ಮುಂಬಯಿ: ಸಲ್ಮಾನ್ ಖಾನ್‌ ಸಿನಿ ಕೆರಿಯರ್‌ ನಲ್ಲಿ ಸೂಪರ್‌ ಹಿಟ್‌ ಕೊಟ್ಟ ʼಟೈಗರ್ʼ ಸರಣಿಯ ಮೂರನೇ ಭಾಗದ ಟ್ರೇಲರ್‌ ರಿಲೀಸ್ ಆಗಿದೆ.
ಸಲ್ಮಾನ್ ಖಾನ್‌ ಹಾಗೂ ಕತ್ರೀನಾ ಕೈಫ್‌ ಮುಖ್ಯಭೂಮಿಕೆಯ ʼಟೈಗರ್-3ʼ ಇಮ್ರಾನ್‌ ಹಶ್ಮಿ ನೆಗೆಟಿವ್‌ ಲುಕ್‌ ನಲ್ಲಿ ಕಾಣಿಸಿಕೊಂಡಿದ್ದಾರೆ.
ಸ್ಪೈ ಯೂನಿವರ್ಸ್‌ ನಲ್ಲಿ ಬಂದ ಈ ಹಿಂದಿನ ʼಟೈಗರ್ ಜಿಂದಾ ಹೈʼ, ʼವಾರ್‌ʼ, ʼಪಠಾಣ್‌ʼ ಸಿನಿಮಾಗಳ ಕಥೆಯ ಹಿನ್ನೆಲೆ ಹಾಗೂ ಕಥೆಯಲ್ಲಿನ ಘಟನೆಗಳ ಸುತ್ತ ʼಟೈಗರ್-3ʼ ಕಥೆ ಸಾಗುತ್ತದೆ ಎಂದು ಸಿನಿಮಾ ತಂಡ ಹೇಳಿತ್ತು.
ದೇಶಕ್ಕಾಗಿ ಹೋರಾಡುವ ಏಜೆಂಟ್‌ ಆಗಿ ಕಾಣಿಸಿಕೊಂಡಿದ್ದ ʼಟೈಗರ್ʼ(ಸಲ್ಮಾನ್) ಈ ಬಾರಿ ವೈಯಕ್ತಿಕವಾಗಿ ತನ್ನ ಕುಟುಂಬದ ಜೊತೆ ದೇಶವನ್ನೂ ರಕ್ಷಣೆ ಮಾಡುವ ಮಿಷನ್‌ ನಲ್ಲಿ ಕಾಣಿಸಿಕೊಂಡಿದ್ದಾರೆ.
ಪಾಕ್‌ ನೆಲದಲ್ಲಿದ್ದು ʼಟೈಗರ್ʼ ಗೆ ಸವಾಲು ಎಸೆಯುವ ನೆಗೆಟಿವ್‌ ಪಾತ್ರ (ಇಮ್ರಾನ್‌ ಹಶ್ಮಿ) ಟೈಗರ್ ಕುಟುಂಬಕ್ಕೆ ಹಾನಿ ಮಾಡುವ ಪ್ಲ್ಯಾನ್‌ ಹಾಕಿರುತ್ತಾರೆ. ಇದನ್ನು ಟೈಗರ್ ಹೇಗೆ ಎದುರಿಸುತ್ತಾರೆ ಎನ್ನುವುದನ್ನು ಟ್ರೇಲರ್‌ ನಲ್ಲಿ ಫೈಟ್‌, ಗನ್‌ ಶೂಟ್‌, ಸಾಹಸ ದೃಶ್ಯಗಳ ಮೂಲಕ ತೋರಿಸಲಾಗಿದೆ.
“ಎಲ್ಲಿಯವರೆ ಟೈಗರ್ ಸತ್ತಿಲ್ಲವೋ, ಅಲ್ಲಿಯವರೆಗೆ ಟೈಗರ್ ಸೋತಿಲ್ಲ” ಎನ್ನುವ ಡೈಲಾಗ್ಸ್‌ ಗಳ ಜೊತೆ ʼಟೈಗರ್-3ʼ ನಲ್ಲಿನ ಜಬರ್‌ ದಸ್ತ್‌ ಸ್ಟಂಟ್‌ ಗಳು ಗಮನ ಸೆಳೆಯುತ್ತದೆ.
ಮನೀಶ್‌ ಶರ್ಮಾ ʼಟೈಗರ್-3ʼ ಸಿನಿಮಾಕ್ಕೆ ಆ್ಯಕ್ಷನ್ ಕಟ್‌ ಹೇಳಲಿದ್ದಾರೆ. ಯಶ್‌ ರಾಜ್ ಫಿಲ್ಮ್ಸ್‌ ಸಿನಿಮಾಕ್ಕೆ ಬಂಡವಾಳ ಹಾಕಿದೆ. ಯಶ್‌ ರಾಜ್ ಫಿಲ್ಮ್ಸ್‌ ಅವರ 50ನೇ ಚಿತ್ರ ಇದಾಗಿದ್ದು, ಹಿಂದಿ, ತಮಿಳು ಹಾಗೂ ತೆಲುಗು ಭಾಷೆಯಲ್ಲಿ ಸಿನಿಮಾ ತೆರೆಗೆ ಬರಲಿದೆ.
ನವೆಂಬರ್‌ 12 ರಂದು ಸಿನಿಮಾ ರಿಲೀಸ್ ಆಗಲಿದೆ. ಆ ಮೂಲಕ ದೀಪಾವಳಿ ಹಬ್ಬಕ್ಕೆ ಸಲ್ಮಾನ್ ಬಾಕ್ಸ್‌ ಆಫೀಸ್‌ ಗಳಿಕೆಯತ್ತ ಕಣ್ಣಿಟ್ಟಿದ್ದಾರೆ.
