ಬೆಂಗಳೂರು: ಒಳಮೀಸಲಾತಿ ಸಮೀಕ್ಷೆಯಲ್ಲಿ ಜಾತಿ ಕೋಡ್ ತಪ್ಪಾಗಿ ನಮೂದಿಸಿದ ಪ್ರಕರಣವೊಂದು ರಾಜ್ಯದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಕರ್ತವ್ಯ ನಿರ್ವಹಣೆಯಲ್ಲಿ ತೋರಿಸಿದ ಗಂಭೀರ ನಿರ್ಲಕ್ಷ್ಯಕ್ಕೆ ಶಿಕ್ಷಕನೊಬ್ಬನನ್ನು ಅಮಾನತುಗೊಳಿಸಲು ರಾಜ್ಯ ಸರ್ಕಾರ ಆದೇಶ ನೀಡಿದೆ.
ಲಿಂಗಸುಗೂರು ತಾಲ್ಲೂಕಿನ ಹೆಗ್ಗಾಪೂರ ತಾಂಡಾದ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಶಿಕ್ಷಕರಾದ ಶ್ರೀ ಸೋಮಪ್ಪ ತಂದೆ ಭೀಮಪ್ಪ ಅವರು ಒಳಮೀಸಲಾತಿ ಸಮೀಕ್ಷೆ ನಡೆಸುವಾಗ ಲಂಬಾಣಿ ಎಂಬ ಜಾತಿಯ ಬದಲು ಆದಿ ಆಂಧ್ರ ಎಂದು ತಪ್ಪಾಗಿ ಕೋಡ್ ನಮೂದಿಸಿರುವ ಆರೋಪದ ಮೇರೆಗೆ ಅಮಾನತುಗೊಳಿಸಲಾಗಿದೆ. ಈ ತಪ್ಪಿನಿಂದ ಸುಮಾರು 50 ಮನೆಗಳ ಸಮೀಕ್ಷಾ ಮಾಹಿತಿ ತಪ್ಪಾಗಿ ದಾಖಲಾಗಿರುವುದಾಗಿ ಅಧಿಕಾರಿಗಳ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಸೋಮಪ್ಪ ಅವರು ಸಮೀಕ್ಷಾ ಕಾರ್ಯದ ವೇಳೆ ‘ಲಂಬಾಣಿ’ ಜಾತಿಗೆ ಹೊಂದಿರುವ ಕೋಡ್ ನಂ. 017.2 ಅನ್ನು ಬಳಸಬೇಕಿದ್ದರೆ, ಅವರು ತಪ್ಪಾಗಿ ‘ಆದಿ ಆಂಧ್ರ’ ಎಂಬ ಕೋಡ್ ನಂ. 001 ಅನ್ನು ಆಯ್ಕೆ ಮಾಡಿದ್ದಾರೆ. ಈ ತಪ್ಪನ್ನು ಗುರುತಿಸಿದ ನಂತರ ಸ್ಥಳೀಯ ಆಲ್ ಇಂಡಿಯಾ ಬಂಜಾರ ಸೇವಾ ಸಂಘ ಹಾಗೂ ತಹಶೀಲ್ದಾರ್ ವರದಿ ಸಲ್ಲಿಸಿದ್ದಾರೆ.
ಅವರು ಮಾಸ್ಟರ್ ಟ್ರೈನರ್ ಗಳು ಸರಿಯಾಗಿ ತರಬೇತಿ ಪಡೆದಿದ್ದರೂ, ‘ಜಾತಿ ಕೋಡ್’ ಆಯ್ಕೆ ಮಾಡುವುದರಲ್ಲಿ ಬೇಜವಾಬ್ದಾರಿತನ ತೋರಿದ್ದರೆಂದು ವರದಿಯಲ್ಲಿ ಉಲ್ಲೇಖವಾಗಿದೆ. ಈ ಕುರಿತು ಅವರೊಂದಿಗೆ ವಿಡಿಯೋ ಸಂವಾದವೂ ನಡೆಸಲಾಗಿತ್ತೆಂಬುದಾಗಿ ಹೇಳಲಾಗಿದೆ.
ರಾಯಚೂರು ಜಿಲ್ಲಾಧಿಕಾರಿ ಕೆ. ನಿತೀಶ್ ಭಾಜ. ಅವರು ಕರ್ನಾಟಕ ನಾಗರೀಕ ಸೇವಾ ನಿಯಮಗಳ ಪ್ರಕಾರ ಅಮಾನತು ಆದೇಶ ಹೊರಡಿಸಿದ್ದಾರೆ. ಈ ಆದೇಶದಂತೆ, ಶ್ರೀ ಸೋಮಪ್ಪ ಅವರ ವಿರುದ್ಧದ ಆರೋಪಗಳ ವಿಚಾರಣೆಯನ್ನು ಕಾಯ್ದಿರಿಸಿ, ಸೇವೆಯಿಂದ ಅಮಾನತು ಮಾಡಲಾಗಿದೆ. ಅಮಾನತುಗೊಂಡಿದ್ದರೂ, ನಾಗರೀಕ ಸೇವಾ ನಿಯಮಗಳ ಪ್ರಕಾರ ಅವರು “ಜೀವನಾಂಶ ಭತ್ಯೆ” ಪಡೆಯಲು ಅರ್ಹರಾಗಿರುತ್ತಾರೆ. ಜೊತೆಗೆ ಅವರು ಸಕ್ಷಮ ಪ್ರಾಧಿಕಾರ ಅನುಮತಿ ಇಲ್ಲದೆ ತಮ್ಮ ನೇಮಾಂಕಿತ ಸ್ಥಾನವನ್ನು ತ್ಯಜಿಸಬಾರದೆಂಬ ನಿಯಮವೂ ಸ್ಪಷ್ಟಪಡಿಸಲಾಗಿದೆ.
ಈ ಘಟನೆ ರಾಜ್ಯಾದ್ಯಾಂತ ನಡೆಯುತ್ತಿರುವ ಒಳಮೀಸಲಾತಿ ಸಮೀಕ್ಷೆಯ ಪ್ರಾಮುಖ್ಯತೆಯನ್ನು ತೋರಿಸುತ್ತಿದೆ. ಸಮಾಜದ ವಿವಿಧ ವರ್ಗಗಳ ದತ್ತಾಂಶಗಳ ಸಂಗ್ರಹಣೆ ಅತ್ಯಂತ ನಿಖರವಾಗಿರಬೇಕಾದ ಸಂದರ್ಭದಲ್ಲಿ, ಈ ರೀತಿಯ ನಿರ್ಲಕ್ಷ್ಯವು ಸಮೀಕ್ಷೆಯ ವಿಶ್ವಾಸಾರ್ಹತೆಯನ್ನು ತೀರಾ ಹಾನಿಗೊಳಿಸಬಹುದು. ಸರ್ಕಾರವು ತಕ್ಷಣ ಕ್ರಮ ಕೈಗೊಂಡಿದ್ದು, ಇತರ ಸಿಬ್ಬಂದಿಗೆ ಎಚ್ಚರಿಕೆಯ ಸಂದೇಶವನ್ನೂ ನೀಡಿದೆ.
