲ್ಲಿಅಗ್ನಿ ಅನಾಹುತ ಸಂಭವಿಸಿ ಪ್ರಾಣ ಹಾನಿಯೊಂದಿಗೆ ಆಸ್ತಿಪಾಸ್ತಿ ನಷ್ಟ ಉಂಟಾಗುತ್ತಿರುವುದನ್ನು ಮನಗಂಡು ತೈಲ ಕಂಪನಿಗಳು ಗ್ಯಾಸ್ ಸಿಲಿಂಡರ್ನ ಮೇಲ್ಭಾಗದಲ್ಲಿಇಡುವಂತಹ ಬಾಲ್ ಆಕೃತಿಯ ಅಗ್ನಿ ನಂದಕ ಸಾಧನವನ್ನು ಪರಿಚಯಿಸಿದ್ದು, ಅನಿಲ ಗ್ರಾಹಕರ ಸುರಕ್ಷತೆಗಾಗಿ ಮನೆ-ಮನೆಗೆ ತಲುಪಿಸುವ ಕಾರ್ಯವನ್ನು ಮಾಡುತ್ತಿವೆ.
ಗ್ಯಾಸ್ ಸಿಲಿಂಡರ್ಗಳನ್ನು ಪೂರೈಕೆ ಮಾಡುವ ಗ್ಯಾಸ್ ಏಜೆನ್ಸಿಗಳ ಮೂಲಕ ಗೃಹ ಬಳಕೆ ಮತ್ತು ವಾಣಿಜ್ಯ ಬಳಕೆಯ ಗ್ರಾಹಕರಿಗೆ ಅಗ್ನಿ ಅನಾಹುತ ತಡೆಗೆ ಫೈರ್ ಬಾಲ್ಗಳನ್ನು ಬಳಸುವಂತೆ ಮಾಹಿತಿ ನೀಡುವ ಮೂಲಕ ಜಾಗೃತಿ ಮೂಡಿಸಲಾಗುತ್ತಿದೆ.
”ಪ್ರತಿ ಐದು ವರ್ಷಕ್ಕೊಮ್ಮೆ ಅನಿಲ ಗ್ರಾಹಕರ ಮನೆಗೆ ಭೇಟಿ ನೀಡುವ ಮೂಲಕ ಗ್ಯಾಸ್ ಸ್ಟೌ, ರೆಗ್ಯುಲೇಟರ್ ಮತ್ತು ರಬ್ಬರ್ ಟ್ಯೂಬ್ಗಳನ್ನು ಪರಿಶೀಲಿಸುವ ಮೂಲಕ ಯಾವುದೇ ಅನಾಹುತವಾಗದಂತೆ ಎಚ್ಚರಿಕೆ ವಹಿಸುತ್ತಿರುವ ತೈಲ ಕಂಪನಿಗಳ ಅಧಿಕಾರಿಗಳು ಮತ್ತು ಸಿಬ್ಬಂದಿ, ಸುರಕ್ಷತೆಗೆ ಆದ್ಯತೆ ನೀಡಿದ್ದಾರೆ.
ಆದರೆ, ಕೆಲವೊಮ್ಮೆ ಗ್ಯಾಸ್ ಪೈಪ್ನಿಂದ ಅನಿಲ ಸೋರಿಕೆ ಮತ್ತು ರೆಗ್ಯುಲೇಟರ್ನಲ್ಲಿದೋಷವುಂಟಾಗಿ ಸೋರಿಕೆಯಾಗಿ ಬೆಂಕಿ ಕಾಣಿಸಿಕೊಳ್ಳುತ್ತಿರುವುದರಿಂದ ತಕ್ಷಣ ಬೆಂಕಿಯನ್ನು ನಿಯಂತ್ರಿಸುವುದು ಅಸಾಧ್ಯವಾಗಲಿದೆ ಎಂಬುದನ್ನು ಮನಗಂಡು, ಸಿಲಿಂಡರ್ ಬಳಿಯೇ ಇಡಲು ಅನುಕೂಲವಾಗುವಂತಹ ಬೆಂಕಿ ಕಾಣಿಸಿದ ತಕ್ಷಣ ಆರಿಸುವಂತಹ ಗ್ರಾಹಕ ಸ್ನೇಹಿ ಫೈರ್ ಬಾಲ್ಗಳನ್ನು ನೀಡಲಾಗುತ್ತಿದೆ,” ಎನ್ನುತ್ತಾರೆ ಗ್ಯಾಸ್ ಏಜೆನ್ಸಿಯೊಂದರ ಮಾಲೀಕರು.
ಫೈರ್ ಬಾಲ್ ವಿಶೇಷ – 400 ಗ್ರಾಂ. ತೂಕದ ಫೈರ್ ಬಾಲ್ ಅನ್ನು ರಬ್ಬರ್ನಿಂದ ಮಾಡಲಾಗಿದ್ದು, ಬೆಂಕಿಯನ್ನು ನಂದಿಸುವಂತಹ ಡ್ರೈ ಕೆಮಿಕಲ್ ಪೌಡರ್ ಇರಿಸಲಾಗಿರುತ್ತದೆ. ಬೆಂಕಿಯಿಂದ ತಾಪಮಾನ ಹೆಚ್ಚಾಗುತ್ತಿದ್ದಂತೆ ಬಾಲ್ ಸ್ಫೋಟಗೊಂಡು ಬಾಲ್ನೊಳಗಿನ ಪೌಡರ್ ಮೂರರಿಂದ ಐದು ಸೆಕೆಂಡ್ಗಳಲ್ಲಿಬೆಂಕಿಯನ್ನು ನಂದಿಸುತ್ತದೆ. ಇದನ್ನು ಎಲ್ಪಿಜಿ ಎಕ್ಯುಪ್ಮೆಂಟ್ ರೀಸರ್ಚ್ ಸೆಂಟರ್ ಕೂಡ ಇದರ ಬಳಕೆಗೆ ಅನುಮೋದನೆ ನೀಡಿದೆ.
ಎಲ್ಲೆಡೆ ಬಳಕೆ – ಈ ಫೈರ್ ಬಾಲ್ ಅನ್ನು ಗೃಹ ಬಳಕೆಯೊಂದಿಗೆ ಹೋಟೆಲ್ಗಳಲ್ಲಿಯೂ ಬಳಕೆ ಮಾಡಬಹುದಾಗಿದೆ. ಜತೆಗೆ ಆಸ್ಪತ್ರೆ, ಸೂಪರ್ ಮಾರ್ಕೆಟ್ ಮತ್ತು ಸಣ್ಣ ಪುಟ್ಟ ಕೈಗಾರಿಕೆಗಳಲ್ಲಿಯೂ ಬಳಕೆ ಮಾಡಬಹುದಾಗಿದೆ. ಬಹುತೇಕ ದೊಡ್ಡ ಹೋಟೆಲ್ಗಳಲ್ಲಿ ಆಗ್ನಿ ಸುರಕ್ಷತೆಗೆ ಆದ್ಯತೆ ನೀಡಲಾಗಿದೆ.
ಆದರೆ, ಸಣ್ಣಪುಟ್ಟ ಹೋಟೆಲ್ಗಳಲ್ಲಿ ಅಗ್ನಿಸುರಕ್ಷತೆಯೇ ದೊಡ್ಡ ಸವಾಲಾಗಿದೆ. ಇಂತಹ ಕಡೆ ಗ್ಯಾಸ್ ಸಿಲಿಂಡರ್ನೊಂದಿಗೆ ಫೈರ್ ಬಾಲ್ಗಳನ್ನು ಬಳಕೆ ಮಾಡಿದರೆ ಅಗ್ನಿ ಅನಾಹುತದಿಂದ ಪಾರಾಗಬಹುದಾಗಿದೆ ಎಂದು ಮೈಸೂರು ಜಿಲ್ಲಾ ಹೋಟೆಲ್ ಮಾಲೀಕರ ಸಂಘದ ಅಧ್ಯಕ್ಷ ನಾರಾಯಣಗೌಡ ಅವರು ಹೇಳಿದರು.
ತೈಲ ಕಂಪನಿಗಳು ತಮ್ಮ ಅನಿಲ ಗ್ರಾಹಕರ ಹಿತದೃಷ್ಟಿಯಿಂದ ಎಲ್ಲಾ ಗ್ಯಾಸ್ ಏಜೆನ್ಸಿಗಳ ಮೂಲಕ ಫೈರ್ ಬಾಲ್ಗಳನ್ನು ಗ್ರಾಹಕರಿಗೆ ನೀಡಲು ಕ್ರಮ ವಹಿಸಿವೆ. ಗ್ರಾಹಕರ ಸುರಕ್ಷತೆ ದೃಷ್ಟಿಯಿಂದ ಈ ಬಗ್ಗೆ ಮಾಹಿತಿ ನೀಡುವ ಮೂಲಕ ಜಾಗೃತಿ ಮೂಡಿಸಲಾಗುತ್ತಿದೆ. ಎಂದು ಭಾರತೀಯ ಎಲ್ಪಿಜಿ ವಿತರಕರ ಸಂಘದ ರಾಜ್ಯಾಧ್ಯಕ್ಷ ಮೆಹುಲ್ ಜಿ.ಪಟೇಲ್ ಹೇಳಿದರು.
