‘Love Punch’ ಮೈಕ್ರೋ ಸರಣಿಯಲ್ಲಿ ಗ್ಲಾಮರಸ್ ಲುಕ್ ನಲ್ಲಿ ಮಿಂಚಿದ ‘ರಾಮಾಚಾರಿ’ ನಟಿ ಮೌನ ಗುಡ್ಡೆಮನೆ!

ಕನ್ನಡ ಕಿರುತೆರೆಯ ಜನಪ್ರಿಯ ಧಾರಾವಾಹಿ ‘ರಾಮಾಚಾರಿ’ ಮೂಲಕ ಪ್ರೇಕ್ಷಕರ ಮನ ಗೆದ್ದಿದ್ದ ನಟಿ ಮೌನ ಗುಡ್ಡೆಮನೆ ಇದೀಗ ಹೊಸ ಮೈಕ್ರೋ ಸರಣಿ ‘Love Punch’ ಮೂಲಕ ವಿಭಿನ್ನ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ. ಸೀರೆಯಲ್ಲಿ ಸಂಪ್ರದಾಯಬದ್ಧವಾಗಿ ಕಾಣಿಸಿಕೊಳ್ಳುತ್ತಿದ್ದ ಮೌನ, ಈ ಬಾರಿ ಬೋಲ್ಡ್ ಹಾಗೂ ಗ್ಲಾಮರಸ್ ಲುಕ್ ನಲ್ಲಿ ಅಭಿಮಾನಿಗಳ ಗಮನ ಸೆಳೆದಿದ್ದಾರೆ.

ಇಲ್ಲಿಯವರೆಗೆ ಮನೆಮಗಳ ಪಾತ್ರಗಳಲ್ಲಿ ಹೆಚ್ಚು ಗುರುತಿಸಿಕೊಂಡಿದ್ದ ಮೌನ ಗುಡ್ಡೆಮನೆ, ಡಿಜಿಟಲ್ ವೇದಿಕೆಯಲ್ಲಿ ಹೊಸ ರೀತಿಯ ಪಾತ್ರವನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ‘Love Punch’ ಸರಣಿಯಲ್ಲಿ ಅವರು ಬಿಕಿನಿ ಸೇರಿದಂತೆ ಸ್ಟೈಲಿಷ್ ಉಡುಪುಗಳಲ್ಲಿ ಕಾಣಿಸಿಕೊಂಡಿದ್ದು, ಈ ಲುಕ್ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ನಟಿಯ ಹೊಸ ಸ್ಟೈಲ್ ನೋಡಿ ಅಭಿಮಾನಿಗಳು ಅಚ್ಚರಿ ವ್ಯಕ್ತಪಡಿಸುತ್ತಿದ್ದು, ಹಲವರು ಮೆಚ್ಚುಗೆಯನ್ನೂ ವ್ಯಕ್ತಪಡಿಸಿದ್ದಾರೆ.

ಈ ಮೈಕ್ರೋ ಸರಣಿ ಬುಲೆಟ್ ಮೈಕ್ರೋಡ್ರಾಮಾ ಅಪ್ಲಿಕೇಶನ್ ನಲ್ಲಿ ಸ್ಟ್ರೀಮಿಂಗ್ ಆಗುತ್ತಿದೆ. ಇತ್ತೀಚೆಗೆ ನಿಧನರಾದ ನಿರ್ದೇಶಕ ದಿಲೀಪ್ ರಾಜ್ ಈ ಸರಣಿಗೆ ಆಕ್ಷನ್ ಕಟ್ ಹೇಳಿದ್ದಾರೆ. ಸರಣಿಯಲ್ಲಿ ಮೌನ ಜೊತೆಗೆ ಶರತ್ ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ನಂದಿನಿ ಮತ್ತು ಪ್ರೀತಮ್ ಎಂಬ ಯುವ ಪಾತ್ರಗಳ ಸುತ್ತ ಕಥೆ ಸಾಗುತ್ತದೆ.

‘Love Punch’ ಒಂದು ಕಾಲೇಜು ಜೀವನದ ಪ್ರೇಮಕಥೆಯಾಗಿದ್ದು, ಪರಸ್ಪರ ವಿರುದ್ಧ ಸ್ವಭಾವ ಹೊಂದಿರುವ ಇಬ್ಬರು ಯುವಕರ ಕಥೆಯನ್ನು ತೆರೆದಿಡುತ್ತದೆ. ಆರಂಭದಲ್ಲಿ ಒಬ್ಬರನ್ನೊಬ್ಬರು ಇಷ್ಟಪಡದ ನಂದಿನಿ ಮತ್ತು ಪ್ರೀತಮ್, ನಂತರ ನಿಧಾನವಾಗಿ ಪ್ರೀತಿಯಲ್ಲಿ ಬೀಳುತ್ತಾರೆ. ಆದರೆ ನಂದಿನಿ ತನ್ನ ಪ್ರೀತಿಯನ್ನು ಹೇಳಿಕೊಂಡಾಗ ಪ್ರೀತಮ್ ಅದನ್ನು ನಿರಾಕರಿಸುವುದು ಕಥೆಗೆ ಕುತೂಹಲಕರ ತಿರುವು ನೀಡುತ್ತದೆ. ಮೌನ ಗುಡ್ಡೆಮನೆ ಅವರ ಹೊಸ ಬೋಲ್ಡ್ ಅವತಾರ ಹಾಗೂ ವಿಭಿನ್ನ ಕಥಾಹಂದರದಿಂದ ‘Love Punch’ ಇದೀಗ ಕನ್ನಡ ಡಿಜಿಟಲ್ ಪ್ರೇಕ್ಷಕರ ಗಮನ ಸೆಳೆಯುತ್ತಿದೆ.