ಮೈಸೂರು: ಅಖಿಲ ಭಾರತ ವಾಕ್ ಶ್ರವಣ ಸಂಸ್ಥೆಯ ನಿರ್ದೇಶಕರ ವಿರುದ್ಧ ಸಿಬಿಐ ತನಿಖೆ ನಡೆಸುವಂತೆ ಮೈಸೂರಿನ ಐಶ್ನ ಆಡಿಯಾಲಜಿಯ ವಿಭಾಗದ ನಿವೃತ್ತ ಪ್ರಾಧ್ಯಾಪಕಿ ಡಾ.ಕೆ.ರಾಜಲಕ್ಷ್ಮಿ ಒತ್ತಾಯಿಸಿದ್ದಾರೆ.
ಈ ಕುರಿತು ಸುದ್ಧಿಗೋಷ್ಠಿ ನಡೆಸಿ ಮಾತನಾಡಿದ ನಿವೃತ್ತ ಪ್ರಾಧ್ಯಾಪಕಿ ಡಾ.ಕೆ.ರಾಜಲಕ್ಷ್ಮಿ, ಪ್ರಸ್ತುತ ಐಶ್ ನಿರ್ದೇಶಕರು ಶಿಕ್ಷಣದ ಮೇಲೆ ಹೆಚ್ಚು ಗಮನಹರಿಸುವ ಬದಲು, ಮೈಸೂರು ನಿರ್ಮಾಣ ಮತ್ತು ಗುತ್ತಿಗೆ ಸಂಬಂಧಿತ ಕೆಲಸಗಳಲ್ಲಿ ಹೆಚ್ಚು ತೊಡಗಿಸಿಕೊಂಡಿದ್ದಾರೆ, ಇದರಿಂದಾಗಿ ಸಂಸ್ಥೆಯ ಶ್ರೇಯಾಂಕವು A ನಿಂದ B++ ಗೆ ಇಳಿದಿದೆ ಹಾಗೂ ಸಂಶೋಧನೆಗೆ ಸಂಬಂಧಿಸಿದ ಕೆಲಸಗಳು ಸಂಪೂರ್ಣ ಕುಸಿದಿದೆ. ಇಂತಹ ಆಡಳಿತ ಕೌಶಲ್ಯದ ಕೊರತೆಯಿಂದಾಗಿ, ಯಾವುದೇ ತಪ್ಪಿಲ್ಲದ ನೌಕರರು ಬಹಳಷ್ಟು ತೊಂದರೆಗೆ ಒಳಗಾಗಿದ್ದಾರೆ, ಇದರಿಂದಾಗಿ ಕೆಲವರು ಸ್ವಯಂ ನಿವೃತ್ತಿ ತೆಗೆದುಕೊಳ್ಳುವಂತೆ ಮಾಡಿದೆ ಎಂದು ಆರೋಪಿಸಿದ್ದಾರೆ.
ಈಗಾಗಲೇ ನಾನು AIISH ನ ಕಾರ್ಯಕಾರಿ ಮಂಡಳಿಯ ಅಧ್ಯಕ್ಷರಿಗೆ ಈ ಸಂಬಂಧ ಪತ್ರವನ್ನು ಕಳುಹಿಸಿದ್ದೇನೆ. ಕಳೆದ ಮೂರು ವರ್ಷಗಳಲ್ಲಿ ವಿವಿಧ ಅಕ್ರಮಗಳಿವೆ; ಈ ಬಗ್ಗೆ ನಾವು ಅವರ ಗಮನಕ್ಕೆ ತಂದರು ಅವರು ಯಾವುದೇ ಕ್ರಮ ತೆಗೆದುಕೊಂಡಿಲ್ಲ. ಹೀಗಾಗಿ ಸಂಸ್ಥೆಯ ಕುಂದುಕೊರತೆಗಳನ್ನು ಪರಿಹರಿಸಲು ಮತ್ತು ಅಕ್ರಮಗಳನ್ನು ಹೊರತರಲು ಇದೊಂದೇ ಅವಕಾಶ ಎಂದು ನಾನು ಭಾವಿಸಿದೆ. ಹಾಲಿ ಇರುವ ನಿರ್ದೇಶಕರು ಪಾರದರ್ಶಕವಾಗಿಲ್ಲ ಮತ್ತು ಆಡಳಿತಾತ್ಮಕ ಕಾರ್ಯವಿಧಾನಗಳು ಮತ್ತು ಅಧಿಕೃತ ಔಪಚಾರಿಕತೆಗಳ ಬಗ್ಗೆ ಪರಿಚಿತರಾಗಿಲ್ಲ, ಇದರಿಂದಾಗಿ ಅನೇಕ ಸಿಬ್ಬಂದಿ ಅಸಮಾಧಾನಗೊಂಡಿದ್ದಾರೆ. ಅಲ್ಲದೇ ಅನೇಕ ಸಿಬ್ಬಂದಿ ಸ್ವಯಂ ನಿವೃತ್ತಿಗಾಗಿ ಪತ್ರಗಳನ್ನು ಸಲ್ಲಿಸುತ್ತಿದ್ದಾರೆ ಎಂದು ಹೇಳಿದರು.
ಸೆಂಟರ್ ಆಫ್ ಎಕ್ಸಲೆನ್ಸ್‌ ಗೆ ಸಂಬಂಧಿಸಿದ ಕಾಮಗಾರಿ, ಲಿಫ್ಟ್ ಖರೀದಿ, ಪೀಠೋಪಕರಣ, ಕೇಬಲ್ ಹಾಕುವ ಕಾಮಗಾರಿ, ಸೌಂಡ್ ಪ್ರೂಫ್ ರೂಂ ಸೇರಿದಂತೆ ನಾನಾ ಅಭಿವೃದ್ಧಿ ಕಾಮಗಾರಿಗಳನ್ನು ಕೈಗೆತ್ತಿಕೊಂಡು ಹಣ ದುರುಪಯೋಗವಾಗುತ್ತಿದೆ. ಡಿಜಿ ಜನರೇಟರ್ ಖರೀದಿ, ಜೆನೆಟಿಕ್ ಲ್ಯಾಬ್‌ಗಳ ಸ್ಥಾಪನೆ, ರಾಸಾಯನಿಕಗಳು ಮತ್ತು ಇತರ ಸಂಬಂಧಿತ ಉಪಕರಣಗಳ ಖರೀದಿಯ ಸಮಯದಲ್ಲಿ ಹಣದ ದುರುಪಯೋಗವೂ ಇದೆ. 2022 ರ ಜನವರಿ 1 ರಿಂದ ಮಾರ್ಚ್ 31 ರವರೆಗೆ ಕಾರ್ಯಗತಗೊಳಿಸಿದ ಕಂಪ್ಯೂಟರ್ ನೆಟ್‌ವರ್ಕಿಂಗ್, ಲ್ಯಾನ್ ನೆಟ್‌ವರ್ಕ್, ಸಿಸಿ ಟಿವಿ ಕ್ಯಾಮೆರಾಗಳನ್ನು ಒದಗಿಸುವುದು, ಮೈಸೂರಿನ ಎಐಐಎಸ್‌ಎಚ್ ಮುಖ್ಯ ಮತ್ತು ಪಂಚವಟಿ ಕ್ಯಾಂಪಸ್‌ ನಲ್ಲಿ ವೈಫೈ ನೆಟ್‌ವರ್ಕ್ ಒದಗಿಸುವಿಕೆಗೆ ಸಂಬಂಧಿಸಿದ ಕೆಲಸಗಳ ವಿವರಗಳನ್ನು ಪಡೆಯಲು ಸಿಬಿಐಗೆ ನಾನು ವಿನಂತಿಸುತ್ತೇನೆ ಎಂದು ರಾಜಲಕ್ಷ್ಮಿ ಮನವಿ ಮಾಡಿದ್ದಾರೆ.
