ಟೊಮೆಟೊ ಆರೋಗ್ಯಕ್ಕೂ ಕೂಡ ತುಂಬಾ ಪ್ರಯೋಜನಕಾರಿ. ಟೊಮೆಟೊ ಹಣ್ಣಿನಲ್ಲಿ ಆರೋಗ್ಯಕ್ಕೆ ಅನುಕೂಲಕರವಾಗಿ ಬೇಕಾದ ಬಹಳಷ್ಟು ವಿಟಮಿನ್ ಅಂಶಗಳು ಮತ್ತು ಖನಿಜಾಂಶಗಳು ಇರುತ್ತವೆ. ಟೊಮೆಟೋ ಹಣ್ಣು ಹೃದಯಕ್ಕೆ ಮತ್ತು ಹೃದಯ ರಕ್ತನಾಳದ ಆರೋಗ್ಯಕ್ಕೆ ಹೇಗೆ ಪ್ರಯೋಜನ ತಂದುಕೊಡುತ್ತದೆ ಎಂಬುದರ ಬಗ್ಗೆ ಇಲ್ಲಿದೆ ಮಾಹಿತಿ.
ಹೃದಯಕ್ಕೆ ಒಳ್ಳೆಯದು
ಟೊಮೆಟೊ ಜ್ಯೂಸ್ ನಲ್ಲಿ ವಿಟಮಿನ್ ಸಿ ಮತ್ತು ವಿಟಮಿನ್ ಈ ಅಂಶ ಇದೆ. ಇದರಿಂದ ಹೃದಯದ ಆರೋಗ್ಯಕ್ಕೆ ಪ್ರಯೋಜನ ಸಿಗುತ್ತದೆ. ಏಕೆಂದರೆ ರಕ್ತದ ಒತ್ತಡವನ್ನು ದೇಹದಲ್ಲಿ ನಿರ್ವಹಣೆ ಮಾಡಿಕೊಳ್ಳಲು ಪ್ರಮುಖವಾಗಿ ಪೊಟ್ಯಾಶಿಯಂ ಪ್ರಮಾಣ ಮುಖ್ಯವಾಗಿರುತ್ತದೆ. ಇದು ದೇಹದಲ್ಲಿ ಹೆಚ್ಚಾದ ಸೋಡಿಯಂ ಪ್ರಮಾಣವನ್ನು ಕಡಿಮೆ ಮಾಡುತ್ತದೆ ಎಂದು ಹೇಳುತ್ತಾರೆ. ಲೈಕೋಪಿನ್ ಹೃದಯ ರಕ್ತನಾಳಗಳನ್ನು ಬಲಪಡಿಸುವುದರ ಜೊತೆಗೆ ರಕ್ತದಲ್ಲಿ ಕೊಲೆಸ್ಟ್ರಾಲ್ ಮಟ್ಟವನ್ನು ಸಹ ನಿರ್ವಹಣೆ ಮಾಡುತ್ತದೆ. ಇದರಿಂದ ಕ್ರಮೇಣವಾಗಿ ಮುಂಬರುವ ದಿನಗಳಲ್ಲಿ ಪಾರ್ಶ್ವವಾಯು ಮತ್ತು ಹೃದಯದ ಕಾಯಿಲೆ ಎದುರಾಗುವ ಸಾಧ್ಯತೆ ಇರುವುದಿಲ್ಲ. ಆರೋಗ್ಯಕರವಾಗಿ ಜೀವಿಸಬಹುದು.
ಜೀರ್ಣಶಕ್ತಿಯನ್ನು ಉತ್ತಮಪಡಿಸುತ್ತದೆ
ಕರುಳಿನ ಭಾಗದಲ್ಲಿ ಸರಿಯಾದ ಚಲನೆ ಇಲ್ಲದೆ ಇರುವ ಸಮಸ್ಯೆಯನ್ನು ಸಾಮಾನ್ಯವಾಗಿ ವಯಸ್ಸಾದವರು ಎದುರಿಸುತ್ತಾರೆ. ದೇಹದ ಜೀರ್ಣ ಶಕ್ತಿಯನ್ನು ಅಭಿವೃದ್ಧಿ ಪಡಿಸಲು ಟೊಮೆಟೊ ಜ್ಯೂಸ್ ನಲ್ಲಿ ಸಿಗುವಂತಹ ನಾರಿನ ಪ್ರಮಾಣ ಸಹಾಯಮಾಡುತ್ತದೆ. ಇದು ದೇಹದ ಲಿವರ್ ಭಾಗದಲ್ಲಿ ಕೂಡ ಆರೋಗ್ಯಕರ ವಾತಾವರಣವನ್ನು ನಿರ್ಮಾಣ ಮಾಡಿ ಮಲಬದ್ಧತೆ ಸಮಸ್ಯೆಯನ್ನು ಹೋಗಲಾಡಿಸಿ ಕರುಳಿನ ಚಲನೆಯನ್ನು ಉತ್ತಮಪಡಿಸುತ್ತದೆ.
ಬೊಜ್ಜು ಕರಗಿಸಲು ಸಹಕಾರಿ
ಟೊಮೆಟೊ ಜ್ಯೂಸ್ ಪ್ರಮುಖವಾಗಿ ತನ್ನಲ್ಲಿ ಆಂಟಿ ಇನ್ಫಾಮೇಟರಿ ಗುಣಲಕ್ಷಣಗಳನ್ನು ಒಳಗೊಂಡಿರುತ್ತದೆ. ಇದರಿಂದ ಇದು ಉರಿಯೂತವನ್ನು ನಿವಾರಣೆ ಮಾಡುತ್ತದೆ ಜೊತೆಗೆ ತೂಕವನ್ನು ಕಡಿಮೆ ಮಾಡಲು ಸಹ ನೆರವಾಗುತ್ತದೆ. ನಮ್ಮ ದೇಹದ ಹಾರ್ಮೋನ್ ಹೊಟ್ಟೆ ತುಂಬಿದ ಸಮಯದಲ್ಲಿ ನಮ್ಮ ಮೆದುಳಿಗೆ ಸಂಕೇತದ ಮೂಲಕ ಆಹಾರ ತಿನ್ನುವುದನ್ನು ನಿಲ್ಲಿಸಬೇಕು ಎನ್ನುವ ಸೂಚನೆ ಕೊಡುತ್ತದೆ. ಇದರಿಂದ ಹೊಟ್ಟೆ ಹಸಿವು ಕಡಿಮೆಯಾಗುತ್ತದೆ ಮತ್ತು ದೇಹದ ತೂಕ ಕಡಿಮೆ ಮಾಡಿಕೊಳ್ಳಲು ನೆರವಾಗುತ್ತದೆ. ಹೆಚ್ಚಾಗಿ ದೇಹದ ತೂಕ ಹೊಂದಿರುವ ಮಹಿಳೆಯರಿಗೆ ಇದು ಸಹಕಾರಿ. ಮಧುಮೇಹ ಮತ್ತು ಹೃದಯ ರಕ್ತನಾಳದ ಕಾಯಿಲೆಗಳನ್ನು ನಿಯಂತ್ರಣ ಮಾಡಿಕೊಳ್ಳಲು ಸಹಾಯವಾಗುತ್ತದೆ.
ದೃಷ್ಟಿ ದೋಷ ಪರಿಹಾರ
ಟೊಮೇಟೊ ಹಣ್ಣಿನ ಜ್ಯೂಸ್ ನಲ್ಲಿ ಬೀಟಾ-ಕ್ಯಾರೋಟಿನ್, ಲೂಟನ್, ವಿಟಮಿನ್ ಸಿ ಮತ್ತು ಇನ್ನಿತರ ಕಣ್ಣುಗಳಿಗೆ ಅನುಕೂಲಕರವಾಗಿ ಬೇಕಾದ ಪೌಷ್ಟಿಕ ಸತ್ವಗಳು ಸಾಕಷ್ಟಿವೆ. ಇವುಗಳು ವಯಸ್ಸಾದ ನಂತರದಲ್ಲಿ ಜನರಿಗೆ ಬರುವಂತಹ ಕಣ್ಣಿನ ಪೊರೆ ಸಮಸ್ಯೆಗೆ ವಿರುದ್ಧವಾಗಿ ಕೆಲಸ ಮಾಡುತ್ತವೆ. ಹೀಗಾಗಿ ಜನರು ಟೊಮೇಟೊ ಹಣ್ಣಿನ ಜ್ಯೂಸ್ ಅನ್ನು ಆರಂಭದಿಂದಲೇ ಸೇವನೆ ಮಾಡಿಕೊಂಡು ಬಂದರೆ ಆನಂತರದಲ್ಲಿ ಇಂತಹ ತೊಂದರೆ ಎದುರಾಗುವ ಸಾಧ್ಯತೆಯಿಂದ ತಪ್ಪಿಸಿಕೊಳ್ಳಬಹುದು.
