ನಮ್ಮ ಭಾರತದಲ್ಲಿ ಸಾಕಷ್ಟು ‘ಅದ್ಭುತ’ ಎಂದು ಹೇಳಬಲ್ಲ ಗಿರಿಧಾಮಗಳಿವೆ. ಒಂದೊಂದು ಗಿರಿಧಾಮಗಳು ತನ್ನದೇ ಆದ ಪ್ರವಾಸಿ ಆಕರ್ಷಣೆಗಳಿಗೆ ಹೆಸರುವಾಸಿಯಾಗಿದೆ. ಯಾವಾಗಲೂ ನೋಡಿದ್ದೇ ತಾಣಗಳಿಗೆ ಪ್ರವಾಸ ಯೋಜಿಸುವ ಬದಲು ಈ ಬಾರಿ ಸ್ನೇಹಪರ ಗಿರಿಧಾಮವಾಗಿರುವ ಪಶ್ಚಿಮ ಬಂಗಾಳಕ್ಕೆ ಹೋಗಿ.
ಡಾರ್ಜಿಲಿಂಗ್ ತನ್ನ ಹಿಮಭರಿತ ಹಾಗು ಹಿಮಾಲಯದ ಅದ್ಭುತ ಶ್ರೇಣಿಗಳನ್ನು ಹೊಂದಿದೆ. ವಾಸ್ತವವಾಗಿ, ಡಾರ್ಜಿಲಿಂಗ್ ಒಂದು ಅಪರೂಪದ ಗಿರಿಧಾಮಗಳಲ್ಲಿ ಒಂದಾಗಿದೆ. ಇಲ್ಲಿ ನೀವು ಟಾಯ್ ಟ್ರೈನ್, ತೋಟಗಳು, ಭವ್ಯವಾದ ಮಠಗಳು, ಆಳವಾದ ಕಣಿವೆಗಳನ್ನು ನೋಡಬಹುದು. ಡಾರ್ಜಿಲಿಂಗ್ ನಲ್ಲಿರುವ ಪ್ರಮುಖ ಪ್ರವಾಸಿ ಆಕರ್ಷಣೆಗಳು ಯಾವುವು ಎಂಬುದನ್ನು ಇಲ್ಲಿ ನೀಡಲಾಗಿದೆ ಓದಿ.
ಟಾಯ್ ಟ್ರೈನ್
ಶಿಮ್ಲಾದಂತೆ ಡಾರ್ಜಿಲಿಂಗ್ನಲ್ಲಿ ಕೂಡ ಟಾಯ್ ಟ್ರೈನ್ ಇದೆ. ಇದು ಹಿಮಾಲಯದ ಅದ್ಭುತವಾದ ದೃಶ್ಯಾವಳಿಗಳನ್ನು ಪ್ರಯಾಣಿಕರಿಗೆ ಒದಗಿಸುತ್ತದೆ. ಈ ಹಿಮಾಲಯನ್ ರೈಲು ನಿಲ್ದಾಣವು ಡಾರ್ಜಿಲಿಂಗ್ ನ ಪ್ರಮುಖ ಪ್ರವಾಸಿ ತಾಣಗಳಲ್ಲಿ ಒಂದು ಕೂಡ ಹೌದು.
ನ್ಯೂ ಜಲ್ಪೈಗುರಿಯಿಂದ ಆರಂಭಗೊಂಡು ಡಾರ್ಜಿಲಿಂಗ್ನಲ್ಲಿ ಕೊನೆಗೊಳ್ಳುತ್ತದೆ. ಮಾರ್ಗ ಮಧ್ಯೆಯಲ್ಲಿ ಹಿಮಾಲಯದ ರಮಣೀಯ ವಿಶ್ರಾಂತಿ ಸ್ಥಳಗಳು, ಸಮೃದ್ಧವಾಗಿ ಬೆಳೆದ ಚಹಾ ತೋಟಗಳನ್ನು ನೋಡುತ್ತೀರಿ. ಮಾರ್ಚ್ ನಿಂದ ಸೆಪ್ಟೆಂಬರ್ ತಿಂಗಳ ನಡುವೆ ನೀವು ಪಶ್ಚಿಮ ಬಂಗಾಳದ ಟಾಯ್ ಟ್ರೈನ್ ಪ್ರಯಾಣ ಕೈಗೊಳ್ಳಲು ಉತ್ತಮ ಸಮಯವಾಗಿದೆ.
ರಾಕ್ ಗಾರ್ಡನ್
ರಾಕ್ ಗಾರ್ಡನ್ ಡಾರ್ಜಿಲಿಂಗ್ನ ಮತ್ತೊಂದು ಪ್ರಮುಖ ಪ್ರವಾಸಿ ಆಕರ್ಷಣೆಯಾಗಿದೆ. ಡಾರ್ಜಿಲಿಂಗ್ನಲ್ಲಿ ಭೇಟಿ ನೀಡಲೇಬೇಕಾದ ಸ್ಥಳ ಇದಾಗಿದೆ. ಅಲಂಕರಿಸಲ್ಪಟ್ಟ ಕೃತಕ ಕಲ್ಲಿನ ಉದ್ಯಾನ,ಸ್ವಚ್ಛಂಧವಾಗಿ ಧುಮ್ಮಿಕ್ಕುವ ಜಲಪಾತಗಳು, ಹಸಿರು ಸಸ್ಯಗಳಿಂದ ರಾಕ್ ಗಾರ್ಡನ್ ಕಂಗೊಳಿಸುತ್ತಿದೆ.
ಕುದುರೆ ಸವಾರಿ, ಫೋಟೋಗ್ರಫಿ ಮತ್ತು ಹೈಕಿಂಗ್ ನಂತಹ ಚಟುವಟಿಕೆಗಳನ್ನು ಇಲ್ಲಿ ಬಹಳಷ್ಟು ಎಂಜಾಯ್ ಮಾಡಬಹುದು. ಡಾರ್ಜಿಲಿಂಗ್ನಲ್ಲಿ ಪಿಕ್ನಿಕ್ ಮಾಡಲು ಇದು ಪರಿಪೂರ್ಣವಾದ ತಾಣವಾಗಿದೆ.
ಟೈಗರ್ ಹಿಲ್ಸ್
ಸಂಗಾತಿಗಳು ಟೈಗರ್ ಹಿಲ್ಸ್ನ ರಮಣೀಯತೆಗೆ ಮಾರು ಹೋಗುವುದರಲ್ಲಿ ಯಾವುದೇ ಸಂಶಯವಿಲ್ಲ. ಸ್ನೇಹಪರ ವಾತಾವರಣ, ಸೂರ್ಯನ ಆಕರ್ಷಣೀಯ ನೋಟ, ಎತ್ತ ನೋಡಿದರು ನೈಸರ್ಗಿಕ ವೈಭವವೇ ನಿಮ್ಮ ಕಣ್ಣ ಮುಂದೆ ಹಾದು ಹೋಗುತ್ತದೆ. ಇಂತಹ ಮೋಡಿಮಾಡುವ ನೋಟವನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿಯುವುದನ್ನು ಮರೆಯದಿರಿ.
ಇಲ್ಲಿ ಫೋಟೋಗ್ರಫಿ ಮತ್ತು ಹೈಕಿಂಗ್ ಗಳನ್ನು ಕೈಗೊಳ್ಳಬಹುದು.
ಬಟಾಸಿಯಾ ಲೂಪ್
ಡಾರ್ಜಿಲಿಂಗ್ನ ವೆಸ್ಟ್ ಪಾಯಿಂಟ್ನಲ್ಲಿ ಈ ಬಟಾಸಿಯಾ ಲೂಪ್ ಇದೆ. ಎತ್ತರದ ಪ್ರದೇಶದಲ್ಲಿರುವ ಈ ಆಕರ್ಷಣೆ, ಶಿಖರದ ಮೇಲಿನ ಅಂಡರ್ಪಾಸ್ ಮೂಲಕ ರೈಲ್ವೇ ಹಳಿಗಳನ್ನು ಸುತ್ತಿಕೊಂಡಿದೆ. ಇಲ್ಲಿನ ಉದ್ಯಾನ ಪ್ರದೇಶವು ನೋಡುಗರನ್ನು ಮಂತ್ರಮುಗ್ಧಗೊಳಿಸುತ್ತದೆ. ಸಂಗಾತಿಗಳ್ಳಿಬ್ಬರು ಮಧುರವಾದ ಕ್ಷಣಗಳನ್ನು ಕಳೆಯಲು ಇಲ್ಲಿಗೆ ತಪ್ಪದೇ ಭೇಟಿ ನೀಡಬೇಕು.
ಪದ್ಮಜಾ ನಾಯ್ಡು ಝೂಲಾಜಿಕಲ್ ಪಾರ್ಕ್
ನೀವು ವನ್ಯಜೀವಿ ಪ್ರೇಮಿಗಳಾಗಿದ್ದರೆ ಈ ಪದ್ಮಜಾ ನಾಯ್ಡು ಝೂಲಾಜಿಕಲ್ ಪಾರ್ಕ್ಗೆ ತಪ್ಪದೇ ಭೇಟಿ ನೀಡಿ. ಬೃಹತ್ ಸಂಖ್ಯೆಯ ಹಿಮ ಚಿರತೆಗಳಿಗೆ ವಾಸಿಸುವ ಅಭಯಾರಣ್ಯ ಇದಾಗಿದ್ದು, ಶ್ರೀಮಂತ ವನ್ಯಜೀವಿಗಳನ್ನು ನೋಡಬಹುದು.
ಉದ್ಯಾನವನದಲ್ಲಿ ಹಿಮಾಲಯದ ಕರಡಿಗಳು, ಟಿಬೆಟಿಯನ್ ತೋಳಗಳು, ಮೋಡದ ಚಿರತೆಗಳು ಮತ್ತು ಕೆಂಪು ಪಾಂಡಾಗಳನ್ನು ನೋಡಬಹುದು. ಛಾಯಾಗ್ರಹಣ ಹಾಗು ದೃಶ್ಯವೀಕ್ಷಣೆಗೆ ಈ ಪಾರ್ಕ್ ಬಹಳಷ್ಟು ಜನಪ್ರಿಯವಾಗಿದೆ.
