ಮಂಡ್ಯ: ಮಂಡ್ಯ ಜಿಲ್ಲೆಯ ಪ್ರಮುಖ ಪ್ರವಾಸಿ ತಾಣಗಳಲ್ಲಿ ಒಂದಾದ ಶ್ರೀರಂಗಪಟ್ಟಣದ ಕೆಆರ್ಎಸ್ (ಕೃಷ್ಣರಾಜ ಸಾಗರ) ಅಣೆಕಟ್ಟು ಹಾಗೂ ಬೃಂದಾವನ ಉದ್ಯಾನವನವನ್ನು ವೀಕ್ಷಿಸಲು ಪ್ರತಿದಿನ ಸಾವಿರಾರು ಮಂದಿ ಪ್ರವಾಸಿಗರು ಆಗಮಿಸುತ್ತಿದ್ದಾರೆ. ರಾಜ್ಯದ ಮೂಲವರಷ್ಟೇ ಅಲ್ಲದೆ ಹೊರ ರಾಜ್ಯಗಳಿಂದಲೂ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಬರುವ ಈ ಸ್ಥಳದಲ್ಲಿ ಇದೀಗ ಪ್ರವಾಸಿಗರ ಜೇಬಿಗೆ ಬಿಸಿ ತಟ್ಟುವಂತಹ ನಿರ್ಧಾರ ಕೈಗೊಳ್ಳಲಾಗಿದೆ.
ಹೌದು, ಬೃಂದಾವನಕ್ಕೆ ಹಾಗೂ ಅದಕ್ಕೆ ನೆರೆಯ ಗ್ರಾಮಗಳಿಗೆ ಸಂಪರ್ಕ ಕಲ್ಪಿಸುವ ಉದ್ದೇಶದಿಂದ 2003–04ರಲ್ಲಿ ಕಾವೇರಿ ನದಿಗೆ ಅಡ್ಡಲಾಗಿ 7 ಕೋಟಿ ರೂಪಾಯಿ ವೆಚ್ಚದಲ್ಲಿ 500 ಮೀಟರ್ ಉದ್ದದ ಸೇತುವೆ ನಿರ್ಮಿಸಲಾಗಿತ್ತು. ಸೇತುವೆ ನಿರ್ಮಾಣ ವೆಚ್ಚವನ್ನು ಮರಳಿ ಸಂಗ್ರಹಿಸುವ ನಿಟ್ಟಿನಲ್ಲಿ ನಾಲ್ಕು ಚಕ್ರದ ವಾಹನಗಳಿಗೆ ₹50 ಮತ್ತು ಆರು ಚಕ್ರದ ವಾಹನಗಳಿಗೆ ₹100 ಟೋಲ್ ಶುಲ್ಕ ವಸೂಲಿ ಮಾಡಲಾಗುತ್ತಿತ್ತು.
ಆದರೆ ಇದೀಗ, ಈ ಸೇತುವೆ ನಿರ್ಮಾಣ ವೆಚ್ಚಕ್ಕಿಂತ ಎರಡು ಪಟ್ಟು ಹೆಚ್ಚಾಗಿ ಮೊತ್ತವನ್ನು ಈಗಾಗಲೇ ಟೋಲ್ ಮೂಲಕ ಸಂಗ್ರಹಿಸಲಾಗಿದ್ದು, ಇತ್ತೀಚೆಗೆ ಅನೇಕರು ಈ ಕುರಿತು ವಿರೋಧ ವ್ಯಕ್ತಪಡಿಸುತ್ತಿದ್ದರು. ಆದರೂ, ಜಿಲ್ಲೆಯ ಪ್ರವಾಸೋದ್ಯಮ ಇಲಾಖೆಯ ನಿರ್ಧಾರದಿಂದಾಗಿ ಟೋಲ್ ದರಗಳನ್ನು ಮತ್ತಷ್ಟು ಹೆಚ್ಚಿಸಲಾಗಿದೆ. ಈಗ ಟೋಲ್ ಮತ್ತು ಪಾರ್ಕಿಂಗ್ ಸೇರಿ ₹200 ವಸೂಲಾತಿ ಮಾಡಲಾಗುತ್ತಿದೆ. ಈ ದರವನ್ನು ಮೂರು ಪಟ್ಟು ಹೆಚ್ಚಿಸಲಾಗಿದೆ ಎನ್ನಬಹುದು.
- ಮೊದಲಿಗೆ ₹50 ರ ಟೋಲ್ ಅನ್ನು ₹100ಗೆ ಮಾಡಲಾಗಿದೆ
- ₹50 ಪಾರ್ಕಿಂಗ್ ಶುಲ್ಕವೂ ₹100 ಆಗಿದೆ
- ಬೃಂದಾವನ ಪ್ರವೇಶ ಟಿಕೆಟ್ ದರವೂ ₹50ರಿಂದ ₹100ಕ್ಕೆ ಹೆಚ್ಚಾಗಿದೆ
ಹೀಗಾಗಿ, ಒಂದು ನಾಲ್ಕು ಚಕ್ರದ ವಾಹನದವರು ಬೃಂದಾವನ ವೀಕ್ಷಣೆಗಾಗಿ ಈಗ ಕನಿಷ್ಠ ₹200-₹300 ತೆರೆಯಬೇಕಾಗಿದೆ. ವಿಶೇಷವಾಗಿ, ಸೇತುವೆ ಕಳೆದು ಬೃಂದಾವನಕ್ಕೆ ಹೋಗದಿದ್ದರೂ ಸಹ ಅದನ್ನು ದಾಟುವ ಹತ್ತಿರದ ಗ್ರಾಮಸ್ಥರು ಕೂಡ ₹100 ಟೋಲ್ ನೀಡಬೇಕಾದ ಸ್ಥಿತಿಯಿದೆ. ಇದರಿಂದ ಸ್ಥಳೀಯರು ಹಾಗೂ ಪ್ರವಾಸಿಗರು ಇಬ್ಬರಿಗೂ ತೀವ್ರ ಅಸಮಾಧಾನ ಉಂಟಾಗಿದೆ.
ಈ ದರ ಏರಿಕೆಗೆ ಸಂಬಂಧಿಸಿದಂತೆ ಪ್ರವಾಸಿಗರು ಸಾಮಾಜಿಕ ಜಾಲತಾಣಗಳಲ್ಲಿ ಆಕ್ರೋಶ ವ್ಯಕ್ತಪಡಿಸುತ್ತಿದ್ದು, ಪ್ರವಾಸೋದ್ಯಮ ಇಲಾಖೆಯ ವಿರುದ್ಧ ತೀವ್ರ ಆಕ್ರೋಶ ಮೂಡುತ್ತಿದೆ.
