ನವದೆಹಲಿ : ಭಾರತವು ರಸಗೊಬ್ಬರ ಕ್ಷೇತ್ರದಲ್ಲಿ ಗಮನಾರ್ಹ ಪ್ರಗತಿ ಸಾಧಿಸಿದೆ. 2025ನೇ ಸಾಲಿನಲ್ಲಿ ದೇಶದ ಒಟ್ಟು ರಸಗೊಬ್ಬರ ಅಗತ್ಯತೆಯ 73 ಪ್ರತಿಶತವನ್ನು ದೇಶೀಯ ಉತ್ಪಾದನೆಯ ಮೂಲಕ ಪೂರೈಸಲಾಗಿದೆ ಎಂದು ರಾಸಾಯನಿಕ ಮತ್ತು ರಸಗೊಬ್ಬರ ಸಚಿವಾಲಯ ಹೇಳಿದೆ.
2025 ರಲ್ಲಿ ದೇಶೀಯ ರಸಗೊಬ್ಬರ ಉತ್ಪಾದನೆಯು ದಾಖಲೆಯ 524.62 ಲಕ್ಷ ಟನ್ (ಸುಮಾರು 52.462 ಮಿಲಿಯನ್ ಟನ್) ತಲುಪಿದ್ದು, ಇದು ಇಲ್ಲಿಯವರೆಗಿನ ಗರಿಷ್ಠ ಮಟ್ಟವಾಗಿದೆ. ಕಳೆದ 5 ವರ್ಷಗಳಲ್ಲಿ ಉತ್ಪಾದನೆಯಲ್ಲಿ ನಿರಂತರ ಏರಿಕೆ ಕಂಡುಬಂದಿದೆ. 2021 ರಲ್ಲಿ 433.29 ಲಕ್ಷ ಟನ್, 2022 ರಲ್ಲಿ 467.87 ಲಕ್ಷ ಟನ್, 2023 ರಲ್ಲಿ 507.93 ಲಕ್ಷ ಟನ್, 2024 ರಲ್ಲಿ 509.57 ಲಕ್ಷ ಟನ್, 2025 ರಲ್ಲಿ 524.62 ಲಕ್ಷ ಟನ್ ಉತ್ಪಾದನೆಯಾಗಿದೆ.
ಯೂರಿಯಾ, ಡಿಎಪಿ, ಎನ್ಪಿಕೆ ಮತ್ತು ಎಸ್ಎಸ್ಪಿ ಸೇರಿದಂತೆ ವಿವಿಧ ರೀತಿಯ ರಸಗೊಬ್ಬರ ಉತ್ಪಾದನೆಯಲ್ಲಿ ಸ್ಥಿರವಾದ ಬೆಳವಣಿಗೆಯನ್ನು ದೇಶ ಕಂಡಿದೆ. ಕೇಂದ್ರ ಸರ್ಕಾರದ ಆತ್ಮನಿರ್ಭರ ಭಾರತ್ ದೃಷ್ಟಿಕೋನದ ಅನ್ವಯ ಹೊಸ ಘಟಕಗಳ ಸ್ಥಾಪನೆ, ಸ್ಥಗಿತಗೊಂಡಿದ್ದ ಘಟಕಗಳ ಪುನರುಜ್ಜೀವನ, ದೇಶೀಯ ಉತ್ಪಾದನೆಗೆ ಪ್ರೋತ್ಸಾಹ ಮತ್ತು ಕಚ್ಚಾ ವಸ್ತುಗಳ ಲಭ್ಯತೆಯನ್ನು ಖಚಿತಪಡಿಸಿಕೊಳ್ಳುವ ನೀತಿಗಳಿಂದ ಆಮದು ಮೇಲಿನ ಅವಲಂಬನೆಯು ಕಡಿಮೆಯಾಗಿದೆ.
ರೈತರನ್ನು ಸಬಲೀಕರಿಸಲು ಮತ್ತು ದೇಶಾದ್ಯಂತ ರಸಗೊಬ್ಬರ ನಿರಂತರ ಹಾಗೂ ವಿಶ್ವಾಸಾರ್ಹ ಪೂರೈಕೆಯನ್ನು ಖಚಿತಪಡಿಸಿಕೊಳ್ಳಲು ಸಚಿವಾಲಯ ನಿರಂತರವಾಗಿ ಶ್ರಮಿಸುತ್ತಿದೆ. ಆತ್ಮನಿರ್ಭರ ಭಾರತ್ ದೃಷ್ಟಿಯೊಂದಿಗೆ ರಸಗೊಬ್ಬರ ಸುರಕ್ಷತೆಯನ್ನು ಮತ್ತಷ್ಟು ಬಲಪಡಿಸಲು ಬದ್ಧವಾಗಿದ್ದೇವೆ. ಈ ಸಾಧನೆಯು ಜಾಗತಿಕ ಅನಿಶ್ಚಿತತೆಗಳು ಮತ್ತು ಸರಬರಾಜು ಸರಪಳಿಯ ತೊಂದರೆಗಳಿಂದ ರಕ್ಷಣೆ ನೀಡುವ ಜೊತೆಗೆ, ರೈತರಿಗೆ ಸಮಯೋಚಿತ ರಸಗೊಬ್ಬರ ಲಭ್ಯತೆಯನ್ನು ಒದಗಿಸಿ ಕೃಷಿ ಆರ್ಥಿಕತೆಯನ್ನು ಬಲಪಡಿಸುತ್ತದೆ ಎಂದು ನಿರೀಕ್ಷಿಸಲಾಗಿದೆ ಎಂದು ರಾಸಾಯನಿಕ ಮತ್ತು ರಸಗೊಬ್ಬರ ಸಚಿವಾಲಯ ಹೇಳಿದೆ.
