ಭಾರತ ಚಂದ್ರಯಾನ ಮಾಡಿದೆ, ತಂತ್ರಜ್ಞಾನದಲ್ಲಿ ಮುನ್ನುಗ್ಗುತ್ತಿದೆ ಎಂದು ನಾವು ಹೆಮ್ಮೆಯಿಂದ ಹೇಳಿಕೊಳ್ಳುತ್ತಿದ್ದೇವೆ. ಆದರೆ, ಅದೇ ಭಾರತದ ಸಮಾಜದ ಕರಾಳ ಗರ್ಭದಲ್ಲಿ ‘ವರದಕ್ಷಿಣೆ’ ಎಂಬ ಮಹಾಮಾರಿ ಇಂದಿಗೂ ಹೆಣ್ಣು ಮಕ್ಕಳ ಜೀವವನ್ನು ಜೀವಂತವಾಗಿ ನುಂಗುತ್ತಿದೆ. ರಾಷ್ಟ್ರೀಯ ಅಪರಾಧ ದಾಖಲೆಗಳ ಬ್ಯೂರೋ ಬಿಡುಗಡೆ ಮಾಡಿರುವ ಇತ್ತೀಚಿನ ಆಘಾತಕಾರಿ ಅಂಕಿ-ಅಂಶಗಳ ಪ್ರಕಾರ, ಭಾರತದಲ್ಲಿ ವರ್ಷಕ್ಕೆ 5,737 ಮಹಿಳೆಯರು ವರದಕ್ಷಿಣೆ ಕಿರುಕುಳಕ್ಕೆ ಬಲಿಯಾಗುತ್ತಿದ್ದಾರೆ. ಇದರರ್ಥ ದೇಶದಲ್ಲಿ ಪ್ರತಿದಿನ ಸರಾಸರಿ 16 ಹೆಣ್ಣು ಮಕ್ಕಳು ಮದುವೆಯಾದ ಕೆಲವೇ ದಿನಗಳಲ್ಲಿ ಗಂಡನ ಮನೆಯ ಕಿರುಕುಳ, ಗೃಹ ಹಿಂಸೆ ಅಥವಾ ಅನುಮಾನಾಸ್ಪದ ಸಾವುಗಳಿಗೆ ತುತ್ತಾಗುತ್ತಿದ್ದಾರೆ.
ದೇಶವನ್ನೇ ಬೆಚ್ಚಿಬೀಳಿಸಿದ ಇತ್ತೀಚಿನ ಕಣ್ಣೀರಿನ ಕಥೆಗಳು : ಕಾನೂನುಗಳು ಎಷ್ಟೇ ಕಠಿಣವಾಗಿದ್ದರೂ ಜನರ ಮನಸ್ಥಿತಿ ಬದಲಾಗಿಲ್ಲ ಎಂಬುದಕ್ಕೆ ಇತ್ತೀಚಿನ ಎರಡು ಘಟನೆಗಳೇ ಸಾಕ್ಷಿ, ಟ್ವಿಶಾ ಶರ್ಮಾ ಪ್ರಕರಣ; ಮದುವೆಯಾದ ಕೆಲವೇ ತಿಂಗಳುಗಳಲ್ಲಿ ಭೋಪಾಲ್ನಲ್ಲಿ ನಿಗೂಢವಾಗಿ ಸಾವನ್ನಪ್ಪಿದ ಟ್ವಿಶಾ, ಸಾಯುವ ಮುನ್ನ ತನ್ನ ತಾಯಿಗೆ ಕಳುಹಿಸಿದ್ದ ವಾಟ್ಸಾಪ್ ಸಂದೇಶ ಇಡೀ ದೇಶದ ಕಣ್ಣಾಲಿಗಳನ್ನು ಒದ್ದೆ ಮಾಡಿದೆ. ಆಕೆ ಮೆಸೇಜ್ನಲ್ಲಿ “ಅಮ್ಮಾ, ನನಗೆ ಇಲ್ಲಿ ತುಂಬಾ ಉಸಿರುಗಟ್ಟಿದಂತಾಗುತ್ತಿದೆ” ಎಂದು ಬರೆದುಕೊಂಡಿದ್ದಳು. ಹಣದ ಆಸೆಗೆ ಬಿದ್ದ ರಾಕ್ಷಸರು ಆಕೆಯ ಉಸಿರನ್ನೇ ನಿಲ್ಲಿಸಿಬಿಟ್ಟರು.
ದೀಪಿಕಾ ನಗರ್ ಪ್ರಕರಣ: ಕೇವಲ 24 ವರ್ಷದ ದೀಪಿಕಾ ಮದುವೆಗಾಗಿ ಆಕೆಯ ಪೋಷಕರು ಬರೋಬ್ಬರಿ 1 ಕೋಟಿ ರೂಪಾಯಿ ಖರ್ಚು ಮಾಡಿದ್ದರು. ಆದರೂ ದುರಾಶೆ ನಿಲ್ಲದ ಗಂಡನ ಮನೆಯವರು ಹೆಚ್ಚುವರಿ ವರದಕ್ಷಿಣೆಗಾಗಿ ಕಿರುಕುಳ ನೀಡಿ, ಕೊನೆಗೆ ಆಕೆ ಮಹಡಿಯಿಂದ ಬಿದ್ದು ಸಾವನ್ನಪ್ಪುವಂತೆ ಮಾಡಿದ್ದಾರೆ. ಇನ್ನು ಜನವರಿ 2026 ರಲ್ಲಿ ನಡೆದ ಘಟನೆಯಂತೂ ಮೈ ಜುಂ ಎನಿಸುವಂತಿದೆ. ದೇಶ ಕಾಯುವ ಮಹಿಳಾ ಸ್ವಾಟ್ (SWAT) ಕಮಾಂಡೋ ಅಧಿಕಾರಿಯನ್ನೂ ಸಹ ಆಕೆಯ ಪತಿ ವರದಕ್ಷಿಣೆಗಾಗಿ ಕೊಲೆ ಮಾಡಿದ್ದಾನೆ ಎಂದರೆ, ಈ ಪಿಡುಗು ಸಮಾಜದಲ್ಲಿ ಎಷ್ಟು ಆಳವಾಗಿ ಬೇರೂರಿದೆ ಎಂಬುದನ್ನು ಊಹಿಸಬಹುದು.
ಮೆಟ್ರೋ ನಗರಗಳಲ್ಲೂ ಇದೇ ಕರಾಳತೆ: ಬೆಂಗಳೂರಿನ ಸ್ಥಾನವೇನು? – ವರದಕ್ಷಿಣೆ ಕೇವಲ ಹಳ್ಳಿಗಳಿಗಷ್ಟೇ ಸೀಮಿತವಾಗಿಲ್ಲ, ಓದಿದ ಮಹಾನಗರಗಳ ಜನರಲ್ಲೂ ಈ ದುರಾಸೆ ತುಂಬಿ ತುಳುಕುತ್ತಿದೆ. ದೆಹಲಿ ನಂ.1: ದೇಶದ ರಾಜಧಾನಿ ದೆಹಲಿ ಸತತ ಐದನೇ ವರ್ಷವೂ ವರದಕ್ಷಿಣೆ ಸಾವುಗಳಲ್ಲಿ ಮೊದಲ ಸ್ಥಾನದಲ್ಲಿದೆ (2024 ರಲ್ಲಿ 111 ಸಾವುಗಳು). ಬೆಂಗಳೂರು ಮೂರನೇ ಸ್ಥಾನ: ಐಟಿ ಹಬ್ ಎಂದೇ ಕರೆಸಿಕೊಳ್ಳುವ ನಮ್ಮ ಬೆಂಗಳೂರಿನಲ್ಲಿ 25 ಪ್ರಕರಣಗಳು ದಾಖಲಾಗಿವೆ. ಇನ್ನು ರಾಜ್ಯಗಳ ಪಟ್ಟಿಯಲ್ಲಿ ಉತ್ತರ ಪ್ರದೇಶ ಮೊದಲ ಸ್ಥಾನದಲ್ಲಿದ್ದರೆ, ಬಿಹಾರ ಮತ್ತು ಕರ್ನಾಟಕ (2,322 ಪ್ರಕರಣಗಳು) ನಂತರದ ಸ್ಥಾನಗಳಲ್ಲಿವೆ.
ಆಶಾದಾಯಕ ಬೆಳವಣಿಗೆ: ದಕ್ಷಿಣದ ಪ್ರಮುಖ ನಗರಗಳಾದ ಚೆನ್ನೈ ಮತ್ತು ಕೊಚ್ಚಿಯಲ್ಲಿ 2024 ರಲ್ಲಿ ಒಂದೂ ವರದಕ್ಷಿಣೆ ಸಾವು ದಾಖಲಾಗಿಲ್ಲ ಎಂಬುದು ಸಮಾಧಾನಕರ ಸಂಗತಿಯಾಗಿದೆ. ಜಾಗೃತಿ ಸಂದೇಶ: ವರದಕ್ಷಿಣೆ ಸಾವು ಎಂದರೆ ಕೇವಲ ಸಾವಲ್ಲ, ಅದು ಸಮಾಜ ನಡೆಸುತ್ತಿರುವ ಕೊಲೆ, ಎನ್ನಲಾಗಿದೆ. ಕಾನೂನು ಏನು ಹೇಳುತ್ತದೆ? – ಭಾರತೀಯ ನ್ಯಾಯ ಸಂಹಿತೆಯ ಸೆಕ್ಷನ್ 80 (ಹಿಂದಿನ ಐಪಿಸಿ 304 ಬಿ) ಪ್ರಕಾರ, ಮದುವೆಯಾದ 7 ವರ್ಷಗಳ ಒಳಗೆ ಮಹಿಳೆ ಅಸ್ವಾಭಾವಿಕವಾಗಿ ಸಾವನ್ನಪ್ಪಿ, ಆಕೆಗೆ ವರದಕ್ಷಿಣೆಗಾಗಿ ಕಿರುಕುಳ ನೀಡಿದ್ದು ಸಾಬೀತಾದರೆ ಅದು ಗಂಭೀರ ಅಪರಾಧ ಮತ್ತು ಕಠಿಣ ಶಿಕ್ಷೆಗೆ ಅರ್ಹವಾಗಿರುತ್ತದೆ.
ನಾವು ಬದಲಾಗಬೇಕಿದೆ: ಪೋಷಕರೇ ನೆನಪಿಡಿ: ನಿಮ್ಮ ಮಗಳಿಗೆ ಕೋಟಿ ಕೋಟಿ ಹಣ, ಚಿನ್ನ ಕೊಟ್ಟು ಮದುವೆ ಮಾಡಿ ಕಳುಹಿಸುವ ಬದಲು, ಆಕೆಯನ್ನು ಸ್ವಾವಲಂಬಿಯನ್ನಾಗಿ ಮಾಡಿ. ಮದುವೆಯ ನಂತರ ಗಂಡನ ಮನೆಯಲ್ಲಿ ಕಿರುಕುಳ ಆರಂಭವಾದರೆ “ಹೊಂದಿಕೊಂಡು ಹೋಗು” ಎಂದು ಬಲಿಪೀಠಕ್ಕೆ ತಳ್ಳಬೇಡಿ. ಅವಳಿಗೆ ಧೈರ್ಯ ತುಂಬಿ ಮನೆಗೆ ವಾಪಸ್ ಕರೆತನ್ನಿ. ಸಾವು ಎಲ್ಲದಕ್ಕೂ ಪರಿಹಾರವಲ್ಲ.
ಯುವಕರೇ ಜಾಗೃತರಾಗಿ: ಮದುವೆಯ ಹೆಸರಿನಲ್ಲಿ ಹೆಣ್ಣಿನ ಮನೆಯವರಿಂದ ಹಣ, ಗಾಡಿ, ಆಸ್ತಿ ಆಶಿಸುವುದು ಭಿಕ್ಷಾಟನೆಗಿಂತ ಕೀಳು. ನಿಮ್ಮ ಸ್ವಂತ ದುಡಿಮೆಯ ಮೇಲೆ ನಂಬಿಕೆಯಿಟ್ಟು ಮದುವೆಯಾಗಿ. ಹೆಣ್ಣು ಮಕ್ಕಳೇ ಧ್ವನಿ ಎತ್ತಿ: ವರದಕ್ಷಿಣೆ ಬೇಡಿಕೆ ಇಡುವವರನ್ನು ಮದುವೆಯಾಗಲು ಆರಂಭದಲ್ಲೇ ನಿರಾಕರಿಸಿ. ಕಿರುಕುಳ ಮಿತಿಮೀರಿದರೆ ಸಹಿಸಬೇಡಿ, ತಕ್ಷಣ ಪೊಲೀಸ್ (Helpline: 112) ಸಹಾಯ ಪಡೆಯಿರಿ.
