ದಾವಣಗೆರೆ : “ಆರೋಗ್ಯವಿಲ್ಲ, ಆದರೂ ಕನಸು ಬಿಟ್ಟುಬಿಡಲಿಲ್ಲ.” ದಾವಣಗೆರೆ ಜಿಲ್ಲೆಯ ನಿಟ್ಟುವಳಿ ಗ್ರಾಮದ ಸರಕಾರಿ ಶಾಲೆಯ ವಿದ್ಯಾರ್ಥಿನಿ ಶಾಂತಾ ಈ ಮಾತಿಗೆ ಸಾಕ್ಷಿಯಾಗಿ, ಬ್ಲಡ್ ಕ್ಯಾನ್ಸರ್ನಂತಹ ಗಂಭೀರ ಕಾಯಿಲೆಯ ವಿರುದ್ಧ ಹೋರಾಡಿ, ಈ ಬಾರಿಯ ಎಸ್ಎಸ್ಎಲ್ಸಿ ಫಲಿತಾಂಶದಲ್ಲಿ 94% ಅಂಕ ಗಳಿಸಿ ಶಾಲೆಗೆ ಪ್ರಥಮ ಸ್ಥಾನ ಪಡೆದು ಇಡೀ ರಾಜ್ಯದ ಗಮನ ಸೆಳೆದಿದ್ದಾಳೆ.
9ನೇ ತರಗತಿಯ ಅರ್ಧವಾರ್ಷಿಕ ಪರೀಕ್ಷೆ ವೇಳೆ ಶಾಂತಾಗೆ ಬ್ಲಡ್ ಕ್ಯಾನ್ಸರ್ ಎಂಬ ಗಂಭೀರ ರೋಗ ಪತ್ತೆಯಾಯಿತು. ಆ ಸಮಯದಲ್ಲಿ ವೈದ್ಯಕೀಯ ವೆಚ್ಚಕ್ಕೆ ತಂದೆ-ತಾಯಿ ತೀವ್ರ ಸಂಕಷ್ಟಕ್ಕೆ ಸಿಲುಕಿದರು. ತಂದೆ ಗಾರೆ ಕೆಲಸ ಮಾಡುತ್ತಿದ್ದರೆ, ತಾಯಿ ದಿನಗೂಲಿ ಕೆಲಸ ಮಾಡಿ ಕುಟುಂಬವನ್ನು ಸಾಗಿಸುತ್ತಿದ್ದರು. ಆರ್ಥಿಕ ಪರಿಸ್ಥಿತಿಯು ಸರಿಯಿಲ್ಲದಿದ್ದರೂ ಶಾಂತಾಳ ಚಿಕಿತ್ಸೆಗೆ ಅಗತ್ಯವಿದ್ದ 13 ಲಕ್ಷ ರೂ. ವೆಚ್ಚವನ್ನು ಸಾರ್ವಜನಿಕರ ನೆರವು ಹಾಗೂ ಶಾಲಾ ಶಿಕ್ಷಕರ ಸಹಕಾರದಿಂದ ಸಂಗ್ರಹಿಸಲಾಯಿತು.
ವಿದ್ಯಾರ್ಥಿನಿ ಶಾಂತಾ ಒಂದು ವರ್ಷ ಶಾಲೆಗೆ ಗೈರಾಗಿದ್ದರೂ, ಚಿಕಿತ್ಸೆ ಪಡೆಯುವ ಸಂದರ್ಭದಲ್ಲಿಯೇ ಮನೋಬಲ ಕಳೆದುಕೊಳ್ಳಲಿಲ್ಲ. ಏನಾದರೂ ಗೊಂದಲ ಉಂಟಾದಾಗ ಶಿಕ್ಷಕರಿಗೆ ಕರೆ ಮಾಡಿ ಸ್ಪಷ್ಟತೆ ಪಡೆದು ಮನೆಯಲ್ಲಿಯೇ ಅಧ್ಯಯನ ಮುಂದುವರೆಸಿದಳು. “ಈ ಬಾರಿ ಎಸ್ಎಸ್ಎಲ್ಸಿ ಪರೀಕ್ಷೆಯಲ್ಲಿ ನಾನು ನನ್ನ ಜೀವದ ಪಣವಿಟ್ಟು ಓದುತ್ತೇನೆ” ಎಂಬ ದೃಢ ನಿಲುವಿನಿಂದ, ಶಾಂತಾ ತನ್ನ ಆರೋಗ್ಯ ಸಮಸ್ಯೆಗಳನ್ನು ಲೆಕ್ಕಿಸದೆ ದಿನವೂ ನಿಗದಿತ ಪಾಠ, ಅಭ್ಯಾಸ ಹಾಗೂ ಪರೀಕ್ಷಾ ತಯಾರಿ ನಡೆಸಿದಳು.
ಅಂತಿಮವಾಗಿ 2025ರ ಎಸ್ಎಸ್ಎಲ್ಸಿ ಫಲಿತಾಂಶದಲ್ಲಿ ಶಾಂತಾಳ ಶ್ರಮ ಫಲವತ್ತಾಗಿ, ಶಾಲೆಗೆ ಪ್ರಥಮ ಸ್ಥಾನ ಹಾಗೂ 94% ಅಂಕಗಳ ಮೂಲಕ ರಾಜ್ಯದ ಮಟ್ಟದಲ್ಲಿಯೂ ಗಮನ ಸೆಳೆಯುವ ಸಾಧನೆ ಮಾಡಿದ್ದಾಳೆ. ಈ ಸಾಧನೆಯ ಬಳಿಕ ನಿಟ್ಟುವಳ್ಳಿ ಗ್ರಾಮದಲ್ಲಿ ಸಂಭ್ರಮದ ವಾತಾವರಣ ನಿರ್ಮಾಣವಾಗಿದ್ದು, ಶಾಲೆಯ ಶಿಕ್ಷಕರು, ಪೋಷಕರು ಹಾಗೂ ಗ್ರಾಮಸ್ಥರು ಶಾಂತಾಳ ಸಾಧನೆಗೆ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.
ಶಾಂತಾಳ ಈ ಯಶಸ್ಸು ಅನೇಕ ವಿದ್ಯಾರ್ಥಿಗಳಿಗೆ ಪ್ರೇರಣೆಯ ಕಥೆಯಾಗಿದ್ದು, “ಆರೋಗ್ಯ ಸಮಸ್ಯೆಯಿದೆ, ಆರ್ಥಿಕ ಸಹಾಯವಿಲ್ಲ” ಎಂಬ ಅನೇಕ ಶರಣಾಗತ ಮನಸ್ಥಿತಿಗೆ ತಕ್ಕ ಉತ್ತರ ನೀಡಿದಂತಾಗಿದೆ. ಆಕೆಯ ಸಾಧನೆ ಶಕ್ತಿ, ಮನೋಬಲ ಹಾಗೂ ಶಿಕ್ಷಣದ ಮೇಲೆ ನಂಬಿಕೆ ಇಟ್ಟಿದ್ದರೆ ಎಲ್ಲವನ್ನೂ ಸಾಧ್ಯವನ್ನಾಗಿಸಬಹುದು ಎಂಬ ಸತ್ಯವನ್ನು ಸಾಬೀತುಪಡಿಸಿದೆ.
