ಗಜಮುಖನೆ ಸಿದ್ಧಿದಾಯಕನೆ

ಗಜಮುಖನೆ ಸಿದ್ಧಿದಾಯಕನೆ ವಂದಿಪೆ ಶರಣು

ತ್ರಿಜಗ ವಂದಿತನಾದ

ದೇವ ದೇವನೆ ಶರಣು |

ಸುಜನರಿಗೆ ವಿಘ್ನವನು ಪರಿಹರಿಪೆ ಶರಣು

||ಗಜಮುಖನೆ||

ಮಂದ ಮತಿಯನು ಬಿಡಿಸಿ

ಚಂದ ಜ್ಞಾನವನಿತ್ತು|

ಇಂದಿರೇಶನ ಪಾದ ಹೊಂದಿಪ್ಪ ತೆರದಿ|

ಸುಂದರಾಂಗನೆ

ಪದದ್ವಂದ್ವಕೆರಗುವೆನು ನಿನ್ನ|

ಸಂದೇಹ ಮಾಡದಲೆ ಇಂದು ಕರುಣಿಪುದು

||ಗಜಮುಖನೆ||

ಹರನ ತನಯನೆ ಕರುಣಾಕರನೆ

ಸುರನರ ವರದ |

ಮೊರೆಯ ಲಾಲಿಸಿ ಎನ್ನ

ಕರಗಳನು ಪಿಡಿದು|

ಪೊರೆಯದಿದ್ದರೆ ಬಿಡೆನು

ನೆರೆದೆ ನಿನ್ನಡಿಗಳನು |

ತ್ವರಿಯದಿಂದಲಿ ನೋಡು ಶರಣೆಂಬೆ ನಿನಗೆ

||ಗಜಮುಖನೆ||

ಸಿದ್ಧಿದಾಯಕ ನಿನ್ನ

ಹೊದ್ದಿ ಮೆರೆವೆನೊ ನಾನು|

ಅಬ್ಧಿಶಯನನ ಮಹಿಮೆ ಬಧ್ದದಲಿ ಪೇಳ್ವ|

ಶುದ್ಧಮತಿಯನು ಕೊಟ್ಟು

ಉದ್ಧರಿಸಬೇಕೆನ್ನ. |

ಮಧ್ವವಲ್ಲಭ ಶ್ರೀಕೃಷ್ಣಗತಿ ಪ್ರಿಯನಾ

||ಗಜಮುಖನೆ||